மலேசியா: விலை உயர்வைக் கண்டித்து ஆர்ப்பாட்டங்கள்

அண்மையில் அரசாங்கம் கொண்டுவந்த எரிபொருள் விலை உயர்வை எதிர்த்து தெரு ஆர்ப்பாட்டம் செய்வது பற்றி சிவில் அமைப்புகளும் பக்காத்தான் ரக்யாட் தலைவர்களும் ஆலோசித்து வருகின்றனர்.

சிலாங்கூர் நீர் விநியோகிப்பாளரான சபாஷுடன் செய்துகொள்ளப்பட்டிருக்கும் “நியாயமற்ற” உடன்பாடுகளைத் திருத்தி அமைப்பது தொடர்பில் கடந்த வாரம் ஓர் ஆர்ப்பாட்டத்தில் ஈடுபட்ட அவர்கள் இப்போது மற்றொரு ஆர்ப்பாட்டத்துக்கு ஆயத்தமாகி வருவதுபோல் தெரிகிறது.

பணவீக்க-எதிர்ப்புக் கூட்டமைப்பான புரோட்டெஸின் ஒருங்கிணைப்பாளர் டாக்டர் ஹட்டா ரம்லி-இவர் பாஸ் கோலா கிராய் எம்பியும்கூட- அரசாங்கம் ஆண்டு இறுதிவரை இன்றியமையாப் பொருள்களின் விலைகள் உயர்த்தப்பட மாட்டா என்ற அதன் வாக்குறுதியை மீறிவிட்டதாகக் கூறினார்.

ஆண்டு இறுதி நெருங்கும் வேளையில் அரசாங்கம் மக்களைப் பற்றி, குறிப்பாக பள்ளிசெல்லும் பிள்ளைகளைக் கொண்டிருப்போருக்கு ஏற்படக்கூடிய நிதிச்சுமையைப் பற்றிக் கவலைப்படவில்லை என்று ஹட்டா கூறினார்.

“புரோட்டெஸ், அடுத்த கட்ட நடவடிக்கை குறித்து விவாதிக்கும்”, என்று மலேசியாகினிக்கு அனுப்பி வைத்த செய்தியில் அவர் குறிப்பிட்டிருந்தார்.

பிஎஸ்எம் தலைமைச் செயலாளர் எஸ்.அருட்செல்வனும், மற்ற கட்சிகளுடன் சேர்ந்து கண்டனம் தெரிவிக்க தங்கள் கட்சியும் தயாராக இருப்பதாய்த் தெரிவித்தார்.

கடந்த வாரம், ரோன்95 பெட்ரோல், டீசல், சமையல் வாயு ஆகியவை 5 சென் விலை உயர்ந்த வேளையில் சீனி விலை 20 சென் உயர்ந்து ஒரு கிலோவுக்கு ரிம2.10 ஆனது.

நவம்பரில்தான் உள்நாட்டு வாணிக, பயனீட்டாளர் விவகார அமைச்சர் இஸ்மாயில் சப்ரி சிக், ஆண்டு இறுதிப்பகுதியில் பொருள்களின் விலை உயராது என்று உறுதிகூறியிருந்தார். அப்படி இருந்தும் விலைகள் உயர்ந்துள்ளன.

இதனிடையே, இன்று மாணவர்கள் புத்ரா ஜெயாவில் அமைதியான கண்டனக்கூட்டம் ஒன்றை நடத்தி பிரதமரிடம் மகஜர் வழங்கத் திட்டமிட்டுள்ளனர்.

காபோங்கான் மஹாசிஸ்வா இஸ்லாம் செம்னாஞ்சோங் மலேசியா(காமிஸ்) என்னும் மாணவர் அமைப்பு இதற்கு ஏற்பாடு செய்துள்ளது.இதற்காக மாணவர்கள், பிரதமர் அலுவலகத்தை அடுத்து அமைந்துள்ள புத்ரா ஜெயா பள்ளிவாசலில் வெள்ளிக்கிழமைக் தொழுகைக்குப் பின்னர் ஒன்றுகூடுவர்.

மலேசியாஇன்று!