வான் நிலா... நீ வா உலா!

bparthasarathi · bparthasarathi Thu 12 Jun 2014 - 17:03

வான் நிலா... நீ வா உலா!

வான் நிலா
இன்று வானிலை
காரணம் வானிலை.

வான் நிலா
நீயிலா
வான் வானிலை
வா நிலை.

வானிலா
வான் நிலா
கொஞ்சம் வா நிலா
வசந்தம் தா நிலா.

தண்ணிலா
நீ அகல் நிலா
காரிருள் அகல் நிலா
அகற்றி
அகலாய் நிலா.

வெண்ணிலா
நீ வா நிலா
வந்து வானிலே
காய் நிலா
காய்த்து எம் பூமியைக்
காய் நிலா.

பொன்னிலா
நீ பூ நிலா
வந்து வானிலே
நீ பூ நிலா.

வெள்ளி நிலா
உனை சுற்றிதான்
எத்தனை வெள்ளி நிலா.

தங்க நிலா
எமக்கு இடம் தா...
தங்க நிலா.

சன்னலில்
முகம் சாய்த்து
சங்கடத்தில் என்னவள்.

வா நிலா
வஞ்சியவள்
வட்ட முகம் காண் நிலா
கண்டு நீ நாண் நிலா
முகிலிடை
உன் ஒளி மறைத்து
ஒளி நிலா
மகிழ்வாள் என் நிலா.

அடுத்த வீட்டு முற்றத்தில்
அன்னையொருத்தி
ஆவலோடு காத்திருக்கிறாள்
நிலாச் சோறூட்ட...
வா நிலா
உன் வருகை
தா நிலா.

ஆமாம்!
அழகே வெண்ணிலா
களங்கம் உன்னிலா;
இல்லை...
காண்பவர் கண்ணிலா.

எண்ணிலா
விண்மீன் காண்
விண்ணிலே வளர் நிலா
வா நிலா
வந்து நின்
வெளிச்சம் பாய் நிலா.

உன்பால்
கொண்ட அன்பால்
வரைகிறேன் இப்பா நிலா
வா நிலா
நீ
வான் வீதியில்
வா உலா.

- 'தமிழ் நேசன்'
பா.பார்த்தசாரதி,