திண்டுக்கல்லில் போலி நகைகளை அடகுவைத்து ரூ.4 லட்சம் மோசடி

by **சிவா** Mon Nov 15, 2010 3:07 pm

திண்டுக்கல்லில் தனியார் நிதிநிறுவனத்தில் போலி நகைகளை கொடுத்து ரூ.4 லட்சம் வாங்கி சென்றவர்களை போலீசார் வலைவீசி தேடி வருகின்றனர்.

இது குறித்து போலீஸ் தரப்பில் கூறப்படுவதாவது:-

227 கிராம் நகைகள்

திண்டுக்கல்லில் பழனி சாலையில் உள்ள தனியார் நிதிநிறுவனத்திற்கு நேற்று முன்தினம் ஒரு ஆண் மற்றும் 2 பெண்களுடன் சென்றார். அண்ணாநகரில் இருந்து வருவதாக தங்களை அறிமுகப் படுத்தி கொண்டனர். தங்களிடம் உள்ள தங்க நகைகளை அடகு வைத்து, அதற்கு ஈடாக பணம் பெறுவதற்கு வந்ததாக தெரிவித்தனர்.

அதன்பின்னர் தாங்கள் கொண்டு வந்த நகைகளை எடுத்து நிதிநிறுவன அலுவலரிடம் கொடுத்தனர். அவர் நகைகளை எடை பார்த்த போது, அவைகள் 227 கிராம் இருந்தது. இதனை தொடர்ந்து நகைக்கு ஈடாக ரூ.4 லட்சம் பணத்தை வாங்கி கொண்டு 3 பேரும் சென்றுவிட்டனர்.

போலி நகைகள்

சிறிது நேரத்தில் நிதிநிறுவன ஊழியர்கள் நகைகளை சோதனை செய்து பார்த்த போது, அனைத்தும் போலி நகைகள் என்பது தெரியவந்தது. இதனை தொடர்ந்து திண்டுக்கல் மேற்கு போலீஸ் நிலையத்தில் புகார் செய்யப்பட்டது. மேற்கு போலீசார் வழக்குப்பதிவு செய்து போலி நகைகளை கொடுத்து மோசடி செய்தவர்களை வலைவீசி தேடி வருகின்றனர்.