மீண்டும் உச்சாணியில் ஏறும் ஐ.டி. துறை!

விப்ரோ, இன்ஃபோசிஸ் மற்றும் டிசிஎஸ் போன்ற இந்தியாவின் ஐ.டி. முதலைகள்தான் அயல்நாடுகளில் கிளைகள் தொடங்கவேண்டுமா... எங்களாலும் முடியுமே என்று சிறிய ஐ.டி. நிறுவனங்களும் கச்சைக்கட்டிக்கொண்டு களமிறங்கிவிட்டதால், இந்திய ஐ.டி. துறை மீண்டும் கிடு கிடு வளர்ச்சியை எட்டிபிடித்துக்கொண்டிருக்கிறது.

ஐ.டி. எனப்படும் தகவல் தொழில்நுட்ப துறையில் மீண்டும் புத்துயிர் ஏற்பட்டுள்ள நிலையில், அமெரிக்கா போன்ற நாடுகளிலிருந்து புதிய 'புராஜக்ட்'களை எடுத்து செய்வதற்கான வாய்ப்புகள் நடுத்தர மென்பொருள் சேவை நிறுவனங்களுக்கு வந்து குவியத் தொடங்கியுள்ளதாக இத்துறை வல்லுனர்கள் கூறுகின்றனர்.

விப்ரோ போன்ற பெரிய நிறுவனங்கள் மகா பெரிய 'புராஜக்ட்'களை எடுத்து செய்வதற்கே அதிக முன்னுரிமை அளிப்பதால், சிறிய மற்றும் நடுத்தர அளவிலான 'புராஜக்ட்'கள் மேற்கூறிய நடுத்தர ஐ.டி. நிறுவனங்களை தேடி வரத் தொடங்கிவிட்டன.

இதனால் நடுத்தர இந்திய ஐ.டி. நிறுவனங்கள் கூட, வெளிநாடுகளில் தைரியமாக கடைவிரிக்க தொடங்கிவிட்டன.இதற்கு தோதாக வெளிநாடுகளிலேயே அந்நிறுவனங்களுக்கு ஏற்ற செலவில் பணியாளர்களும் கிடைக்கத் தொடங்கிவிட்டதும் அதற்கு முக்கிய காரணமாக அமைந்துவிட்டது.

இதனால் நடுத்தர ஐ.டி. நிறுவனங்களின் வளர்ச்சி மற்றும் இலாபம் போன்றவை நிச்சயம் 2009 ஆம் ஆண்டைவிட நடப்பு காலண்டர் ஆண்டான 2010 ல் முன்னேற்றமாகவே காணப்படும்.அதேப்போன்று வருகிற 2011 ஆம் ஆண்டு, 2010 ல் காணப்பட்டதைவிட இன்னமும் சிறப்பாக இருக்கும்" என்று கூறுகிறார் இத்துறை நிபுணரான ஹிதேஷ் ஷா!

ஜியோமெட்ரிக் போன்ற ஏராளமான நடுத்தர ஐ.டி. நிறுவனங்கள் ஏற்கனவே அயல்நாடுகளில் கிளைகளை திறந்து செயல்பட தொடங்கிவிட்ட நிலையில், பாட்னி கம்ப்யூட்டர் சிஸ்டம்ஸ், மெபாசிஸ் போன்ற நிறுவனங்கள் அயல்நாடுகளில் கால் பதிப்பதற்கான வாய்ப்புகளை தேடி வருகின்றன.

இதனை அந்த நிறுவனங்கள் தடம் பதிக்க விரும்பும் நாடுகளில் ஏற்கனவே செயல்பட்டுக்கொண்டிருக்கும் சிறிய ஐ.டி. நிறுவனங்களை கையகப்படுத்துவது மூலமாகவோ அல்லது புதிதாக தொடங்குவதன் மூலமாகவே நிறைவேற்ற நினைக்கின்றன.

இதற்கு உதாரணமாக கூறுவதென்றால், தானியங்கி மற்றும் கனரக தொழில்துறைகளில் மென்பொருள் சேவைகளை வழங்கி வரும் ஜியோமெட்ரிக் நிறுவனம், அமெரிக்காவில் உள்ள தனது கிளை பணியாளர்களின் எண்ணிக்கையை தற்போதுள்ள 300 லிருந்து 500 ஆக அதிகரிக்க திட்டமிட்டுள்ளதை சுட்டிக்காட்டலாம்.

மேலும் சீனா மற்றும் ரோமானியா ஆகிய நாடுகளிலும் கிளை தொடங்க திட்டமிட்டுள்ளதாக கூறுகிறார் அந்த நிறுவனத்தின் தலைமை நிர்வாகி ரவிசங்கர்.

மேலும் அமெரிக்காவில் உள்ள தங்களது நிறுவனத்திற்கு பணியாற்றுவதற்காக இந்தியாவிலிருந்து கொண்டு சென்ற பணியாளர்களின் எண்ணிக்கை, ஏற்கனவே அமெரிக்காவில் அமர்த்திய பணியாளர்களின் எண்ணிக்கையைவிட குறைவானதுதான் என்றும், இதனால் விசா பிரச்சனைகள் போன்றவை தங்களுக்கு ஏற்படவில்லை என்றும், 2008 ல் நிகழ்ந்த சர்வதேச பொருளாதார சரிவுக்கு பின்னர் "அவுட்சோர்சிங்' கில் விழிப்புணர்வு ஏற்பட்டுள்ளதாகவும் ரவிசங்கர் கூறுகிறார்.

பொருளாதார சரிவுதான் பல வெளிநாட்டு நிறுவனங்களை தங்களது பணிகளை குறைந்த செலவாகும் அயல்நாட்டு நிறுவனங்களுக்கு அளித்து "அவுட்சோர்சிங்" செய்யும் நிலைக்கு தள்ளியது என்றும் அவர் மேலும் கூறுகிறார்.

இந்நிலையில் ஜியோமெட்ரிக்கை போன்றே, "ஜென்ஸார் டெக்னாலஜிஸ் லிமிடெட்" நிறுவனம் அமெரிக்காவை சேர்ந்த பிஎஸ்ஐ ஹோல்டிங்ஸ் நிறுவனத்தின் சார்பு நிறுவனமான "அகிபியா" என்ற நிறுவனத்தை சமீபத்தில் கையகப்படுத்தியுள்ளது.

அயல்நாட்டில் தனது தடத்தை அதிகரித்துக்கொள்ளும் நோக்கத்திலேயே "ஜென்ஸார்" இந்த நடவடிக்கையை மேற்கொண்டுள்ளது.

அதேப்போன்று மாஸ்டெக் லிமிடெட் நிறுவனமும் எஸ்இஜி என்ற அமெரிக்க நிறுவனத்தை கையகப்படுத்தியுள்ளது.

இவை தவிர மேலும் பல நடுத்தர நிறுவனங்களும் பல வெளிநாட்டு நிறுவனங்களை கையகப்படுத்தவோ அல்லது புதிதாக தொடங்கவோ வரிசை கட்டி நிற்கின்றன என்பதால், ஐ.டி. துறை மீண்டும் உச்சாணியில் ஏறத் தொடங்கிவிட்டதாகவே தெரிகிறது!

நல்ல செய்திதானே...

கவிக்காதலன் wrote:நல்ல செய்திதானே...

ஆமாம் ரொம்ப நல்ல செய்தி தான்; நமக்கு, நம் நாட்டுக்கு