போக்குவரத்து சங்க அங்கீகார தேர்தல்

போக்குவரத்து சங்க அங்கீகார தேர்தல்

போக்குவரத்து தொழிற்சங்க அங்கீகார தேர்தலில், தி.மு.க.வின் தொழிலாளர் முன்னேற்ற பேரவை 70 சதவீத வாக்குகளைப் பெற்று அபார வெற்றி பெறும் நிலையில் உள்ளது.

அரசுடன் ஊதிய ஒப்பந்த பேச்சுவார்த்தையில் பங்கேற்கும் போக்குவரத்துக் கழக தொழிற்சங்கத்தை அங்கீகாரம் செய்வதற்கான தேர்தல் தமிழகத்தில் உள்ள அனைத்து போக்குவரத்துக் கழகப் பணிமனைகளிலும் 2 தினங்களுக்கு முன் நடைபெற்றது.

இதில் தி.மு.க. தொழிற்சங்கமான தொழிலாளர் முன்னேற்ற பேரவை (எல்.பி.எப்), இடது கம்யூனிஸ்டு கட்சியின் தமிழ்நாடு அரசு போக்குவரத்து ஊழியர் சம்மேளனம் (சி.ஐ.டியூ), அ.தி.மு.க. தொழிற்சங்கமான அண்ணா தொழிற்சங்கம், வலது கம்யூனிஸ்டு கட்சியின் தமிழ்நாடு போக்குவரத்து கழகங்களின் தொழிலாளர்கள் சம்மேளனம் (ஏ.ஐ.டியு.சி), காங்கிரஸ் கட்சியின் போக்குவரத்து தொழிலாளர் சம்மேளனம் (ஐ.என்.டி.யு.சி) உள்ளிட்ட 12 தொழிற்சங்கங்கள் தேர்தலில் போட்டியிட்டன.

தே.மு.தி.க. தொழிற்சங்கம் அ.தி.மு.க. அண்ணா தொழிற்சங்கத்திற்கு ஆதரவு அளித்தது. விடுதலை சிறுத்தைகள், பாட்டாளி மக்கள் கட்சி ஆதரவு தொழிற்சங்கத்தினர் தங்கள் பலத்தைக் காட்ட தனியாக போட்டியிட்டன. இதில் போக்குவரத்து தொழிலாளர்கள் 1 லட்சத்து 38 ஆயிரம் பேர் வாக்களித்தனர். 96 சதவீதம் வாக்குகள் பதிவாகி இருந்தன.

அனைத்துப் பணிமனைகளிலும் பதிவான வாக்குகள் குரோம்பேட்டையில் உள்ள மாநகர போக்குவரத்துக் கழக மாநில பயிற்சி மையத்தில் பலத்த காவல்துறை பாதுகாப்புடன் வைக்கப்பட்டு வாக்குகள் எண்ணும் பணி சனிக்கிழமை காலை முதல் நடைபெற்றது.

ஓய்வு பெற்ற உயர்நீதிமன்ற நீதிபதி அப்துல்ஹாதி மேற்பார்வையில் வாக்குகள் எண்ணும் பணி நடைபெற்றது. தி.மு.க. தொழிற்சங்கமான தொழிலாளர் முன்னேற்ற பேரவை (எல்.பி.எப்), இடது கம்யூனிஸ்டு கட்சியின் தமிழ்நாடு அரசு போக்குவரத்து ஊழியர் சம்மேளனம் (சி.ஐ.டி.யூ), ஆகிய சங்கங்கள் இடையே பலத்த போட்டி நிலவியது. நேற்று இரவு 3 சுற்றுகள் எண்ணிய நிலையில் திமுக தொழிலாளர் முன்னேற்ற பேரவை 70 சதவீத வாக்குகள் பெற்று முன்னிலை பெற்றிருந்தது.

3 சுற்றுகள் வாக்கு எண்ணிய நிலையில் சங்கங்கள் பெற்ற ஓட்டுகள் வருமாறு:-

தொழிலாளர் முன்னேற்ற பேரவை (எல்.பி.எப்)-23165

தமிழ்நாடு அரசு ஊழியர் சம்மேளனம் (சி.ஐ.டி.யூ.)-6602

அண்ணா தொழிற்சங்கம் (அ.தி.மு.க.)-4615

மற்ற தொழிற்சங்கங்கள் குறைந்த வாக்குகளே பெற்றிருந்தன. இன்னும் 13 சுற்றுகள் எண்ண வேண்டிய நிலையில் முடிவுகள் இன்று தெரியும் என தேர்தல் வாக்கு எண்ணிக்கை மைய அதிகாரிகள் தெரிவித்தனர். தி.மு.க. தொழிலாளர் முன்னேற்ற பேரவை வெற்றி பெறுவது உறுதியானதை தொடர்ந்து திமுக தொழிற்சங்கத்தினர் மகிழ்ச்சி தெரிவித்தனர்.

முதல் முதல் தொழிற்சங்கத்தை நிறுவியவர் தமிழ்த்தென்றல் திரு .வி. க என்று நினைக்கிறேன். சரியா.

நல்ல பகிர்வுக்கு நன்றி மோகன்.