நேற்றுப் பிறந்தவனை இன்று வாழ்த்தினேன்

by **kirikasan** Sat Nov 27, 2010 1:20 pm

சித்திரத் தேரினில் செவ்வொளிஆதவன் இத்தரைவந்ததினம்
கொத்துமலர்களை கூவிஎறிந்துமே பொற்கவி பாடுங்கடி
சத்தியதேவனும் கட்டளை போட்டிட நித்திலம் கண்டதினம்
சொத்தென கொண்டதை கையிருதட்டியே சுற்றிநின்றாடுங்கடி

செத்து மடத்தனம் கோழை பயம்குணம் விட்டுமேநாம் செழிக்க
சித்தம்மெடுத்தொரு செம்மொழிக்காவலன் மொட்டெனப்பூத்தானடி
பொத்துபொத்துஎன பொய்யர்பகைவரும் விட்டுதரைதனிலே
முத்தமிடவைத்த பத்தரைமாற்றுப்பொன் கத்திப் பிறந்தானடி

எத்தனை தூரமெம் இன்னல்தரும்பகை விட்டு தலைதெறிக்க
புத்தரை கூவியழைத்துப் பின்னோடிய வித்தைபுரிந்தானடி
வித்தெனபூமி விழுந்த மறமெடு மைந்தர் துணைபுரிய
சத்தமிட்டேபகைதம்மை விரட்டிய அற்புத வேந்தனடி

சுட்டனல் கண்டுமே எத்தனைநாடுகள் சித்தமிழந்தனவோ
கெட்டுமனம் ஒரு மத்தம்பிடித்தெமை சுற்றி எழுந்தனவோ
இட்டு பகைகொண்ட இன்னல் தனுக்கவன் என்னதான் செய்வானடி
விட்டுவிடு துக்கம் வெய்யோன் விடியட்டும் விண்ணிலெழுவானடி