பசியில்லா இந்தியா : செங்கோட்டையில் பிரதமர் உரை

by **சிவா** Sat Aug 15, 2009 11:42 am

புதுடெல்லி: பசியில்லா இந்திய தேசத்தை உருவாக்க அரசு உறுதிபூண்டுள்ளதாக, செங்கோட்டையில் மூவண்ணக் கொடியை ஏற்றி வைத்துப் பேசிய பிரதமர் மன்மோகன் சிங் தெரிவித்தார்.

நாடு முழுவதும் 63-வது சுதந்திர தின விழா உற்சாகமாகக் கொண்டாடப்பட்டு வருகிறது.

டெல்லியில் பலத்தப் பாதுகாப்புக்கு இடையே செங்கோட்டையில் நடந்த கோலாகல கொண்டாட்ட நிகழ்ச்சியில் மூவண்ணக் கொடியை ஏற்றி வைத்தார், பிரதமர் மன்மோகன் சிங்.

பின்னர், நாட்டு மக்களுக்கு அவர் உரையாற்றுகையில், "நாட்டில் விவசாயிகளின் நலனுக்கு முக்கியத்துவம் கொடுக்கும் வகையில், வறட்சி நிலையைப் போக்குவதற்கு உரிய நடவடிக்கைகள் மேற்கொள்ளப்பட்டு வருகிறது.

விலையேற்றத்தை கட்டுப்படுத்தும் வகையில் முழுமையான நடவடிக்கைகள் மேற்கொள்ளப்பட்டு வருகிறது.

அரசியல் உறுதித் தன்மை, வலுவான பொருளாதார நிலை ஆகியவற்றை இலக்காகக் கொண்டு அரசு முழுவீச்சில் நடைபோடுகிறது.

மதசார்பற்றதன்மையை தாரகமந்திரமாகக் கொண்டு, நாட்டின் ஒத்துழைப்பு மற்றும் நல்லிணக்கத்தில் புதிய அத்தியாயம் துவக்கப்படும் என்று உறுதி கூறுகிறேன்.

மக்கள் எங்களை முழுமையாக நம்பலாம். மக்களுக்குத் தேவையான அனைத்தையும் நிறைவேற்றுவதே அரசின் கடமை.

பன்றிக் காய்ச்சல் பீதி வேண்டாம்!

அனைத்து மாநில அரசுகளுடன் இணைந்து பன்றிக் காய்ச்சலைத் தடுப்பதற்கான அனைத்து நடவடிக்கைகளையும் மத்திய அரசு மேற்கொண்டு வருகிறது. நாட்டின் சில பகுதிகளில் பன்றிக்காய்ச்சல் பாதிப்பு மிகுதியாக இருப்பினும் மக்கள் யாரும் பீதியடைய வேண்டிய அவசியம் இல்லை.

மீண்டும் பசுமைப் புரட்சி!

இந்தியாவுக்கு மீண்டும் ஒரு பசுமைப் புரட்சி அவசியமாகிறது. நாட்டில் வறட்சி நிலையால் விவசாயிகள் மிகுந்த பாதிப்புக்கு ஆளாகியுள்ளனர். பருவமழை பெய்யாததன் காரணமான ஏற்படும் பாதக விளைவுகளை சரிசெய்வதற்கான முயற்சிகளில் அரசு முழு வீச்சில் ஈடுபட்டு வருகிறது. வேளாண் கடன் போன்றவற்றுக்கு முக்கியத்துவம் அளிக்கப்படும். பசியில்லா இந்தியா என்ற இலக்கை அடைவோம்.

வேளாண்துறையில் நான்கு சதவீத ஒட்டுமொத்த வளர்ச்சியை எட்டுவதற்கு மீண்டும் ஒரு பசுமைப் புரட்சி அவசியமாகிறது. இது, அடுத்த ஐந்து ஆண்டுகளில் நிறைவேற்றப்படும்.

சிறுபான்மையினரின் நலன் மற்றும் அவர்களது நலத்திட்டங்களுக்காக பல்வேறு திட்டங்களை அரசு செயல்படுத்தி வருகிறது.

தீவிரவாதத்துக்கு எதிரான நடவடிக்கை

மாநிலங்களில் உள்ள நக்சலைட்டுகளின் அச்சுறுத்தலை முழுவதும் நீக்க, மத்திய அரசு உறுதுணைபுரியும்.

நாட்டில் தீவிரவாதத்தையும் பயங்கரவாதத்தையும் அடியோடு ஒழிப்பதற்கு அரசு உறுதிபூண்டுள்ளது," என்றார் பிரதமர் மன்மோகன் சிங்.

செங்கோட்டையில் தொடர்ந்து 6வது ஆண்டாக, பிரதமர் மன்மோகன் சிங் கொடியேற்றியுள்ளது குறிப்பிடத்தக்கது.