எம்.எல்.ஏக்களில் 2 பேர் புறக்கணிப்பு-ராமதாஸுக்கு அதிர்ச்சி!

ரபீக் · ரபீக் Mon Nov 22, 2010 5:22 am

2011ல் ஆட்சியைப் பிடித்து விடுவோம் என்று வீர முழக்கமிட்ட டாக்டர் ராமதாஸுக்கு அதிர்ச்சி அளிக்கும் வகையில் புதுச்சேரியில் உள்ள 3 பாமக எம்.எல்.ஏக்களில் 2 பேர் டாக்டர் ராமதாஸ் கலந்து கொண்ட நிகழ்ச்சியை புறக்கணித்தது பாமக வட்டாரத்தில் அதிர்ச்சி அலைகளை ஏற்படுத்தியுள்ளது.

புதுச்சேரி சென்றிருந்த டாக்டர் ராமதாஸ், அங்கு நடந்த கட்சி செயற்குழுக் கூட்டத்தில் பங்கேற்றார். பின்னர் முதலியார்பேட்டையில் அமைக்கப்பட்டுள்ள புதிய கட்சி தலைமை அலுவலகத்தைத் திறந்து வைத்தார்.

இந்த இரண்டு நிகழ்ச்சிகளையும் பாமக எம்.எல்.ஏக்களான அருள்முருகன், பன்னீர்செல்வம் ஆகியோர் கலந்து கொள்ளாமல் புறக்கணித்தனர். இன்னொரு எம்.எல்.ஏவும் சட்டமன்ற பாமக தலைவருமான ஆனந்தராமன் மட்டுமே கலந்து கொண்டார்.

2 எம்.எல்.ஏக்கள் புறக்கணிப்பை மேற்கொண்டதற்கு கோஷ்டிப் பூசலே காரணமாம். முன்பு பாமக மாநில செயலாளராக இருந்தவர் பேராசிரியர் ராமதாஸ். இவர் எம்.பியாகவும் இருந்தார். கடந்த லோக்சபா தேர்தலோடு அரசியலுக்கு முழுக்குப் போட்டு விட்டு மீண்டும் பேராசிரியர் பணிக்குப் போய் விட்டார்.

அவர் மாநிலச் செயலாளராக இருந்தபோது, எம்.எல்.ஏக்கள் பன்னீர் செல்வம், அருள்முருகன், ஆனந்தராமன் ஆகியோரை அரவணைத்து ஒருங்கிணைத்து செயல்பட்டு வந்தார். ராமதாஸ் விலகலுக்குப் பின்னர் ஆனந்தராமனை மாநிலச் செயலாளராக்கியது கட்சி மேலிடம். அவர் வந்தது முதல் மற்ற இரு எம்.எல்.ஏக்களையும் புறக்கணிக்க ஆரம்பித்தார்.

எந்த நிகழ்ச்சிக்கும் அவர்களை சரிவர கூப்பிடுவது இல்லை. நோட்டீஸ்கள், போஸ்டர்களில் பெயர்கள் இடம் பெறாமல் தீவிரமாக பார்த்துக் கொண்டார். இதனால் கடுப்பான அருள் முருகனும், பன்னீர் செல்வமும் எந்தக் கூட்டத்திற்கும் போவதில்லை.

இந்த நிலையில் கட்சி நிறுவனரான டாக்டர் ராமதாஸ் கலந்து கொண்ட நிகழ்ச்சியையே அவர்கள் புறக்கணித்து விட்டதால் கட்சித் தலைமை அதிர்ச்சி அடைந்துள்ளது.

புதுச்சேரியில் ஆட்சியைப் பிடிப்போம் என்று டாக்டர் ராமதாஸ் கூறி ஒரு நாள் கூட ஆகாத நிலையில், கட்சியின் 2 எம்.எல்.ஏக்கள் ராமதாஸையே புறக்கணித்திருப்பது புதுவை பாமக வட்டாரத்தில் அதிர்ச்சியை ஏற்படுத்தியுள்ளது.
தட்ஸ்தமிழ்