நடிகை ஐஸ்வர்யாராய் சிகரெட் பிடிக்கும் காட்சியால் சர்ச்சை

நடிகை ஐஸ்வர்யாராய் சிகரெட் பிடிக்கும் காட்சி கொண்ட பட விளம்பரத்தால் பெரும் சர்ச்சை எழுந்து இருக்கிறது.

இந்திப்பட காட்சி

அசோக் சவானும், ஆதர்ஷ் வீட்டு வசதி ஊழலும் ஏற்படுத்திய பரபரப்பு போய், இப்போது மும்பையை ஆக்கிரமித்து இருப்பது நடிகை ஐஸ்வர்யாராய் புகை பிடிக்கும் காட்சியை கொண்ட `குஜாரிஷ்' இந்திப்படத்தின் பேனர்களும், சுவரொட்டிகளும் ஏற்படுத்தியுள்ள பரபரப்புத்தான்.

பிரபல இயக்குனர், சஞ்சய் லீலா பன்சாலி கதை, திரைக்கதை எழுதி, இசை அமைத்து இயக்கியுள்ள படம் தான் `குஜாரிஷ்'. இது ஒரு மென்மையான காதல் கதையை களமாக கொண்டு எடுக்கப்பட்டிருக்கிறது. ஐஸ்வர்யாராயுடன் ஜோடி சேர்ந்திருப்பவர் ஹிருத்திக் ரோஷன்.

பெரும் சர்ச்சை

நாளை (வெள்ளிக்கிழமை) உலகமெங்கும் வெளியாகிற இந்தப்படத்தில் நாயகி ஐஸ்வர்யாராய் ஸ்டைலாக சிகரெட் புகைத்துக்கொண்டு, ஹிருத்திக்குடன் தோன்றுகிறார். இந்த காட்சியை கொண்ட பேனர்கள், சுவரொட்டிகள் மும்பையை ஆக்கிரமித்துள்ளன.

பண்பாட்டுக்கு பெயர் பெற்ற ஒரு நாட்டில் ஒரு பெண் சிகரெட் புகைப்பது போல காட்சியுடன் படமா? என்று பெண்கள் அமைப்புகள் இதுகுறித்து போர்க்கொடி உயர்த்தி உள்ளன.

வக்கீல் நோட்டீஸ்

`நோட்' என்று அழைக்கப்படுகிற புகையிலை ஒழிப்பு தேசிய அமைப்பும் போர்க்கொடி தூக்கி இருக்கிறது. இந்த அமைப்பின் தலைவரான டாக்டர் சேகர் சைக்கார், இதுகுறித்து கூறியதாவது:-

"கதையம்சத்தை வெளிப்படுத்தும் வகையில் எத்தனையோ காட்சிகள் குஜாரிஷ் படத்தில் இருக்கலாம். ஆனால் ஐஸ்வர்யாராய் சிகரெட் புகைக்கும் காட்சியை பெரிய அளவில் பேனர்களாகவும், சுவரொட்டிகளாகவும் விளம்பரப்படுத்தி இருப்பது கண்டனத்துக்கு உரியது. இது இளைய தலைமுறையினரின் மனங்களை கெடுத்து விடும்.

எனவே ஐஸ்வர்யாராய்க்கும், சஞ்சய் லீலா பன்சாலிக்கும் வக்கீல் நோட்டீஸ் அனுப்புவேன்''. இவ்வாறு அவர் கூறினார்.

அமிதாப்பையும்...

ஐஸ்வர்யாராயின் மாமனார் அமிதாப்பச்சன், `பேமிலி' இந்திப்பட விளம்பரத்தில் சிகரெட் புகைக்கும் காட்சி இடம் பெற்றபோது அவரை ஐகோர்ட்டுக்கு இழுத்தவர்தான் இந்த டாக்டர் சைகர் சைக்கார் என்பது நினைவுகூரத்தக்கது.

ஐஸ்வர்யாராய் புகை பிடிக்கும் காட்சிக்கு டாக்டர்களும் எதிர்ப்பு தெரிவித்துள்ளனர். தங்கள் எதிர்ப்பை தெரிவிக்கிற வகையில் நாளை இந்தப்படம் திரையரங்குகளில் வெளியாகிறபோது, கறுப்புச்சின்னம் அணிய டாக்டர்கள் முடிவு செய்துள்ளனர். ஆனால் இத்தனை சர்ச்சைகளுக்கு மத்தியிலும் ஐஸ்வர்யாராய் கப்சிப்பென வாய் திறக்காமல் மவுனம் சாதிக்கிறார் என்பது குறிப்பிடத்தக்கது.

எது எதுக்கு சர்ச்சை என்று இல்லையா