கருணாநிதிக்கு ராம கோபாலன் கண்டனம்

சென்னை: சர்வக்ஞர் சிலை திறப்பு விழாவில் இந்துக்களை மீண்டும் இழிவு படுத்தும் வகையில் முதல்வர் கருணாநிதி பேசியிருப்பதாக இந்து முன்னணி அமைப்பாளர் இராம. கோபாலன் குற்றம் சாட்டியுள்ளார்.

சென்னையில் கன்னட கவிஞர் சர்வக்ஞர் சிலை திறப்பு விழாவில் சர்வக்ஞரின் பாடலுக்கு முதல்வர் கருணாநிதி தனி உரை எழுதி மீண்டும் தான் ஒரு இந்துக்களின் விரோதி என்பதை வெளிக்காட்டியுள்ளார் என்று அவர் கூறியுள்ளார்.

படைத்தவன் பிரம்மன் எனும்பற்று வேண்டற்க
படைத்தவன் சிரத்தை சிவனறுக்க பிறிதொன்றை
படைத்துக் கொள்ளாததேன் சர்வக்ஞ

என்று தனது மனதுக்குப் "பற்று கொள்ளாதே' என்று சர்வக்ஞர் பாடியிருக்கிறார். "ஈசனோடாயினும் ஆசை அறுமின்' என்ற திருமூலர் வார்த்தையைப்போல "பற்று வேண்டாம்' என்று சொன்ன தத்துவ வார்த்தையை முதல்வர் எவ்வாறு திரித்துக் கூறுகிறார் பாருங்கள்.

"பிரம்மனைத் தனது அந்தப்புரத்தில் பின்னால் இருந்து பார்த்த பார்வதி, பிரம்மனின் ஐந்து தலைகளை வைத்து சிவனோ என்று எண்ணி ஏமாந்தாள். இதனை அறிந்த சிவன், பிரம்மாவிற்கு ஐந்து தலைகள் இருப்பதனால் தானே பார்வதி ஏமாந்தாள் என்று ஒருதலையை கிள்ளி எறிந்தார். பிரம்மா படைப்புத் தொழிலில் கெட்டிக்காரன் ஆயிற்றே; ஏன் இன்னொரு தலையைப் படைத்துக்கொள்ளவில்லை என்று பிரம்மனைப் பார்த்துக் கேட்கிறார் சர்வக்ஞர்! பெரியாரின் கருத்துக்களை நினைவு படுத்துகிறார் சர்வக்ஞர்!'' என்று கருணாநிதி பேசியுள்ளார்.

இரு மாநில நல்லுறவுக்குப் பாலமாக அமைய வேண்டிய விழாவில், இந்துக்களைக் கீழ்த்தரமாகப் பேசிய முதல்வரின் பேச்சு வேதனையை அளிக்கிறது. வீர சைவ மரபில் தோன்றிய சிவனடியாராக வாழ்ந்தவர் சர்வக்ஞர். அத்தகைய ஞானியின் கருத்தைத் திரித்துக்கூறி இந்துக்களை இழிவு படுத்தியிருக்கிறார் தமிழக முதல்வர்.

இந்துக்களை இழிவு படுத்தத் துணியும் முதல்வர் கருணாநிதிக்கு ஏன் முஸ்லீம், கிறிஸ்தவ மதங்களின் கதைகள் தெரியாதா? ஏன் அவற்றை வம்புக்கு இழுப்பதில்லை? அவர்களைப் பற்றிப் பேசினால் கருணாநிதி வீதியில் வர முடியுமா? இந்துக்களின் பொறுமைக்கும் ஓர் எல்லை உண்டு.

இவ்வாறு ராம கோபாலன் கூறியுள்ளார்.