நாடு முழுவதும் உச்சகட்ட பாதுகாப்பு! பயங்கரவாதிகளை சமாளிக்க தயார் நிலை

புதுடில்லி : இன்று நாட்டின் 63வது சுதந்திர தினம் கொண்டாடப்படுகிறது. டில்லி செங்கோட்டையில், பிரதமர் மன்மோகன் சிங் இன்று தேசியக் கொடியை ஏற்றிவைத்து சுதந்திர தின உரை நிகழ்த்துகிறார். சுதந்திர தின விழா கொண்டாட்டங்களின் போது, பயங்கரவாதிகள் அசம்பாவித சம்பவங்களில் ஈடுபடலாம் என்பதால், நாடு முழுவதும் உச்சகட்ட பாதுகாப்பு ஏற்பாடுகள் செய்யப்பட்டுள்ளன.

சுதந்திர தின கொண்டாட்டங்களின் போது, பயங்கரவாதிகள் தாக்குதல் நடத்தலாம் என, உளவு நிறுவனங்கள் இதுவரை எந்தவிதமான எச்சரிக்கையும் விடுக்கவில்லை. இருந்தாலும், அசம்பாவிதங்கள் எதுவும் நடந்து விடாமல் இருக்க, முன்னெச்சரிக்கையாக பல உஷார் நடவடிக்கைகள் மேற்கொள்ளப்பட்டுள்ளன.பிரதமர் மன்மோகன் சிங், தொடர்ந்து ஆறாவது ஆண்டாக டில்லி செங்கோட்டையில் இன்று கொடியேற்றி, சுதந்திர தின உரை நிகழ்த்த உள்ளார். இந்த நிகழ்ச்சியில் ஏராளமான வி.ஐ.பி.,களும் பங்கேற்பர் என்பதால், பாதுகாப்பு நிறுவனங்கள் மிகுந்த உஷார் நிலையில் கண்காணித்து வருகின்றன. செங்கோட்டையை சுற்றிலும் பாதுகாப்பு வளையம் அமைக்கப்பட்டுள்ளது. மேலும், 40க்கும் மேற்பட்ட கண்காணிப்பு கேமராக்கள் பொருத்தப்பட்டுள்ளன.

தேசிய பாதுகாப்புப் படையைச் சேர்ந்த குறிபார்த்துச் சுடுவதில் வல்லவர்களாக உள்ள வீரர்கள், செங்கோட்டையை சுற்றிலும் உள்ள உயரமான கட்டடங்களில் நிறுத்தப்பட்டுள்ளனர். சுதந்திர தின விழா நடைபெறும் போது, ராணுவ ஹெலிகாப்டர்களும் ரோந்துப் பணியில் ஈடுபடும். விழா நடக்கும் 90 நிமிடமும் செங்கோட்டையை சுற்றியுள்ள பகுதிகளில் விமானங்கள், ஹெலிகாப்டர்கள் பறக்க தடை விதிக்கப்பட்டுள்ளது. செங்கோட்டை மட்டுமின்றி, பார்லிமென்ட் வளாகம், சர்வதேச விமான நிலையம், ரயில் நிலையங்கள், வெளிமாநில பஸ்கள் வந்து செல்லும் பஸ் நிலையங்கள், மெட்ரோ ரயில் நிலையங்கள் போன்றவற்றிலும், டில்லி நகர தெருக்களிலும் ஏராளமான போலீசார் துப்பாக்கிகளுடன் தீவிர கண்காணிப்பில் ஈடுபட்டுள்ளனர். விரைவு அதிரடிப்படையினர் உட்பட விரைவாக தாக்குதல் நடத்துவதில் கைதேர்ந்த படை வீரர்களும் பாதுகாப்புப் பணியில் ஈடுபடுத்தப்பட்டுள்ளனர்.

டில்லி நகரின் எல்லைகளில் தீவிர வாகன சோதனை மேற்கொள்ளப்பட்டு வருகிறது. நேற்று இரவு முதல், சரக்கு வாகனங்கள் தலைநகருக்குள் நுழைய அனுமதிக்கப்படவில்லை. மற்ற நாடுகளில் இருந்து பயங்கரவாதிகள் ஊடுருவிவிடக்கூடாது என்பதற்காக நேபாளத்தை ஒட்டிய 1,751 கி.மீ., நீள எல்லைப் பகுதியிலும் பாதுகாப்பு அதிகரிக்கப்பட்டுள்ளது. மதுராவில் உள்ள கிருஷ்ணர் கோவில் உட்பட பல வழிபாட்டுத் தலங்களிலும் போலீசார் பாதுகாப்பில் ஈடுபட்டுள்ளனர். மொத்தத்தில், பயங்கரவாதிகளின் எந்தத் தாக்குதலையும் சமாளிக்க நாடு முழுவதும் போலீசார் முழு தயார் நிலையில் உள்ளனர்.

ஜனாதிபதி உரை: நாட்டின் 63வது சுதந்திர தினத்தையொட்டி, ஜனாதிபதி பிரதிபா பாட்டீல், நாட்டு மக்களுக்கு நிகழ்த்திய உரையில் கூறியதாவது:தற்போதைய மற்றும் எதிர்கால சந்ததியினருக்காக பலமான, ஒன்றுபட்ட, வளர்ச்சியுடன் கூடிய இந்தியாவை உருவாக்க மக்கள் அனைவரும் ஒன்றுபட்டு செயல்பட வேண்டும். அப்பாவி மக்களுக்கு எதிராகவே பயங்கரவாதம் நிகழ்த்தப்படுகிறது. அமைதிக்கு எதிரான அந்த பயங்கரவாதம், ஒவ்வொரு மதம் மற்றும் நம்பிக்கைக்கு எதிரானது என்பதால், அதை ஒழிக்க வேண்டும்.அமைதியான உலகம் மற்றும் சமூகத்தை உருவாக்க, மனித இனத்தைச் சேர்ந்த அனைவரும் ஒன்றுபட்டு செயல்பட வேண்டும். பயங்கரவாதத்தை தோற்கடிக்க வேண்டும். இந்துக்கள், முஸ்லிம்கள், சீக்கியர்கள், கிறிஸ்தவர்கள், புத்த மதத்தினர், ஜைன மதத்தினர், பார்சிகள் உட்பட அனைவரும் ஒற்றுமையாக வாழ வேண்டும். நாடு முன்னேற்றம் பெற வேண்டும் எனில், சமூக ஒற்றுமை அவசியம். நாம் பிரியாமல் ஒன்றுபட்டு செயல்பட வேண்டும். இவ்வாறு ஜனாதிபதி பிரதிபா பாட்டீல் கூறினார்.

ஆண்டுக்கு ஆண்டு சுதந்திரம் அதிகரிக்கும்முன்னு பார்த்தல்,
பாதுகாப்பு செய்யரது தான் அதிகரிகிறது. என்ன செய்யரது. நம்ம தலவிதி அப்படி.
இருந்தாலும் சந்தோசமா கொண்டாடுவோம்.

ஹா ஹா ஹா ....... பயங்கரவாதிகளுக்கு தான் நாம கருப்பு பூனை , Z Wing பாதுகாப்புன்னு கொடுத்து கண்ணும் கருத்துமா பாத்துகுறோமே. (நம்ம மாண்பு மிகுக்களை சொன்னேன் )