வழிபாட்டில் நெல்!

by **சிவா** Sun Nov 21, 2010 12:27 am

சிற்பிகள் தெய்வச் சிலைகளை கல், செம்பு, வெள்ளி, ஐம்பொன் முதலான பல பொருள்களால் வடிக்கின்றனர். அப்போது கண்கள், மூக்கு, வாய் முதலிய சிறிய உறுப்புகளைத் துல்லியமாக அளப்பதற்கு எள்ளையும், நெல்லையும் அளவு கருவிகளாகப் பயன்படுத்துகின்றனர். இவை இரண்டுமே ஆன்மிகத்தில் மிகச் சிறந்த பொருள்களாம்.

நீட்டர் அளவுகள்

அணு 8 கொண்டது = 1 தேர்த்துகள், தேர்த்துகள் 8 கொண்டது = 1 இம்மி, இம்மி 8 கொண்டது = 1 எள்ளு, எள்ளு 8 கொண்டது = 1 நெல்லு, நெல்லு 8 கொண்டது = 1 பெருவிரல்.

(தேர்த்துகள் = தேர்ச்சக்கரத்தால் எழுகின்ற தூசி; இம்மி = மிக மிகச்சிறிய அளவு)

சிறிய பொருள்களை அளப்பதற்கு இவையே பொருத்தமானவை; ஏற்புடையவை.

உமி

திருநீறு: திருநீற்றின் மூலம் சாணம். மற்றும், அத்துடன் உமிக்குவியலை எரித்துச் சாம்பலாக்கித் திருநீற்றை உருவாக்குகின்றனர். எனவே, திருநீற்றின் ஒரு மூலமாகத் திகழ்கின்ற தனிச்சிறப்புடையது உமி.

சிலையில் சூடு: தெய்வச் சிலையைப் பிரதிட்டை செய்வதற்கு முன்னால் அதன் உள்ளே மறைந்து காணப்படுகின்ற இளஞ் சூட்டைத் தணிக்க வேண்டும். இதற்காக, அச்சிலையை, ஒரு மண்டலம் வரை நீருள் கிடத்துவர். இதனை ''நீர்ப்படை'' என்பர்.

அடுத்து, அச்சிலை நீருடன் ஊறிய உமிக் குவியலில், ஒரு மண்டலம் வரை, ஆழ்ந்திருக்க வேண்டும். சிலையில் அகச்சூடு அறவே தணிந்து விடுகிறது. சிலை பிரதிட்டை செய்யப்படுவதற்குரிய தகுதியையும் பெறுகிறது.

தவிடு

மதிப்பற்ற குழந்தை: வீட்டில் ஒரு குழந்தை இறந்து விட்டால், அது ஆவியாகி, தனக்குப் பின்னால் பிறந்த குழந்தையைத் தான் இறந்த அதே மாதத்தில், அதே நாளில் கொன்றுவிடும் என்று நம்புகின்றனர்.

இதற்குப் பரிகாரமாக, ஒருவரிடம் குழந்தையைக் கொடுத்து, தவிடும், உமியும் பரிவர்த்தனையாகக் கொடுத்து அக்குழந்தையை மீண்டும் பெற்றுக் கொள்கின்றனர். தவிடும், உமியும் போல அக்குழந்தை மதிப்பற்றது என்பது கருத்து. இச்சடங்கின் மூலம் அக்குழந்தை, ஆவியின் தாக்குதல் இல்லாமல், நீண்ட ஆயுளுடன் வாழும் என்ற நம்பிக்கை உண்டு.

தவிட்டுப்பானை: திருமண நாளன்று ''தவிட்டுப் பானையை உருட்டல்'' என்ற சடங்கினைச் சிலர் மேற்கொள்கின்றனர். அன்று, மணமகன் வீட்டில் மணமகள் ஒரு புதுப் பானையில் தவிட்டினைக் கொட்டித் துழாவ வேண்டும்.

மணமகளின் வருகையை மகாலட்சுமியின் வருகையாகக் கருதுகின்றனர். இவளது கையிலுள்ள தவிட்டுப்பானை, மகாலட்சுமி ஏந்தியுள்ள அமுத கலசத்துப் பொற்குடத்துக்கு நிகரானது. இதை உருட்டுவதன் மூலம் தானியங்களும், பொருள்களும், பிறவும் வீட்டில் செழிக்க வேண்டும் என்று மகாலட்சுமியை வேண்டுகின்றனர்.

அரிசி

அட்சதை: மஞ்சளும், அரிசியும் கலந்த கலவைக்கு அட்சை - மங்கல அரிசி என்பது பெயர். பல மலர்களுடன் கலந்த அட்சதை அர்ச்சனைக்கு ஏற்றது. இது மகாப்பிரசாதம்.

மணநாளன்று சபையினர் அட்சதையைத் தூவி மணமக்களை வாழ்த்துகின்றனர்.

மணமக்கள் மஞ்சளும், அரிசியும் போல் இணைந்து வாழவேண்டும். பொங்கும் மங்கலத்துடன், நெல் முதலான தானியச் செல்வங்களையும், மற்ற செல்வங்களையும் நிறையவே பெற்று வாழவேண்டும். இத்தகைய வாழ்த்துக் குறிப்புகள் அட்சதையால் புலனாகின்றன. அ+க்ஷதை=அழிவு இல்லாதது. மஞ்சளுடன் கலக்கும் அரிசி இருமுனைகளும் முரியாமல் கூராக இருக்கவேண்டும் என்பது சாத்திர மரபு.

அட்சதையை பெருமாள் வழிபாட்டின்போது எந்த முறையிலும் பயன்படுத்தக்கூடாது.

கலச அரிசி: நவராத்திரி கொலுவின் போதும், வரலட்சுமி விரத வழிபாட்டின் போதும் மகளிர் புனித கலசத்தை நிறுவுகின்றனர். கலசமும், தேங்காயும் மகாலட்சுமியின் வடிவமாகவே மதிக்கப்படுகின்றன; அலங்கரிக்கப்படுகின்றன.

தலைவாழை இலையை விரித்து, அதன்மீது பச்சரிசியைப் பரப்பி, நீரால் அல்லது பச்சரிசியால் நிரம்பிய கலசத்தை ஆடாமல், அசையாமல் பொருத்துகின்றனர். கலசம் மகாலட்சுமியானால், அவள் எழுந்தருள்கின்ற ஆசனமாகத் திகழ்கிறது பச்சரிசி.

கலசத்தை வழிபடுகின்றபோது, மகாலட்சுமியை நேர்முகமாகவும், பச்சரியையும், நீரையும் மறைமுகமாவும் வழிபடுகின்றனர். தாய்த்தெய்வ வழிபாட்டின் பின்னணியில் இயற்கை வழிபாடு உள்ளது.

மேலும், வீடுகளில் நடைபெறுகிற கணபதி ஹோமம், நவகிரகஹோமம் முதலிய ஹோமம் முதலிய ஹோமங்களிலும், கோவில் கும்பாபிடேகயாக சாலைகளிலும் பச்சரிசி மிகுதியாகப் பயன்படுவதைக் காணலாம்.

காரரிசி: பிரதோஷ நாளன்று, வெல்லத்துடன் கலந்து வேக வைத்த காரரரிசியை (சிவப்பரிசி) அல்லது பச்சரிசியை நந்திதேவரின் திருமுன் படைப்பது உத்தமம்.

முனைவர் டி.செல்வராஜ்