கைதாகும் அச்சம் தொடர்கிறது : மியான்மர் குறித்து சான் சூச்சி தகவல்

மீண்டும் எந்த நேரத்திலும் கைது செய்யப்படலாம் என்ற எண்ணத்துடன் வாழ்ந்து கொண்டிருக்கிறேன் என, மியான்மர் நாட்டின் ஜனநாயக தலைவர் அவுங் சான் சூச்சி தெரிவித்துள்ளார்.
மியான்மர் நாட்டின் தேசிய ஜனநாயக லீக் கட்சித் தலைவர் அவுங் சான் சூச்சி, 15 ஆண்டு காலம் வீட்டுச் சிறையில் இருந்தார். கடந்த வாரம் விடுதலை செய்யப்பட்ட அவர், தன்னுடைய ஆதரவாளர்களை சந்தித்து வருகிறார்.

அமெரிக்க செய்தி சேனலுக்கு அளித்த பேட்டியில் இது குறித்து அவுங் சான் சூச்சி கூறியதாவது: என்னை போன்ற அரசியல் கைதிகள் ஏராளமானவர்கள் சிறையில் அடைக்கப்பட்டுள்ளனர். அவர்களை விடுதலை செய்ய வேண்டும் என்பது தான், என்னுடைய தற்போதைய கோரிக்கை. ராணுவ அரசுடன் இது குறித்து பேசுவேன். ராணுவ ஆட்சியாளர்கள் என்பதால் அவர்களுக்கு உத்தரவிட்டு தான் பழக்கம். எனவே, அவர்கள் என்னுடன் பேச்சு வார்த்தைக்கு ஒத்து வருவரா? என்பது சந்தேகமாக உள்ளது.

நாங்கள் தேர்தலில் போட்டியிட்டிருந்தாலும் ஆட்சி முறையில் மாற்றம் ஏதும் ஏற்படாது என்பதால் தான், தேர்தலை புறக்கணித்தோம். நாட்டின் எதிர்காலத்தை நிர்ணயிக்கும் அதிகாரம் மக்களுக்கு அளிக்கப்பட வேண்டும். தற்போது நாட்டில் வறுமை தாண்டவமாடுகிறது. ஏழ்மையான நாடுகளின் பட்டியலில் மியான்மர் உள்ளது. அது மட்டுமல்லாது மற்ற நாடுகளிடமிருந்து மியான்மர் தனிமைப்படுத்தப்பட்டுள்ளது. இதற்கெல்லாம் ராணுவ ஆட்சியாளர்கள் வருத்தப்பட்டதாக தெரியவில்லை. சீனாவைப் போல பொருளாதார முன்னேற்றம் தேவை தான். ஆனால், அந்த நாட்டை விட மியான்மரில் மனித உரிமை மதிக்கப்பட வேண்டும் என விரும்புகிறேன்.
தற்போது சிலருக்கு பேச்சு வார்த்தை என்ன? என்பது தெரியவில்லை. எங்களுக்கு என்ன தேவை என்பதை சொல்வோம். அவர்களுக்கு என்ன வேண்டும் என்பதை தெரிவிக்க வேண்டும். இப்படி தான் பேச்சு வார்த்தை இருக்க வேண்டும். ஆனால், இதெல்லாம் ராணுவ ஆட்சியாளர்கள் செய்வரா? என்பது தான் தற்போதைய பிரச்னை.

மீண்டும் என்னை எப்போது வேண்டுமானாலும் ஆட்சியாளர்கள் கைது செய்யலாம் என்ற எண்ணத்துடன் தான் வாழ்ந்து கொண்டிருக்கிறேன். ஏனென்றால், முன்னர் பலமுறை நான் திடீரென கைது செய்யப்பட்டிருக்கிறேன். டில்லியில் உள்ள ஸ்ரீராம் கல்லூரியில் படித்த போது கற்ற தியான பயிற்சியை, சிறையில் இருந்த போது மேற்கொண்டேன். இவ்வாறு அவுங் சான் சூச்சி கூறினார்

விடுப்பு குழுமம்