எத்தனை பேய்களின் மொத்தஉரு இவன்? (கவிதை)

எத்தனை பேய்களாம் மொத்தமாகியிந்த
எத்தன் பிறந்தனனோ
அத்தனைகோர முகங்களெடுத்திவன்
ஆளுவதும் அரசோ
சித்தம்கலங்கிட செய்யும் கொடூரங்கள்
இத்தனை நெஞ்சுரமோ
சத்தியமே இவன்மானிடனா இல்லைச்
சாவின் திருஉருவா

கொத்திப்பேய் காட்டேறி இரத்தபிசாசென
கொள்ளிவால் பேய்களென
அத்தனைபேய்களும் ஆளுருகொண்டெமை
ஆட்டிப் படைக்கின்றதோ
நர்த்தனமாடி நடுச் சுடுகாட்டிலே
நாய்கள் குரைத்து நிற்க
செத்தவர் மீதேறிச் சுற்றிநடமிட்ட
சிந்தனை கொள்கிறதே

பிய்த்துக் குடல்கொண்டு மாலையிட்டதென
பட்டி அணிந்து கொண்டு
மொய்த்த பலமனப் பேய்கள்தமை சுற்றி
பக்க பலமிருத்தி
ஏய்த்தும் உலகினை இட்டுக் கதைகட்டி
எத்தனை பொய்யுரைத்தும்
உய்ய வழிகண்டு ஓங்கவிட்டு நாமும்
ஊமையென்றாகுவதோ

ஒற்றைக்கை கொண்டுண வென்றுசு வைத்ததை
இப்போ மறந்திடுமோ
வெற்றுடம் பானதைக் கண்டஇனம் அதை
விட்டுப்பிரிந்திடுமோ
சுற்றிக் குதித்துவர் கெக்கரித்தே கரம்
கொட்டிச் சிரித்ததெல்லாம்
பற்றிஎரிஉடல் பார்த்த களிப்பினை
விட்டுமே வாழ்ந்திடுமோ

பெண்ணைக் கண்டாலொரு பேயுமிரங்கிடும்
என்று மொழியுரைத்தார்
மண்ணிலின்றோ இது மாறிநடக்குது
பேயைக் கண்டே இரங்கி
பெண்ணைக் கெடுக்கவும் அன்னை யழிக்கவும்
பக்கம் இருந்தவரை
விண்ணும் உலகமும் மெல்ல பெயர்சொல்லும்
வேளை வருகுதடா

பேயைத் துரத்திடு பிள்ளைகள் காத்திடு
பெண்களை வாழவென
நோயைத் துரத்திடும் நல்லமருந்தென
நீ உன்னை ஆக்கிவிடு
தாயைத் தமிழீழ தேசத்தைமீட்டிடு
தள்ளியே நீயிருந்தால்
தூய இனமொழி தேய்ந்து மறைந்திடும்
தூங்கா தெழுந்து நில்லு

பேயைத் துரத்திடு பிள்ளைகள் காத்திடு
பெண்களை வாழவென
நோயைத் துரத்திடும் நல்லமருந்தென
நீ உன்னை ஆக்கிவிடு
தாயைத் தமிழீழ தேசத்தைமீட்டிடு
தள்ளியே நீயிருந்தால்
தூய இனமொழி தேய்ந்து மறைந்திடும்
தூங்கா தெழுந்து நில்லு

சுதந்திர மூச்சாய் இந்த கவிதை அருமை தோழரே .