இந்திய அணியின் வெற்றி தொடருமா! இன்று நியூசிலாந்துடன் 2வது மோதல்

by **சிவா** Wed Dec 01, 2010 2:42 am

ஜெய்ப்பூர்: இந்தியா, நியூசிலாந்து அணிகள் மோதும் இரண்டாவது ஒருநாள் போட்டி இன்று ஜெய்ப்பூரில் நடக்கிறது. முதல் போட்டியில் வென்ற இளம் இந்திய அணியின் எழுச்சி, இன்றும் தொடரும் என எதிர்பார்க்கப்படுகிறது.

இந்தியா வந்துள்ள நியூசிலாந்து அணி ஐந்து போட்டிகள் கொண்ட ஒருநாள் தொடரில் பங்கேற்கிறது. முதல் போட்டியில் வென்ற இந்திய அணி, தொடரில் 1-0 என்ற முன்னிலையில் உள்ளது. இரண்டாவது போட்டி இன்று ராஜஸ்தான் தலைநகர் ஜெய்ப்பூரில் உள்ள மான்சிங் மைதானத்தில், பகலிரவு போட்டியாக நடக்கிறது.

நியூசிலாந்துக்கு எதிரான முதல் இரண்டு ஒருநாள் போட்டிகளில் சச்சின், தோனி, சேவக், ஹர்பஜன் உள்ளிட்ட சீனியர்களுக்கு ஓய்வு கொடுக்கப்பட்டது. இந்நிலையில் காம்பிர் தலைமையில் களமிறங்கிய இளம் வீரர்கள் முதல் போட்டியில் அசத்தல் வெற்றி பெற்றனர். இன்று முரளி விஜய், காம்பிர் அதிக நேரம் களத்தில் இருந்து ரன்கள் சேர்க்க வேண்டும். ரஞ்சிக் கோப்பை தொடரில் அடுத்தடுத்து சதம் அடித்த விராத் கோஹ்லி, கடந்த போட்டியிலும் சதம் அடித்து நல்ல பார்மில் உள்ளார்.

இவருக்கு, யுவராஜ் சிங் (42 ரன்கள்) பேட்டிங்கில் ஓரளவு கைகொடுத்தாலும், பவுலிங்கில் இவரது பங்கு மகத்தானது. கடைசி 26 ரன்களுக்கு 6 விக்கெட்டுகளை இழந்தது ஏற்றுக்கொள்ள முடியாதது. உலக கோப்பை தொடர் துவங்க சிலமாதங்களே உள்ள நிலையில் யூசுப் பதான், ரெய்னா ஆகியோர் மீண்டால் நல்லது. இதேபோல, "பவர் பிளே' ஓவர்களில் அதிக ரன்கள் சேர்க்க முயற்சிக்க வேண்டும்.

பவுலிங் ஆறுதல்:

பவுலிங்கை பொறுத்தவரை, ஸ்ரீசாந்த் நம்பிக்கை தருகிறார். ஆஷிஸ் நெஹ்ரா, முனாப் படேல் இன்று ஆறுதல் தருவார்கள் என்று நம்பலாம். சுழற்பந்து வீச்சில் தமிழக வீரர் அஷ்வின், "பவர் பிளே' ஓவர்களில் ரன்களை கட்டுப்படுத்துவது, விக்கெட்டுகளையும் சாய்ப்பது அணிக்கு நல்ல செய்தி தான்.

மீண்டும் சந்தேகம்:

நியூசிலாந்து அணியின் வெட்டோரி, காயத்தை பொருட்படுத்தாமல் இன்று களமிறங்கினாலும், பிரண்டன் மெக்கலம் குறித்து சந்தேகம் உள்ளது. இதனால் கப்டில், ஹாப்கின்ஸ், வில்லியம்சன் ஆகியோர் ரன்கள் சேர்க்க வேண்டிய கட்டாயத்தில் உள்ளனர். கடந்த போட்டியில் அரைசதம் அடித்த ரோஸ் டெய்லர், மீண்டும் சாதிக்க முயற்சிப்பார்.

பவுலிங்கில் முன்னணி வீரர் டேரல் டபி, காயம் காரணமாக நாடு திரும்புகிறார். ஏற்கனவே பேட்டிங்கில் பலவீனமாகி இருக்கும் இந்த அணிக்கு, இது அடுத்த பின்னடைவு தான். கடந்த போட்டியில் கடைசி நேரத்தில் அசத்திய மெக்கே, மில்ஸ், டிம் சவுத்தி ஆகியோருடன், "ஆல் ரவுண்டர்' நாதன் மெக்கலம் போன்றவர்களும் வெற்றி தேடித்தர வேண்டிய நிலையில் உள்ளனர்.

பனி பாதிப்பு:

இன்று பகலிரவு போட்டி என்பதால் இரவில் பனிப்பொழிவு அதிகமாக இருக்கும். இதனால் இரண்டாவதாக பவுலிங் செய்யும் போது, ஈரப்பதம் அதிக தொல்லை தரும். இதனால் "டாஸ்' வெல்லும் அணி, முதலில் பீல்டிங் செய்ய வாய்ப்பு உள்ளது.

ராசியான மைதானம்

* ஜெய்ப்பூர், மான்சிங் மைதானத்தில் இந்திய அணி, இதுவரை 10 போட்டிகளில் பங்கேற்று 6ல் வெற்றி, 4ல் தோல்வியடைந்துள்ளது.
* கடைசியாக கடந்த பிப். 21ல் நடந்த தென் ஆப்ரிக்காவுக்கு எதிரான போட்டியில் இந்தியா ஒரு ரன் வித்தியாசத்தில் "திரில்' வெற்றி பெற்றது.
* இந்திய அணி இலங்கைக்கு எதிராக (2005) அதிகபட்சமாக 303/4 ரன்கள் எடுத்துள்ளது. குறைந்த பட்சமாக இங்கிலாந்துக்கு எதிராக (2006), 126/6 ரன்கள் எடுத்து வென்றது.
* இந்தியாவின் சச்சின், 7 போட்டிகளில் பங்கேற்று 322 ரன்கள் எடுத்துள்ளார்.
* கும்ளே, 4 போட்டிகளில் 9 விக்கெட் வீழ்த்தியுள்ளார்.
* தற்போது அணியில் உள்ள வீரர்களில் ஸ்ரீசாந்த், 2 போட்டிகளில் 5 விக்கெட் கைப்பற்றியுள்ளார்.

அதிக ரன்கள் தேவை

இன்றைய போட்டியில் வெற்றி பெறுவதற்கு அதிக ரன்கள் தேவை என்று இந்திய கேப்டன் காம்பிர் தெரிவித்துள்ளார். இதுகுறித்து காம்பிர் கூறியது:

ஆஷிஸ் நெஹ்ரா அனுபவம் வாய்ந்த பவுலர். ஸ்ரீசாந்த்தும் டெஸ்ட் தொடரில் அதிகம் பவுலிங் செய்துள்ளார். இருந்தாலும் இந்திய துணைக்கண்டத்தை பொறுத்தவரையில், பேட்டிங் என்பது மிகவும் முக்கியமானது. இங்கு எப்போதுமே அதிக ரன்கள் எடுத்தால் தான் நல்லது. முதலில் பேட்டிங் செய்தால் குறைந்தது 300 ரன்கள் எடுக்க வேண்டும். பனித்துகள் சிக்கல் இருப்பதால், இது தான் பவுலர்களுக்கு பாதுகாப்பான இலக்கு. அதேநேரம், எங்களது பவுலர்கள் இதுபோன்ற சூழ்நிலையில் ஏற்கனவே அனுபவம் பெற்றுள்ளனர். இருப்பினும், டாஸ், இயற்கை எல்லாம் நமது கையில் இல்லை.
இவ்வாறு காம்பிர் தெரிவித்தார்.