இன்று போய் நாளை வா' அலைகழிக்கும் ஊழியர்கள்

தாலுகா அலுவலகத்தில் குறித்த தேதியில் சான்று வழங்காமல் "இன்று போய் நாளை வா' என கிராம மக்களை தாலுகா அலுவலக ஊழியர்கள் அலைய விடுகின்றனர்.திருவள்ளூர் ஜெ.என். சாலையில் உள்ளது தாலுகா அலுவலகம். இந்த அலுவலகத்துக்கு உட்பட்டு கடம்பத்தூர், திருவள்ளூர், பூண்டி ஆகிய ஒன்றியங்களுக்கு உட்பட்ட 150க்கும் மேற்பட்ட கிராமங்கள் உள்ளன.இந்த கிராம மக்கள் சாதி, வருமானம், இருப்பிடம், பட்டா, பட்டா பெயர் மாற்றம், பிறப்பு மற்றும் இறப்பு சான்று, வாரிசு சான்று, முதியோர் உதவித்தொகை என, பல்வேறு சான்றுகளை பெற திருவள்ளூர் தாலுகா அலுவலகத்துக்குத்தான் வரவேண்டும்.இந்த கிராம மக்கள் சான்று பெற வி.ஏ.ஓ., வருவாய் ஆய்வாளர் ஆகியோரிடம் கையெழுத்து பெற்று தாலுகா அலுவலகத்தில் உள்ள வரவேற்பாளர் அறையில் விண்ணப்பத்தை கொடுக்க வேண்டும். விண்ணப்பத்தை பெற்றுக்கொண்டு அதற்கான ஒப்புகை சீட்டு வழங்கப்படுகிறது.அந்த ஒப்புகை சீட்டில் குறிப்பிட்ட நாளில் சான்று பெற வருமாறு குறிப்பிடுகின்றனர். அந்த தேதியில் சென்று சான்று கேட்டால், இன்னும் கையெழுத்தாகவில்லை என, கிராம மக்களை திருப்பி அனுப்புகின்றனர்.இவ்வாறு குறிப்பிட்ட தேதியில் சான்றுகளை வழங்காமல் தினசரி அலையவிடுவதாக, அங்கு சான்று பெற வரும் மக்கள் கூறுகின்றனர். ஆனால் அங்குள்ள சில ஊழியர்களிடம் விண்ணப்பங்களை கொடுத்தால் மட்டும் மறுநாளே சான்றுகள் தயாராகிறது எனவும் அவர்கள் கூறுகின்றனர்.தினமும் திறக்கப்படாத பிறப்பு, இறப்பு சான்று அறை:தாலுகா அலுவலகத்தில், பிறப்பு மற்றும் இறப்பு சான்றுகளை கேட்டு விண்ணப்பம் செய்பவர்களுக்கு வரவேற்பு அறையில் சான்றுகள் வழங்கப்படுவதில்லை. அலுவலகத்தின் பின்புறம் சர்வேயர்கள் அறையின் பக்கத்தில் உள்ள பிறப்பு, இறப்பு சான்று அறைக்கு சென்று வாங்கிக் கொள்ளுங்கள் என ஊழியர்கள் சொல்கின்றனர்.அங்கு சென்று கேட்கலாம் என்றால் அந்த அறை எப்போதும் மூடிக்கிடக்கிறது. திறக்கும் நேரமும் தெரியவில்லை. கேட்டால் வெளியே சென்றுள்ளனர் என கூறுகின்றனர். இந்த சான்றுகளையும் வரவேற்பு அறையில் மக்களுக்கு வழங்க அதிகாரிகள் நடவடிக்கை எடுக்க வேண்டும்.எனவே, கிராம மக்கள் நலன்கருதி, ஒப்புகை சீட்டில் குறிப்பிடப்படும் தேதியில் சான்றுகளை வழங்க, சம்பந்தப்பட்ட அதிகாரிகள் நடவடிக்கை எடுக்க வேண்டும்.

இதுதான் நமது பண்பாடு ,பாரம்பரியம் (என்ன பண்ணுறது ?)