ஜெகன்மோகன் டிவி:சோனியா,மன்மோகன்சிங் பற்றி பேசிய கடுமையான விமர்சனங்கள்

மறைந்த ஆந்திர மாநில முன்னாள் முதல்-மந்திரி ராஜசேகரரெட்டியின் மகன் ஜெகன்மோகன் ரெட்டி.

ஜெகன்மோகன்ரெட்டி தனது தந்தையின் மறைவின் போது தற்கொலை செய்து கொண்ட தொண்டர்களின் குடும்பங்களை சந்திப்பதற்காக ஆறுதல் யாத்திரை மேற்கொண்டார். அவரது தன்னிச்சையான யாத்திரைக்கு காங்கிரஸ் மேலிடம் தடை விதித்தது. ஆனால் தடையை மீறி ஜெகன் மோகன்ரெட்டி ஆறுதல் யாத்திரை மேற் கொண்டார். இதில் ஆயிரக்கணக்கான தொண்டர்கள் கலந்து கொண்டனர்.

ஜெகன் மோகன் ரெட்டியின் யாத்திரையில் கட்சி நிர்வாகிகள், சில மந்திரிகள், எம்.எல்.ஏ.க்களும் பங்கேற்றனர்.

ஜெகன்மோகன் தனது ஆறுதல் யாத்திரையின் போது முதல்வர் ரோசைய்யா மற்றும் மாநில காங்கிரஸ் நிர்வாகிகளை கடுமையாக தாக்கி பேசினார்.

ஆனால் காங்கிரஸ் தலைவர் சோனியாவைப் பற்றியோ, பிரதமர் மன்மோகன்சிங் பற்றியோ விமர்சனம் செய்வதை தவிர்த்தார்.

ஜெகன்மோகன் தற்போது முதல் முறையாக தான் நடந்தும் சாக்ஷி டெலிவிஷன் மூலமாக சோனியாவையும், பிரதமர் மன்மோகன்சிங்கையும் விமர்சனம் செய்து இருக்கிறார்.“சாக்ஷி” டெலிவிஷனில் கடந்த வெள்ளிக்கிழமை அரசியல் விமர்சனம் என்ற நிகழ்ச்சி ஒளிபரப்பானது.

விவாதத்தில் கலந்து கொண்டவர்கள் சோனியாவை பலம் இழந்த தலைவர் என்றும் மன்மோகன்சிங் ரப்பர் ஸ்டாப் என்றும் கடுமையாக விமர்சனம் செய்தனர். அதன் விவரம் வருமாறு:-

காங்கிரஸ் தலைவர் சோனியா இந்த நாட்டில் ஜனாதிபதியோ, பிரதமரோ அல்ல. ஆனால் அவர் தான் மத்திய அரசை இயக்கி வருகிறார்.

பிரதமர் மன்மோகன்சிங் ரப்பர் ஸ்டாம்ப் போல் செயல்பட்டு வருகிறார். அவரால் தன்னிச்சையான முடிவுகள் எதுவும் எடுக்க முடியாது.

சோனியா சிறந்த பேச்சாற்றல் உள்ளவர் அல்ல. அவர் ஒரு பலவீனமான தலைவர். அவருக்கு மக்கள் செல்வாக்கு குறைவாகவே உள்ளது.

காங்கிரஸ் தலைமையிலான ஐக்கிய முற்போக்கு கூட்டணி அரசு பல்வேறு ஊழல் புகாரில் சிக்கி உள்ளது. இதனால் அரசுக்கு அவப்பெயர் ஏற்பட்டு உள்ளது. மேற்கண்டவாறு அந்த நிகழ்ச்சியில் தெரிவிக்கப்பட்டது.

ஜெகன்மோகன் டி.வி. யில் சோனியாவை நேரடியாக தாக்கி விமர்சனம் செய்து இருப்பது ஆந்திராவில் பெரும் பரபரப்பை ஏற்படுத்தி உள்ளது.இதன் மூலம் ஜெகன்மோகன் சோனியாவுடன் நேரடி மோதலுக்கு தயாராகி விட்டார் என்று பேசப்படுகிறது.

இதற்கிடையே சோனியாவை விமர்சனம் செய்ததற்கு முதல்- மந்திரி ரோசைய்யா மற்றும் காங்கிரஸ் தலைவர்கள் கண்டனம் தெரிவித்து உள்ளனர். சோனியாவை விமர்சனம் செய்த சாக்ஷி டி.வி.யை மக்கள் புறக்கணிக்க வேண்டும் என்றும் ரோசைய்யா கூறினார்.

ஜெகன்மோகனை கண்டித்து ஆந்திராவின் பல்வேறு இடங்களில் காங்கிரசார் ஆர்ப்பாட்டத்தில் ஈடுபட்டனர்.

நக்கீரன்!

காங்கிரஸ் என்றாலே உள்குழபப்ம் அடிதடி பிரபலமான ஒன்று தான்..! வியப்பதற்கில்லை எதுவும்..!