பொங்கலுக்கு இலவச வேட்டி, சேலைகள் ready :)

**krishnaamma** · **krishnaamma** Sat 13 Nov 2010 - 20:50

சென்னை : பொங்கலுக்கு தயாராகி, வினியோகத்திற்காக வந்துள்ள இலவச வேட்டி, சேலைகளை கைத்தறி துறை அமைச்சர் ராமச்சந்திரன் நேற்று பார்வையிட்டார். இதுகுறித்து வெளியிடப்பட்ட செய்திக்குறிப்பு: பொங்கல் பண்டிகையை முன்னிட்டு, இலவச வேட்டி, சேலை திட்டத்திற்கு 159.04 லட்சம் சேலைகளும், 158.19 லட்சம் வேட்டிகளும் உற்பத்தி செய்ய அரசு அனுமதி அளித்துள்ளது. மேலும், கைத்தறி சேலைகளின் நீளத்தை ஐந்து மீட்டரில் இருந்து 5.5 மீட்டராகவும், விசைத்தறி சேலைகளின் நீளத்தை 5.1 மீட்டரில் இருந்து 5.5 மீட்டராகவும் உயர்த்தி அரசு ஆணையிட்டது.

மேலும், விசைத்தறி சேலை மற்றும் வேட்டிகளில் ஊடை இழையை 60ல் இருந்து 64 ஆகவும் உயர்த்தி அரசு ஆணையிட்டுள்ளது. இதன் அடிப்படையில் இலவச வேட்டி, சேலை திட்டம் மற்றும் முதியோர் ஓய்வூதிய திட்டத்திற்காக 178.3 லட்சம் சேலைகள் மற்றும் 167.11 லட்சம் வேட்டிகள் தயாரிக்க குறியீடு நிர்ணயம் செய்யப்பட்டுள்ளது.

இதற்கான உற்பத்தி திட்டம் காஞ்சிபுரம், வேலூர், திருவள்ளூர், மதுரை, திண்டுக்கல், விருதுநகர், திருநெல்வேலி, நாகர்கோவில், சேலம், திருச்செங்கோடு, ஈரோடு, கோயம்புத்தூர் ஆகிய பகுதிகளில் உள்ள கைத்தறி மற்றும் விசைத்தறி நெசவாளர் கூட்டுறவு சங்கங்களுக்கு வழங்கப்பட்டது. 230 கைத்தறி நெசவாளர் கூட்டுறவு சங்கங்களிலுள்ள 13 ஆயிரம் கைத்தறி நெசவாளர்களும், 133 விசைத்தறி நெசவாளர் கூட்டுறவு சங்கங்களில் உள்ள 41 ஆயிரம் விசைத்தறி நெசவாளர்களும் இத்திட்ட உற்பத்தியில் ஈடுபட்டுள்ளனர்.

கடந்த 11ம் தேதி வரை 132.59 லட்சம் சேலைகளும், 104.62 லட்சம் வேட்டிகளும் உற்பத்தி செய்யப்பட்டுள்ளன. எஞ்சியுள்ள வேட்டி, சேலைகளை டிசம்பர் மாதத்திற்குள் உற்பத்தி செய்து முடிக்க அனைத்து மாவட்டங்களிலும் போர்கால அடிப்படையில் உற்பத்தி விரைவுபடுத்தப்பட்டுள்ளது. இந்த வேட்டி, சேலைகளை சிட்லபாக்கத்தில் உள்ள சேமிப்பு கிடங்கில் வைத்துள்ளனர். இவற்றை கைத்தறித் துறை அமைச்சர் கே.கே.எஸ்.எஸ்.ஆர்.ராமச்சந்திரன் நேற்று ஆய்வு செய்தார். இவ்வாறு செய்திக்குறிப்பில் கூறப்பட்டுள்ளது.