ஸ்பெக்ட்ரம் ஊழலில் கிடைத்த தொகை கோபாலபுரத்திற்கும் சென்றுள்ளது

**சிவா** · **சிவா** Mon Nov 29, 2010 11:31 am

ஸ்பெக்ட்ரம் ஊழலில் கிடைத்த தொகை கோபாலபுரத்திற்கும் சென்றுள்ளது திருச்சியில் எச். ராஜா குற்றச்சாட்டு

ஸ்பெக்ட்ரம் ஊழலில் கிடைத்த பங்குத் தொகை சென்னை கோபாலபுரத்திற்கும் சென்றுள்ளது என்று தமிழக பா.ஜ.க. மாநில துணைத் தலைவர் எச். ராஜா குற்றம் சாட்டியுள்ளார்.

ஸ்பெக்ட்ரம் ஊழல். இப்போது நாட்டு மக்களிடையே பரபரப்பாக பேசப்பட்டு வரும் ஒன்று. இதில் சம்பந்தப்பட்டிருப்பவர் தி.மு.கவை சேர்ந்த முன்னாள் மத்திய தொலைத் தொடர்புத் துறை அமைச்சர் ஆ.ராசா.

இது தொடர்பாக எழுந்த பிரச்சினையை தொடர்ந்து எதிர்க்கட்சிகளின் வலியுறுத்தலை அடுத்து முதலில் பதவி விலக அடம் பிடித்த ராசா, பின்னாளில் வேறு வழியின்றி தி.மு.க தலைவர் கருணாநிதியின் உத்தரவின் பேரில் ராஜினாமா செய்தார். ஆனாலும் நாடாளுமன்றத்தில் பிரச்சினை ஓய்ந்த பாடில்லை.

இது தொடர்பாக விசாரணை நடத்த ஜே.பி.சி எனப்படும் பாராளுமன்ற கூட்டுக் குழு அமைக்க வேண்டும் என்று எதிர்க்கட்சிகள் விடாப்பிடியாக வலியுறுத்தி வருவதால் பாராளுமன்றம் தொடர்ந்து செயல்படாமல் ஸ்தம்பித்துப் போய் உள்ளது.

இதே பிரச்சினை லோக்சபையிலும் எதிரொலித்தது. இதையடுத்து சபை ஒத்தி வைக்கப்பட்டது. ராஜ்யசபையிலும் இதே நிலைமைதான். இந்நிலையில் திருச்சியில் செய்தியாளர்களுக்கு பேட்டியளித்த எச். ராஜா கூறும் போது, ஸ்பெக்ட்ரம் ஊழலில் கிடைத்த தொகை 40 சதவீதம் தி.மு.கவிற்கும், 40 சதவீதம் காங்கிரசுக்கும், 10 சதவீதம் முன்னாள் மத்திய அமைச்சர் ராசாவுக்கும், மீதமுள்ள 10 சதவீதம் அதிகாரிகளுக்கும் சென்றடைந்துள்ளது.

இந்த ஊழல் கனிமொழி எம்.பியாக இல்லாத காலக்கட்டத்திலேயே நடந்துள்ளது. அரசியல் புரோக்கர் எனக் கூறப்படும் ஞிரா ராடியாவுக்கு முன்னாள் மத்திய தொலைத் தொடர்பு அமைச்சர் ராசாவை அறிமுகம் செய்து வைத்தவரே இந்த கனிமொழிதான். ராடியாவுக்கும் இந்த ஊழலில் பங்குண்டு.

ஸ்பெக்ட்ரம் ஊழலில் கிடைத்த பணம் எல்லாம் அமெரிக்காவில் உள்ள வங்கிகளில் போடப்பட்டுள்ளது. இந்த விவரம் அந்நாட்டு அதிபருக்கும் தெரியும். மேலும் ராசா தன் மனைவி பெயரில் உள்ள நிறுவனத்திற்கு இந்த ஊழலில் கிடைத்த 45 சதவீத தொகையை கொடுத்துள்ளார். இந்த ஊழல் குறித்து விசாரணை நடத்தும் போது கருணாநிதியின் மகள் கனிமொழியிடமும் விசாரணை நடத்த வேண்டும். ஸ்பெக்ட்ரம் ஊழல் பணம் சென்னை கோபாலபுரத்திற்கும் சென்றுள்ளது. தயாநிதி மாறன் மீண்டும் பதவி பெற பணம் கொடுத்துள்ளார். ஸ்பெக்ட்ரம் ஊழல் குறித்து பாராளுமன்ற கூட்டுக் குழு விசாரணை நடத்துவதை தவிர வேறு வழியில்லை. இதில் முறைகேடு நடந்துள்ளது நாட்டு மக்களுக்கு நன்றாகவே தெரியும். மேலும் இந்த முறைகேடு பிரதமருக்கு தெரிந்தே நடந்துள்ளது. இதனால் அவரிடம் நேர்மையை எதிர்பார்க்க முடியாது.

ஸ்பெக்ட்ரம் ஊழலுக்கு பிறகு டெல்லியில் தி.மு.கவிற்கு மன் பார் கருணாநிதி என்ற புதிய பெயர் சூட்டப்பட்டுள்ளது. கடந்த நான்கரை ஆண்டு கால தி.மு.க ஆட்சியில் நிர்வாகம் சீரழிந்து விட்டது. கொலை, கொள்ளைகள் பெருகி விட்டன. கடத்தல் சம்பவங்களும் அதிகரித்து விட்டன.

சட்டமும், ஒழுங்கும் சீர்குலைந்து விட்டது. தமிழகத்தில் ஆட்சி மாற்றம் தேவை என மக்கள் எதிர்பார்க்கின்றனர். மதுரையில் தனது பேரனுக்கு திருமணத்தை சுப வேளையில் நடத்தி வைத்த கருணாநிதி, பெரியாரின் கொள்கைகளை காற்றில் பறக்க விட்டு விட்டார். அதே போல் தி.மு.கவையும் குழிதோண்டி புதைத்து விடுவார். இவ்வாறு அவர் கூறினார்.

பேட்டியின் போது திருச்சி மாநகர தலைவர் பார்த்திபன், செய்தி தொடர்பாளர் அருணாசலம் ஆகியோர் உடனிருந்தனர்.

தினபூமி!