காலி நாற்காலியில் வைக்கப்பட்ட நோபல் பரிசு

மோகன் · மோகன் Sat Dec 11, 2010 2:29 pm

காலி நாற்காலியில் வைக்கப்பட்ட நோபல் பரிசு

2010ம் ஆண்டுக்கான நோபல் அமைதி விருதுக்கு சீனாவின் ஜனநாயகப் போராட்டத் தலைவர் லியூ ஜியாபோ தேர்ந்தெடுக்கப்பட்டார். லியு ஜியாபோவை கடந்த 10 ஆண்டுகளுக்கும் மேலாக வீட்டுக்காவலில் சீன அரசாங்கம் வைத்துள்ளது. நோபல் பரிசுக்கு அவரைத் தேர்ந்தெடுத்திருப்பதால் சீனா கடும் ஆத்திரம் அடைந்தது. நோபல் பரிசு கமிட்டிக்கு எதிராக தீவிரமான பிரசாரமும் செய்தது.

காலி நாற்காலியில் வைக்கப்பட்ட நோபல் பரிசு Nobel%20medal

காலி நாற்காலியில் வைக்கப்பட்ட நோபல் பரிசு Nobel%20medal

இந்த நிலையில், நோபல் பரிசு வழங்கும் விழா ஓஸ்லோ நகரில் 10.12.2010 அன்று நடைபெற்றது. ஆனால் லியு ஜியாபோ சிறையிலிருப்பதால் விருது விழாவில் அவரால் கலந்து கொள்ள முடியவில்லை. எனினும் லியூவின் மனைவி அல்லது சீனாவைச் சேர்ந்த ஜனநாயகப் போராட்டத் தலைவர்கள் எவரேனும் சீனாவின் தடையைமீறி விழாவில் கலந்து கொண்டு விருதை பெறுவார்கள் என்று எதிர்பார்க்கப்பட்டது. ஆனால் லியூ ஜியாபோ சார்பில் யாருமே விழாவில் கலந்து கொள்ளவில்லை.

விழாவில் கலந்து கொள்ளுமாறு 65 நாடுகளுக்கு அழைப்பு அனுப்பப்பட்டது. சீனாவின் நெருக்கடி காரணமாக ரஷ்யா, கஜகஸ்தான், கொலம்பியா, ஈரான், ஈராக், வியட்னாம், அர்ஜென்டினா, கியூபா, எகிப்து, பாகிஸ்தான், இலங்கை உள்பட 20 நாடுகள் பரிசளிப்பு விழாவில் பங்கேற்கவில்லை. ஐரோப்பிய நாடுகள், அமெரிக்கா, இந்தியா, தென்கொரியா, ஜப்பான், இந்தோனேசியா என 45 நாடுகள் விழாவில் கலந்துகொண்டன. இந்தியா இவ்விழாவில் கலந்து கொள்ளும் முடிவு ஏற்கனவே எடுக்கப்பட்டது என்று இந்திய வெளியுறவு அமைச்சர் எஸ்.எம்.கிருஷ்ணா விளக்கம் அளித்திருந்தார்.

பல்வேறு நாடுகளின் தூதர்கள், சீனாவால் நாடு கடத்தப்பட்ட சீன பிரமுகர்கள், நார்வே நாட்டு பிரமுகர்கள் மற்றும் பல உயரதிகாரிகள் ஆகியோர் கலந்து கொண்டனர். விழா மேடையில் முக்கியப் பிரமுகர்களுக்கான நாற்காலிகள் போடப்பட்டிருந்தன. அவற்றுடன் லியு ஜியாபோவுக்காக ஒரு நாற்காலியும் ஒதுக்கப்பட்டிருந்தது. லியு நோபல் பரிசு பெறுகிறார் என்று நோபல் பரிசு கமிட்டி தலைவர் தோப்ஜோர்ன் ஜேக்லேண்ட் அறிவித்தவுடன், சபையில் நெடுநேரம் கரவொலி எழுப்பப்பட்டது சீனாவுக்கு மேலும் வெறுப்பை அதிகரித்திருக்கும்.

பரிசு வழங்கும் விழாவில் பேசிய ஜேக்லேண்ட் கூறியதாவது: இந்தப் பரிசு, சீனாவுக்கு எதிரானதல்ல. யாரையும் புண்படுத்துவது என்பது கமிட்டியின் நோக்கமும் அல்ல. மனித உரிமைகளுக்காக அகிம்சை வழிப் போராட்டத்தின் சின்னமாக லியு விளங்குகிறார். அவர் எவ்விதத் தவறும் செய்யவில்லை. அவரை விடுவிக்க வேண்டும்.
விமர்சனத்தை எதிர்கொள்ளும் பக்குவம் சீனாவுக்கு வர வேண்டும். லியுவை சீனா விடுவிக்காததில் இருந்தே இந்தப் பரிசு அவருக்குப் பொருத்தமானதுதான் என்பது நிரூபணமாகியுள்ளது என்று ஜேக்லேண்ட் கூறிவிட்டு லியு ஜியாபோவிற்கான விருதை அவருக்காக ஒதுக்கப்பட்டு காலியாகவே இருந்த நாற்காலியில் ஜேக்லேண்ட் வைத்தார்.

இந்நேரம்.காம்