குற்றாலம் பகுதியில் பலத்த மழை அருவிகளில் வெள்ளம் குளிக்க தடை

குற்றாலம் பகுதியில் பெய்து வரும் பலத்த மழையினால் குற்றாலத்தில் அனைத்து அருவிகளிலும் வெள்ளப் பெருக்கு ஏற்பட்டுள்ளது. இதனால் குற்றாலம் மெயின் அருவி, ஐந்தருவி, பழைய குற்றால அருவி, சிற்றருவி ஆகிய அருவிகளில் உல்லாசப் பயணிகள் மற்றும் அய்யப்ப பக்தர்கள் குளிக்க போலீஸார் தடை விதித்துள்ளார்கள்.

குற்றாலம், தென்காசி, செங்கோட்டை பகுதிகளில் கடந்த 10 நாட்களாக பெய்து வரும் தொடர் மழையினால் குற்றாலத்தில் மெயின் அருவி, ஐந்தருவி, பழைய குற்றால அருவி, புலி அருவி, சிற்றருவி, செண்பகாதேவி அருவி, பழத்தோட்ட அருவி, குண்டர் தோப்பு அருவி, கரடி அருவி, புது அருவி, உட்பட அனைத்து அருவிகளிலும் வெள்ளப் பெருக்கு ஏற்பட்டுள்ளது. இதனால் அனைத்து அருவிகளிலும் பாதுகாப்பு கருதி உல்லாசப் பயணிகள் மற்றும் அய்யப்ப பக்தர்கள் குளிக்க போலீஸார் தடை விதித்துள்ளார்கள். குற்றாலத்தில் நேற்று முன்தினம் நள்ளிரவு வெள்ளப்பெருக்கு ஏற்பட்டது. இதனால் குற்றாலம் மெயின் அருவியில் பாதுகாப்பு வளையத்தை தாண்டி தண்ணீர் வெள்ளமென கொட்டியது. மேலும் குற்றாலநாதர் கோவில் பின்புறம் மற்றும் சன்னதி பஜார் பகுதிகளுக்குள் வெள்ளம் புகுந்தது. இதனால் வியாபாரிகள் மற்றும் அய்யப்ப பக்தர்கள் அச்சம் அடைந்தனர்.

நேற்று கார்த்திகை மாதம் இரண்டாவது திங்கள் கிழமை சோமாவரம் என்பதால் நேற்று அதிகாலை முதல் இரவு வரை குற்றாலம் திருக்குற்றால நாதர் கோவிலில் பெண்கள் கூட்டம் அலை மோதியது. இதனால் குற்றாலம் பஸ் நிலையம், சன்னதி பஜார், திருக்குற்றால நாதர் கோவில் சன்னதி பஜார் மற்றும் முக்கிய இடங்களில் ஏராளமான போலீஸார் பாதுகாப்பு பணியில் ஈடுபடுத்தப்பட்டிருந்தார்கள். ஆனால் சோமாவரத்தை முன்னிட்டு குற்றாலத்தில் குவிந்த பெண்கள் குற்றாலம் அருவியில் குளிக்க போலீஸார் தடைவிதித்துள்ளதால் ஏமாற்றம் அடைந்தனர். மேலும் தென்காசி, செங்கோட்டை, பகுதிகளில் உள்ள குண்டாறு, அடவிநயினார் அணைகளுக்கு தண்ணீர் வரத்து அதிகரித்துள்ளது.

மேலும் தென்காசி சிற்றாற்றில் வெள்ளப்பெருக்கு ஏற்பட்டுள்ளது. மேலும் தென்காசி , செங்கோட்டை பகுதிகளில் உள்ள 100 க்கும் மேற்பட்ட விவசாய பாசனக்குளங்களுக்கு தண்ணீர் அதிக அளவில் வந்து கொண்டு இருக்கிறது. இதனால் இன்னும் 2 அல்லது 3 நாட்களில் அனைத்து குளங்களும் நிரம்பி விடும் நிலையில் உள்ளது. மேலும் இந்த பகுதியில் பெய்து வரும் பலத்த மழையினால் விவசாயிகள் நடவுப் பணிகளை மகிழ்ச்சியுடன் துவங்கியுள்ளார்கள். நேற்று தென்காசியில் 58.2 மி.மீட்டரும், செங்கோட்டையில் 96 மி.மீட்டரும் மழை பதிவாகியுள்ளது.