தேவகோட்டை அருகே பரபரப்பு - 6-ம் வகுப்பு மாணவியை கடத்த முயன்ற கும்பல்!

by **சிவா** Fri Nov 19, 2010 6:08 pm

தேவகோட்டை அருகே பரபரப்பு 6-ம் வகுப்பு மாணவியை கடத்த முயன்ற கும்பல் ஒருவனை பொதுமக்கள் பிடித்தனர்

சிவகங்கை மாவட்டம் தேவகோட்டை அருகே உள்ள புளியால் கிராமத்தை சேர்ந்தவர் தமிழரசன். இவர் அதே ஊரில் உள்ள பஞ்சாயத்து அலுவலகத்தில் கிளார்க்காக வேலை பார்த்து வருகிறார். இவரது மகள் அமரிஷா (வயது11). அங்குள்ள ஒரு தனியார் நடுநிலைப்பள்ளியில் 6-ம் வகுப்பு படித்து வருகிறார். தினமும் இவர் தனது வீட்டிலிருந்து தோழிகளுடன் பள்ளிக்கு நடந்தே சென்று வருவது வழக்கம்.

இந்த நிலையில் நேற்று காலை தனது பெற்றோரிடம் கூறிவிட்டு அமரிஷா பள்ளிக்கு புறப்பட்டு சென்றார். இதற்கிடையே சுமார் 20 முதல் 24 வயதுள்ள 3 வாலிபர்கள் நேற்று மாலை புளியால் கிராமத்திற்கு வந்தனர். அவர்கள் நேராக தமிழரசனின் வீட்டிற்கு சென்றுள்ளனர். அப்போது அவரது வீட்டின் கதவு பூட்டப்பட்டு இருந்தது. வீட்டிற்கு வெளியே கொடியில் தமிழரசன் மற்றும் அவரது மனைவியின் ஆடைகள் உலர்த்துவதற்காக தொங்க விடப்பட்டிருந்தன. அந்த உடைகளை சுருட்டி எடுத்துக் கொண்ட வாலிபர்கள் அங்கிருந்து அமரிஷா படிக்கும் பள்ளிக்கு சென்றனர்.

அங்கு வகுப்பறையில் இருந்த மாணவி அமரிஷாவை உறவினர் வந்திருப்பதாக கூறி வெளியே அழைத்து வந்தனர். அவர்கள் தாங்கள் வைத்திருந்த உடைகளை அமரிஷாவிடம் காட்டி உனது பெற்றோர் உன்னை அழைத்து வரச் சொன்னார்கள் என கூறி அங்கிருந்து அமரிஷாவை கடத்த முயற்சி செய்தனர். ஆனால் அவர்களது நட வடிக்கையில் சந்தேகம் ஏற்பட்டதால் அமரிஷாவின் தோழிகள் இதுபற்றி பள்ளி விளையாட்டுத்துறை ஆசிரியரிடம் சென்று கூறினர்.

இதற்கிடையே தங்கள் நடவடிக்கையில் சந்தேகம் வந்து விட்டதால் உஷாரடைந்த அந்த வாலிபர்கள் அங்கிருந்து தப்ப முயன்றனர். அதில் ஒருவனை பொதுமக்கள் சுற்றி வளைத்து பிடித்து மின் கம்பத்தில் கட்டி வைத்தனர். அவனை சரமாரியாக அடித்து உதைத்த பொதுமக்கள் தேவகோட்டை தாலுகா போலீசாருக்கு தகவல் தெரிவித்தனர். அதன்பேரில் விரைந்து வந்த போலீசார் பொது மக்கள் பிடித்து வைத்திருந்த வாலிபரை கைது செய்து விசாரணை நடத்தி வருகிறார்கள்.

இதில் அந்த வாலிபர் சென்னையை சேர்ந்தவர் என்று தெரியவந்துள்ளது. அவருடன் வந்த மற்ற 2 பேரையும் போலீசார் தீவிரமாக தேடி வருகின்றனர். பள்ளி வளாகத்திற்கு நுழைந்து மாணவியை கடத்த முயன்ற சம்பவம் தேவகோட்டை பகுதியில் பரபரப்பை ஏற்படுத்தியது.