வீட்டை காலி செய்ய மறுத்த பெண் சரமாரி வெட்டி கொலை

வடசென்னையில் வீட்டை காலி செய்ய மறுத்த பெண் சரமாரியாக அரிவாளால் வெட்டி படுகொலை செய்யப்பட்டார்.

இதுதொடர்பாக பிரபல ரவுடி உள்பட 3 பேரை போலீசார் வலைவீசி தேடி வருகின்றனர். சென்னை வண்ணாரப்பேட்டையில் நேற்று அதிகாலை நடந்த இந்த பயங்கரம் சம்பவம் பெரும் பரபரப்பை ஏற்படுத்தியுள்ளது. குற்றவாளியை கைது செய்ய கோரி பொதுமக்கள் சாலை மறியலில் ஈடுப்பட்டனர்.

சென்னை வண்ணாரப்பேட்டை சிமெட்ரிரோடு பெர்டானியா கார்டனை சேர்ந்தவர் லூர்து. லாரி லோடுமேன். இவரது மனைவி லட்சுமி (42). இவர்களுக்கு ஒரு மகன், ஒரு மகள் உள்ளனர். லூர்து குடியிருக்கும் வீட்டின் உரிமையாளர் ஜான் ஜெய்சிங் (40). வண்ணாரப்பேட்டை பகுதியில் பிரபல ரவுடி. இவர் மீது கொலை, கொள்ளை முயற்சி, அடிதடி உள்ளிட்ட பல்வேறு வழக்குகள் உள்ளன. பலமுறை சிறை சென்று வந்தவர்.

லூர்து எப்போதாவது ஒருமுறைதான் வீட்டுக்கு வருவார். அதனால் வீட்டு வாடகை உள்ளிட்ட எந்த விஷயமானாலும் லட்சுமியிடம்தான் ஜான் ஜெய்சிங் பேசுவார். இந்நிலையில், வீட்டை காலி செய்யும்படி கடந்த சில மாதங்களாக லட்சுமியிடம் கூறியிருக்கிறார் ஜான்ஜெய்சிங். அட்வான்ஸ் பணத்தை திருப்பி தந்தால் வீட்டை காலி செய்வதாக லட்சுமி தெரிவித்துள்ளார். ஆனால் இதற்கு ஜான் ஜெய்சிங் ஒப்புக்கொள்ள வில்லை. பணத்தை தரமுடியாது. வீட்டை காலி செய்யாவிட்டால் நடப்பதே வேறு என்று லட்சுமியை மிரட்டியிருக்கிறார்.

இந்நிலையில் நேற்று அதிகாலை 1.00 மணியளவில் லட்சுமி வீட்டுக்கு போதையில் 2 பேருடன் ஜான்ஜெய்சிங் வந்து கதவை தட்டினார். தூக்க கலக்கத்தில் கதவை திறந்தார் லட்சுமி. உடனே மறைத்து வைத்திருந்த அரிவாளை எடுத்து லட்சுமியை சரமாரியாக வெட்டினார் ஜான்ஜெய்சிங். ரத்த வெள்ளத்தில் விழுந்தார் லட்சுமி. சத்தம் கேட்டு ஓடிவந்து தடுத்த பக்கத்து வீட்டு பெண் அம்முலுவுக்கும் (35) வெட்டு விழுந்தது. பின்னர், கதவை ஞீட்டிவிட்டு, அங்கிருந்து 3 பேரும் தப்பி சென்றனர். இதுகுறித்து அக்கம்பக்கத்தினர் போலீசுக்கு தகவல் கொடுத்தனர். வண்ணாரப்பேட்டை துணை கமிஷனர் சேகர், உதவி கமிஷனர் குமார், இன்ஸ்பெக்டர் கோபாலகுரு மற்றும் போலீசார் சம்பவ இடத்துக்கு விரைந்தனர்.

ரத்த வெள்ளத்தில் கிடந்த லட்சுமி மற்றும் அம்முலுவை ஸ்டான்லி மருத்துவமனைக்கு அனுப்பி வைத்தனர். டாக்டர் பரிசோதித்து பார்த்துவிட்டு, லட்சுமி இறந்துவிட்டதாக தெரிவித்தார். அம்முலுவுக்கு தீவிர சிகிச்சை அளிக்கப்பட்டு வருகிறது.

இன்ஸ்பெக்டர் கோபாலகுரு வழக்கு பதிந்து விசாரணை நடத்தி வருகிறார். தலைமறைவான ஜான் ஜெய்சிங் உள்ளிட்ட 3 பேரை தனிப்படை போலீசார் தேடி வருகின்றனர்.

லட்சுமி கொலை செய்யப்பட்டதை அறிந்த அப்பகுதி மக்கள், கொலையாளிகளை கைது செய்யக்கோரி நேற்று காலை 8.30 மணியளவில் சிமெட்ரி சாலையில் திடீர் சாலை மறியலில் ஈடுபட்டனர். 300 பெண்கள் உள்பட 500 பேர் மறியலில் பங்கேற்றனர். இதனால் போக்குவரத்து பாதிக்கப்பட்டது. தகவல் அறிந்து வண்ணாரப்பேட்டை போலீசார் சம்பவ இடத்துக்கு விரைந்தனர். கொலையாளிகளை விரைவில் கைது செய்வதாக போலீசார் உறுதி கூறியதை அடுத்து மறியல் கைவிடப்பட்டது.

தினபூமி!