ரெயில் மோதி தந்தை-மகள் உள்பட 4 பேர் பலி!

தண்டவாளத்தை கடந்தபோது விபத்து தந்தை-மகள் உள்பட 4 பேர் ரெயில் மோதி பலி


ராணிப்பேட்டை, நவ.15- ரெயில் நிலையத்தில் தண்டவாளத்தை கடந்த தந்தை-மகள் உள்பட 4 பேர் ரெயில் மோதி பரிதாபமாக இறந்தனர்.

தண்டவாளத்தை கடக்க முயற்சி

பெங்களூரில் இருந்து சென்னை வரும் பிருந்தாவன் எக்ஸ்பிரஸ் ரெயில் நேற்று மாலை 6.40 மணிக்கு வேலூர் மாவட்டம் வாலாஜா ரெயில் நிலையத்தில் வந்து நின்றது.

அப்போது ரெயிலில் இருந்து பெங்களூர் கிருஷ்ணா நந்தா நகரை சேர்ந்த முனிசாமி (வயது 33), அவரது மனைவி நதியா (28), மகன் ராஜேஷ் (5), மகள் சுஸ்மிதா (2), மாமியார் வெண்ணிலா (55) மற்றும் சிலர் கீழே இறங்கினார்கள். அவர்கள் ரெயில் நிலையத்திற்கு வெளியே வருவதற்கு நடைமேம்பால பாதையை பயன்படுத்தாமல் தண்டவாளத்தை கடந்து செல்ல முடிவு செய்தனர். அதன்படி அவர்கள் ரெயில்வே தண்டவாளத்தை கடந்து சென்றனர்.

ரெயில் மோதி 4 பேர் பலி

அவர்கள் 3-வது பாதை தண்டவாளத்தை கடக்க முயன்றபோது அந்த பாதையில் சென்னை-மங்களூர் எக்ஸ்பிரஸ் ரெயில் கண் இமைக்கும் நேரத்தில் அவர்கள் மீது மோதியது.

மோதிய வேகத்தில் முனிசாமி, அவரது மாமியார் வெண்ணிலா, மகள் சுஸ்மிதா, அடையாளம் தெரியாத சுமார் 35 வயது மதிக்கத்தக்க ஒருவர் ஆகிய 4 பேரும் உடல் நசுங்கி அந்த இடத்திலேயே ரத்த வெள்ளத்தில் பலியானார்கள்.

மேலும் முனிசாமியின் மனைவி நதியா, கமலா (50), கனகா, சுமதி, சாந்தி, பழனி (40) ஆகியோர் தூக்கி வீசப்பட்டு காயம் அடைந்தனர். அவர்கள் வாலாஜா அரசு ஆஸ்பத்திரியில் சிகிச்சைக்காக சேர்க்கப்பட்டனர்.

விசாரணை

இதுபற்றிய தகவல் கிடைத்ததும் மாவட்ட போலீஸ் சூப்பிரண்டு அன்பு, காந்தி எம்.எல்.ஏ. ஆகியோர் விரைந்து சென்று காயம் அடைந்தவர்களுக்கு சிகிச்சை அளிக்க ஏற்பாடுகள் செய்தனர்.

இந்த விபத்து குறித்து காட்பாடி ரெயில்வே போலீசார் வழக்கு பதிவு செய்து விசாரணை நடத்தி வருகிறார்கள்.

அக்கா வீட்டிற்கு...

விபத்தில் பலியான முனிசாமியின் அக்காள் வள்ளியம்மாள் வீடு வேலூர் மாவட்டம் சோளிங்கர் அருகே தொண்டாநத்தத்தில் உள்ளது. அவரது வீட்டுக்கு குடும்பத்துடன் வந்தபோது இந்த விபத்தில் சிக்கி கொண்டனர். இதில் அவரது மனைவி, மகன் ரஜேஷ் ஆகியோர் உயிர் தப்பினர்.

ரெயில் நிலையத்தில் பயணிகள் கண் எதிரே நடந்த இந்த சம்பவம் பெரும் பரபரப்பை ஏற்படுத்தியது.