'திருமதி' ஜெயலலிதா' vs 'மைனாரி்ட்டி' கருணாநிதி

'திருமதி' ஜெயலலிதா என்று கூறிய கருணாநிதியை கண்டித்து அ.தி.மு.க. ஆர்ப்பாட்டம்!

ஜெயலலிதாவை திருமதி ஜெயலலிதா என்று கூறிய கருணாநிதியை கண்டித்து வருகிற ஆகஸ்ட்-18 தேதி அ.தி.மு.க. ஆர்ப்பாட்டம் நடத்தவுள்ளது.

இதுகுறித்து அ.தி.மு.க.பொதுச்செயலாளர் ஜெயலலிதா விடத்துள்ள அறிக்கையில்…''’’மங்கையராகப் பிறப்பதற்கே நல்ல மாதவம் செய்திட வேண்டும் அம்மா' என்று பெண்ணின் உயர்வு பற்றி கவிமணி தேசிய விநாயகம் பிள்ளை பாடினார்.

மாதர் தம்மை இழிவு செய்யும் மடமையைக் கொளுத்துவோம்' என்று முழங்கினார் மகாகவி பாரதியார். இப்படி பெண்மையை போற்றியவர்கள் பலர் வாழ்ந்த தமிழ்நாட்டில், பெண் இனத்தை இழிவுப்படுத்தும் வகையில் முதலமைச்சர் கருணாநிதி தொடர்ந்து பேசி வருவது பெண் இனத்திற்கு இழைக்கப்படும் மிகப்பெரிய கொடுமையாகும். அண்மையில் பத்திரிகையாளர்களை சந்தித்த முதலமைச்சர் கருணாநிதி, என்னை ’திருமதி ஜெயலலிதா' என்று கொச்சைப்படுத்தி கேலி செய்து பேட்டி அளித்திருக்கிறார்.


ஏன் திருமதி ஜெயலலிதா' என்று சொல்கிறீர்கள்? என்று பத்திரிகையாளர்கள் கேட்டதற்கு "மைனாரிட்டி அரசு' என்று அவர் சொல்கிற வரை இப்படித் தான் சொல்வேன்' என்று பதில் அளித்து இருக்கிறார் கருணாநிதி.


பெரும்பான்மை இல்லாத அரசை "மைனாரிடடி அரசு' என்று அழைப்பது நடைமுறையில் உள்ள ஒன்று தான். தமிழ்நாடு சட்டமன்றப் பேரவையில் திமுகவிற்கு பெரும்பான்மை இல்லாததால், அதை மைனாரிட்டி திமுக அரசு என்று நான் குறிப்பிடுகிறேன். உண்மை நிலையை விளக்கிச் சொல்வதில் தவறு ஏதுமில்லை.


மைனாரிட்டி திமுக அரசு என்று நான் சொல்வதன் காரணமாக என்னை திருமதி ஜெயலலிதா என்ற தான் குறிப்பிடுவேன் என்று கருணாநிதி சொல்வது மொட்டைத் தலைக்கும் முழங்காலுக்கும் முடிச்சு போடுவது போல் உள்ளது. என்னை இழவுபடுத்துவதாக, கேலி செய்வதாக நினைத்துக் கொண்டு கருணாநிதி இது போன்று பேட்டி அளித்திருக்கிறார். கடவுள் உட்பட அனைத்துத் தலைவர்களையும் கொச்சைப்படுத்தி பேசுவது, கேலி செய்வது, கிண்டல் செய்வது கருணாநிதியின் வாடிக்கை.


அதனால், என்னை இழிவுப்படுத்திப் பேசியதை நான் பெரிதாக எடுத்துக் கொள்ளவில்லை. அதைப் பற்றி எனக்கு கவலையும் இல்லை. என்னை இழவுப்படுத்துவதாக நினைத்துக் கொண்டு கருணாநிதி பேசி வருவதும், பேட்டி அளித்திருப்பதும் பெண் இனத்தையே இழிவுப் படுத்தும் வகையில் அமைந்துள்ளது.


எனவே, பெண்மையை, பெண் இனத்தை கேலி செய்யும் விதமாக, இழிவுப்படுத்தும் விதமாக, கொச்சைப்படுத்தும் விதமாக தொடர்ந்து பேசிவரும் திமுக அரசின் முதலமைச்சர் கருணாநிதியை கண்டித்து, அதிமுக வட சென்னை மாவட்டக் கழகத்தின் சார்பில் 18.8.09 செவ்வாய்க்கிழமை அன்று காலை 9.30 மணிக்கு, சென்னை மாவட்ட ஆட்சியர் அலுவலகம் முன்பு முழுவதுமாக மகளிர் மட்டுமே பங்கேற்கும் மாபெரும் கண்டன ஆர்ப்பாட்டம் நடைபெறும்.

இந்தக் கண்டன ஆர்ப்பாட்டம், கழக மகளிர் அணிச் செயலாளர் பா.வளர்மதி தலைமையிலும், வட சென்னை மாவட்ட செயலாளர் பிகே.சேகர்பாபு முன்னிலையிலும் நடைபெறும்’’என்று ஜெயலலிதா கூறியுள்ளார்.