மீண்டும் குண்டுகளை வீசி பரபரப்பாக்கியது வடகொரியா:தென்கொரியாவிற்கு எச்சரிக்கை

சியோல்:தென்கொரியாவுடன் அமெரிக்கா மேற்கொண்டுள்ள கூட்டு ராணுவப் பயிற்சியை எதிர்க்கும் வடகொரியா, நேற்று மீண்டும் தென்கொரிய எல்லை அருகில் குண்டுகளை வீசியது.சமீபத்தில் தென்கொரியத் தீவு ஒன்றில் வடகொரியா திடீரென குண்டுகளை வீசி தாக்கியது. இதில், அத்தீவைச் சேர்ந்த நான்கு பேர் பலியாயினர்; 18 பேர் காயம் அடைந்தனர். அங்கிருந்த வீடுகளும், காடுகளும் தீயில் கருகின.

இச்சம்பவத்தையடுத்து, அமெரிக்கா தன் விமானந்தாங்கி போர்க்கப்பலான "ஜார்ஜ் வாஷிங்டன்'னை, ஜப்பானின் டோக்கியோ துறைமுகத்தில் இருந்து சியோலுக்கு அனுப்பி வைத்தது. நாளை முதல் அமெரிக்க - தென்கொரிய ராணுவங்கள் அங்கு கூட்டுப் பயிற்சி மேற்கொள்ள இருக்கின்றன.ஆனால், இப்பயிற்சியை எதிர்த்து வரும் வடகொரியா நேற்று மீண்டும் தென்கொரியா வுக்கு கடும் எச்சரிக்கை விடுத்துள்ளது.

அதில், "தென்கொரியாவுடன் அமெரிக்கா மேற்கொள்ளும் கூட்டு ராணுவப் பயிற்சி, கொரிய தீபகற்பத்தில் போரை மூட்டி விடும். வடகொரிய மக்களும், ராணுவமும் கடும் கோபத்தில் உள்ளனர். தங்கள் வீரத்தைக் காண்பிக்க தயார் நிலையில் இருக்கின்றனர்.மோதலைத் தீவிரப்படுத்தினால் போரில் தான் முடியும்; நெருப்போடு விளையாடுபவன் அதனாலேயே அழிந்து போவான்' என்று தெரிவிக்கப்பட்டுள்ளது.மேலும், அமெரிக்க ராணுவ தளபதி ஜெனரல் வால்டர் ஷார்ப், வடகொரியா தாக்கிய தீவுக்குச் சென்று பார்வையிட்டதும் வடகொரியாவுக்கு எரிச்சலூட்டி யுள்ளது.

இதற்கிடையில் நேற்று வடகொரிய ராணுவம், தென்கொரிய எல்லைக்கருகில் சில குண்டுகளை வீசியது. "இது, வடகொரியாவின் ராணுவப் பயிற்சி மட்டுமே.மேலும் இந்தப் பயிற்சியின் போது தென்கொரிய எல்லைக்குள் குண்டுகள் விழவில்லை' என்று தென்கொரியா கூறியுள்ளது.

புதிய அமைச்சர் பொறுப்பேற்பு: தென்கொரிய ராணுவ அமைச்சர் ஜெனரல் கிம் டே யங், தன் பதவியை ராஜினாமா செய்துள்ளார். கடந்த மே மாதம், வடகொரியா எல்லைக்கருகில், தென்கொரிய கடற்படைக் கப்பல் ஒன்று மூழ்கியது. அதில் இருந்த 46 வீரர்களும் பலியாயினர்.இச்சம்பவத்திற்கு பொறுப்பேற்று கிம் தன் பதவியை ராஜினாமா செய்ய முன்வந்தார். எனினும் அப்போதைக்கு அவரது ராஜினாமா தள்ளி வைக்கப்பட்டது.சமீபத்தில் வடகொரியா நடத்திய தாக்குதலுக்குப் பொறுப்பேற்று இப்போது அவர் ராஜினாமா செய்துள்ளார். தென்கொரிய அதிபர் லீ மியுங் பாக் அவரது ராஜினாமாவை ஏற்றுக் கொண்டார். இதையடுத்து, புதிய அமைச்சராக ஜெனரல் கிம் க்வான் ஜிங் பொறுப்பேற்றுக் கொண்டார்.

தினமலர்!