சிங்களத்தில் தேசிய கீதம் என்ற செய்தி தவறானது

சிங்களத்தில் தேசிய கீதம் என்ற செய்தி தவறானது:கெஹலிய, டக்ளஸ், வாசு விளக்கம்



சிங்களத்தில் மட்டுமே தேசிய கீதம் இசைக்கப்படவேண்டும் என்று அமைச்சரவைத் தீர்மானம் நிறைவேற்றப்பட்டிருப்பதாக வெளியான செய்திகள் தவறானவை என்று அரசாங்கத்தின் முக்கிய அமைச்சர்கள் பலரும் தெரிவித்துள்ளனர்.

அமைச்சரவையில் இவ்வாறான யோசனை ஒன்று முன்வைக்கப்பட்டபோதிலும், சிங்கள மொழியில் மட்டுமே தேசிய கீதம் இசைக்கப்படவேண்டும் என்று தீர்மானம் எடுக்கப்படவில்லை என்று அமைச்சரவைப் பேச்சாளர் அமைச்சர் கெஹலிய ரம்புக்வெல தெரிவித்தார்.

இவ்வாறான ஒரு யோசனை அமைச்சரவையில் முன்வைக்கப்பட்டது உண்மையே என்று கூறியிருக்கும் பாரம்பரிய கைத்தொழில் மற்றும் சிறுதொழில் ஊக்குவிப்பு அமைச்சர் டக்ளஸ் தேவானந்தா, எனினும், ஜனாதிபதி மகிந்த ராஜபக்ஷ அந்த அமைச்சரவைப் பத்திரத்தைத் தள்ளிவைத்துவிட்டார் என்று தெரிவித்தார்.

இதனால், தேசிய கீதம் இசைப்பது தொடர்பாக இதுவரையில் இருந்துவந்த நடைமுறைகளே தொடர்ந்தும் பின்பற்றப்படும் என்றும் அவர் தெரிவித்தார்.

இதேவேளை, சிங்கள மொழியில் மட்டுமே தேசிய கீதம் இசைக்கப்படவேண்டும் என்று அமைச்சரவையில் முடிவு எடுக்கப்படவில்லை என்று அமைச்சர் வாசுதேவ நாணயகாரவும் கூறியுள்ளார்.

சிங்களத்தில் மட்டுமே தேசிய கீதம் இசைக்கப்படவேண்டும் என்று அமைச்சரவைத் தீர்மானம் நிறைவேற்றப்பட்டதாக கொழும்பு ஆங்கில வாரப் பத்திரிகையொன்றில் வெளியான செய்தியையடுத்து, தமிழ் ஊடகங்களிலும் இது தொடர்பான செய்திகள் பரபரப்பாக வெளியாகியிருந்ததுடன், தமிழ்த் தேசியக் கூட்டமைப்பு இதைக் கண்டித்து அறிக்கையும் வெளியிட்டிருந்தார்.

தமிழகத்திலும் சில அரசியல் தலைவர்கள் இதைக் கண்டித்திருப்பதாக இணையத்தளங்களில் செய்திகள் வெளியாகியிருந்தமையும் குறிப்பிடத்தக்கது.

http://www.jaffnatoday.com