பயன் தரும் என்றால் மட்டுமே 100-மாடி கோபுரம் கட்டப்படும்

வணிக ரீதியில் பயன்தரும் என்றால் மட்டுமே, பெர்மோடலான் நேசனல் பெர்ஹாட் 100-மாடி கட்டிடத்தைக் கட்டத் தொடங்கும். பிரதமர் நஜிப் அப்துல் ரசாக் இன்று இதனைக் கூறினார்.

அத்திட்டம், அது கட்டப்படும் பகுதியின் பொருளாதார வளர்ச்சிக்கு உதவி வர்த்தக வாய்ய்ப்புகளையும் வழங்குவதாக இருக்க வேண்டும்.

“இது சாத்தியமாகும் என்ற மனநிறைவு ஏற்படுமானால், அதனைக் கட்டும் திட்டம் தொடங்கும்.

“அகண்ட கோலாலம்பூருக்கு ஒரு தூண்டுவிசையாகவும் வினையூக்கியாகவும் அது திகழ வேண்டும்.” கோலாலம்பூரில், “நாளைய ஆசியானைக் கண்டறிதல்” என்னும் தலைப்பில் அமைந்த 7-வது ஆசியான் நிதி அமைச்சர்கள் முதலீட்டுக் கருத்தரங்கில் தலைமையுரை ஆற்றிய பின்னர் நஜிப், செய்தியாளர்களிடம் பேசினார்.

நேற்று, முன்னாள் பிரதமர் டாக்டர் மகாதிர் முகம்மட், நாட்டில் கட்டிடங்கள் மிதமிஞ்சியிருப்பதால் இன்னொரு உயர்ந்த கோபுரத்துக்கு அவசியமில்லை என்று கூறியிருந்தார்.

இதனால் ஆதாயம் உண்டா என்பதை பெர்மோடாலான் நேசனல்தான் கணிக்க வேண்டும் நிதி அமைச்சருமான நஜிப் குறிப்பிட்டார்.

வாரிசான் கோபுரம் கட்டப்படுவதால், 88-மாடி பெட்ரோனாஸ் இரட்டைக் கோபுரத்தின் பெருமை மங்கிவிடும் என்று கருதப்படுவது பற்றி வினவியதற்கு,“அது அற்பமான கூற்று. இங்கு தொடர்ச்சியைப் பற்றிப் பேசுகிறோம்”, என்று அவர் குறிப்பிட்டார்.

”மகாதிரின் சாதனை போற்றத்தக்கது. நாம் என்ன செய்ய வேண்டுமென்றால் அவருடைய வெற்றியை அடிப்படையாக வைத்து முன்னேறிச் சென்று மலேசியாவை மேம்படுத்த வேண்டும்.”


மேலும், வாரிசான் மெர்டேகா என்பது பத்தாண்டுக்காலத் திட்டம். அதை இரண்டு மூன்றாண்டுக் கணக்கில் நோக்கக் கூடாது என்றாரவர்.

“2020-இல், கோலாலம்பூரின் தோற்றம் இன்றுபோல் இருக்காது. அப்படி நீண்டகால நோக்கில் இதைப் பார்க்க வேண்டும். 2020 தொலைநோக்குத் திட்டம் அடையப்பட்டால் அதன் பெருமை துன் மகாதிருக்குத்தானே. அவர்தானே அதைத் தொடக்கி வைத்தவர்”, என்று நஜிப் குறிப்பிட்டார்.

http://www.malaysiaindru.com/?p=58847