மாமனார் வீட்டுக்கு சென்ற மருமகன் மர்மசாவு

மேச்சேரி அருகே மாமனார் வீட்டுக்கு சென்ற மருமகன் மர்மசாவு! போலீஸ் விசாரணை


மேச்சேரி அருகே, மாமனார் வீட்டுக்கு சென்ற மருமகன் மர்மமான முறையில் இறந்து கிடந்தார். அவரது சாவுக்கான காரணம் குறித்து போலீசார் விசாரணை நடத்தி வருகின்றனர்.

இந்த சம்பவம் குறித்து போலீசார் தரப்பில் கூறப்பட்டதாவது:-

வாலிபர்

சேலம் மாவட்டம் மேச்சேரி அருகே உள்ள தாத்தியம்பட்டி காலனி காமலாபுரத்தை சேர்ந்தவர் குட்டி என்கிற துரைசாமி (வயது 30). இவருக்கும் மேச்சேரி அருகே உள்ள பாரப்பட்டி காட்டுவளவை சேர்ந்த ஆறுமுகம் என்பவரது மகள் சந்தோஷ் என்பவருக்கும் 10 வருடங்களுக்கு முன்பு திருமணம் நடந்தது. இவர்களுக்கு தற்போது 2 குழந்தைகள் உள்ளது.

திருமணம் ஆனது முதலே மனைவியின் வீட்டிலேயே துரைசாமி வசித்து வந்தார். இந்த நிலையில் கணவன் - மனைவிக்குள் ஏற்பட்ட பிரச்சினை தொடர்பாக துரைசாமி மனைவியை பிரிந்து தனது பெற்றோர் வீட்டுக்கு வந்து விட்டார். அவ்வப்போது தனது குழந்தைகளை மட்டும் பார்ப்பதற்காக மாமனார் வீட்டுக்கு சென்று வருவாராம்.

மர்ம சாவு

இந்த நிலையில் நேற்று முன்தினம் தனது குழந்தையை பார்ப்பதற்காக மாமனார் வீட்டுக்கு சென்ற துரைசாமி, வாயில் நுரை தள்ளிய நிலையில் அங்கு மர்மமான முறையில் இறந்து கிடந்தார். இது குறித்து துரைசாமியின் தந்தை சின்னுசாமி மேச்சேரி போலீசில் புகார் செய்தார். அதில் தனது மகன் சாவில் சந்தேகம் உள்ளதாக தெரிவித்து உள்ளார்.

இதன் பேரில் மேச்சேரி இன்ஸ்பெக்டர் ஆரோக்கியராஜ், சப்-இன்ஸ்பெக்டர் ஆசைத்தம்பி, அத்தியப்பன் ஆகியோர் துரைசாமியின் பிணத்தை கைப்பற்றி பிரேத பரிசோதனை செய்வதற்காக சேலம் அரசு ஆஸ்பத்திரிக்கு அனுப்பி வைத்தனர். மேலும் வழக்கு பதிவு செய்து அவரது சாவுக்கான காரணம் குறித்து விசாரணை நடத்தினர்.

மதுவில் விஷம் கலந்து குடித்து துரைசாமி இறந்திருக்கலாம் என்று கூறப்படுகிறது. இருந்தாலும் பிரேத பரிசோதனை அறிக்கை வந்த பிறகே அவரது சாவுக்கான காரணம் தெரிய வரும் என போலீசார் தெரிவித்தனர். தொடர்ந்து இது குறித்து விசாரணை நடத்தி வருகின்றனர்.