சிவகங்கை மாவட்டத்தை மீட்போம்

First topic message reminder :

சிவகங்கை மாவட்டத்தை மீட்போம், என்று தினமலர் வெளியிட்டுள்ள புகைப்படங்களை இங்கு தொகுத்து வழங்குகிறேன்! மக்களின் அலட்சியம், வீணாகும் அரசாங்க சொத்துக்கள் என பட்டியலிட்டு புகைப்படங்களுடன் வெளியிட்டுள்ளார்கள். ஆனால் இதுவரை அரசாங்கமோ, மக்களோ செவிசாய்க்கவில்லை என்பதுதான் வேதனையான விடயம்.

இயற்கை வளத்திற்கு சவால்

மனித நாகரிகம் வளர, வளர பூமியில் இயற்கை வளம் கேள்விக்குறியாகியுள்ளது. சுற்றுச்சூழலுக்கு சவால் விடும் பாலிதீன் பைகளை பயன்படுத்துவது "நாகரிகம்' என நாம் நினைக்கிறோம். இதனால், செல்லும் இடங்களில் எல்லாம், பாலிதீன் ஆதிக்கம் தான். இயற்கை சூழலை ரசிக்க செல்லும் சிலர், வயிற்றை நிரப்புவதில் அக்கறையாக செயல்படுகின்றனர். பிளாஸ்டிக் பாக்கெட்களில் உணவை எடுத்து சென்று, அக்கறையில்லாமல் அவற்றை வீசி ஏறிகின்றனர். இதனால், அப்பகுதியில் மண் வளம், "மக்கி' போய்விட்டது. சுற்றுலா மையங்களில் பாலிதீன் பயன்பாட்டை தடை செய்ய வேண்டிய கட்டாயம் எழுந்துள்ளது. இருபது மைக்ரான் அளவு(தடிமன்) குறைந்த பாலிதீன் பொருள், மண்ணில் மக்குவதற்கு, 400 ஆண்டுகள் ஆகும். இதன்படி பார்த்தால், நாம் பயன்படுத்தும் பாலிதீன் பைகள், பல தலைமுறைகளை தாண்டியும் கேடு விளைவிக்கும். இவற்றால் மரம், செடி, விலங்கினங்களுக்கு மட்டு மல்ல, இறுதியில் நமக்கே ஆபத்தாக முடியும் என்பதை, நாம் உணர்வது இல்லை. இவற்றை தடை செய்யாமல், விழிப்புணர்வு என்ற பெயரில், "பம்மாத்து' காட்டப்படுகிறது. ஒழிப்பதில் யாரும் ஆர்வம் காட்டவில்லை. பருவ நிலையை மாற்றி, உலகிற்கே சவால் விடும் பாலிதீன் பொருட்களை ஒழிப்பது என, இன்றே உறுதி ஏற்போம்.

மாதிரி மழைநீர் சேகரிப்பு மையம், தற்போது பராமரிப்பின்றி ஆவணங்களை பாதுகாக்கும் இடமாக உள்ளது - கலெக்டர் அலுவலகம்.

தடுமாறும் அரசு பள்ளிகள்


அனைவருக்கு ஆரம்ப கல்வி, இடைநிலை கல்வி என அரசு புதிய திட்டங்களை வகுத்தாலும், அரசு பள்ளிகளின் நிலை பரிதாபமாகவே உள்ளது. தனியார் கல்வி நிறுவனங்களுக்கு நிகராக, கட்டமைப்பு வசதிகளை மேம்படுத்த, நிதி ஒதுக்கப்படுகிறது. ஆனால், மாவட்டத்தில் அரசு பள்ளி கட்டடங்கள் பாரமரிப்பு, பாதுகாப்பு இன்றி உள்ளன. பல பள்ளிகளில் வகுப்பறை சேதம் அடைந்துள்ளதால், மரத்தடி பாடம் தான் நடக்கிறது. கிராம பள்ளிகளில் பெஞ்சு இல்லாமலும், வகுப்பறை இன்றி மரத்தடியிலும், மாட்டு கொட்டகை போன்ற இடங்களிலும் படிக்க வேண்டிய அவலம் நிலவுகிறது. சுத்தமான குடிநீர், சுகாதார வளாகம் போன்றவை அறவே இல்லை. மகளிர் பள்ளி என்றால்.. சொல்லவே வேண்டாம். மாணவிகள் புதர்களை தேடி அலையும் அவலம் நீடிக்கிறது. இதனால், பல கிராமங்களில் மாணவ, மாணவிகள், நகர் பகுதி பள்ளிகளை நாடி வருகின்றனர்; கிராம பள்ளிகளில் மாணவர் எண்ணிக்கை குறைந்து, வெறிச்சோடி வருகிறது. இந்த அவலத்திற்கு முற்றுப்புள்ளி வைக்க பாதுகாப்பான வகுப்பறை, சுகாதாரமான குடிநீர், கழிப்பறை வசதிகளை மேம்படுத்த வேண்டும். அரசு பள்ளிகளும் கல்வியில் சிறந்தவை என்பதை உறுதி செய்ய வேண்டும். கல்வி துறையினர் மனது வைத்தால், இது சாத்தியம்.


அருங்காட்சியகத்தில் காட்சிப்படுத்த திட்டமோ. -மானாமதுரை கீழநெட்டுர் உயர்நிலைப்பள்ளி.

இற்றுப்போன கட்டடத்தை பற்றி சற்று சிந்தித்தால் நல்லது. - காளையார்கோவில் அருகே மரக்காத்தூர் நடுநிலைப்பள்ளி.

கல்விச்சாலையில் வெப்பம் தணிக்க தென்னை ஓலை. - சிவகங்கை அருகே கருமந்தக்குடி உயர்நிலைப்பள்ளி.

விழுகட்டும் என காத்திருக்கின்றனர் போலும். - திருப்புத்தூர் அருகே தம்பிபட்டி தொடக்கப்பள்ளி.

உணவு அருந்தவாவது பயன்படுகிறதே. கல்லல் ஒன்றிய தொடக்கப்பள்ளி

மிரட்டும் இந்த இருட்டறையும் ஒரு வகுப்பறை தான். - திருப்புவனம் அருகே நயினார்பேட்டை தொடக்கப்பள்ளி.

இது தான் கல்வி வெளிச்சமோ. - திருப்புவனம் அல்லிநகரம் தொடக்கப்பள்ளி.

சிறிய விரிசலை அலட்சியப்படுத்தினால் பேராபத்து. - திருப்புத்தூர் கீழரத வீதி ஒன்றிய பள்ளி.

கேள்விக்குறியாகும் பாதுகாப்பு


சிறு கிராமங்கள் நிறைந்த இம்மாவட்டத்தில், போதிய போக்குவரத்து வசதிகள் இல்லை. இதனால், அனுமதியில்லாத ஷேர் ஆட்டோக்களில் பயணிக்க வேண்டிய நிலைக்கு மக்கள் தள்ளப்படுகின்றனர். அரசு, தனியார் பஸ்கள் போக முடியாத கிராமங்களில், ஆட்டோ, ஷேர் ஆட்டோக்கள் செல்வது சேவையாக இருந்தாலும், அனுமதிக்கப்பட்ட அளவுக்கு ஆட்களை ஏற்றினால் பரவாயில்லை. சில டிரைவர்களின் பேராசையால் பள்ளி மாணவர்கள், கிராமத்தினரை "அடைத்து' கொண்டு செல்கின்றனர். இதனால் விபத்துக்கள் தான் அதிகரித்து வருகின்றன. இதுபோன்ற பயணத்தை தடை செய்ய வேண்டும்; "கூட்டமாக' ஏற்றி செல்லும் ஆட்டோ டிரைவர்கள் மீது கடும் நடவடிக்கை எடுக்க வேண்டும்; பயணிகளுக்கும் அபராதம் விதிக்கும் வகையில், போக்கு வரத்து விதிகளில் மாற்றம் செய்ய வேண்டும். கிராமங்களில் உள்ள குறுகிய சாலைகளில் பெரிய பஸ்கள் செல்ல முடியாது; அப்பகுதிக்கு மினி பஸ்களை இயக்கலாம். இதன்மூலம் போக்குவரத்து வசதி, பாதுகாப்பிற்கு உத்தரவாதம்


தேசிய நெடுஞ்சாலையில் 'எட்டு' போடுவது முறையோ. - திருப்புவனம்.