லிபியாவில் தமிழக இளைஞர்கள் சித்ரவதை : காயம்பட்டால் சிகரெட் சூடு

பரமக்குடி : லிபியா நாட்டிற்கு வேலைக்கு சென்று, கொடுமை தாங்காமல் திரும்பி வந்த தமிழகத்தை சேர்ந்த 22 பேர், "வாழ வழியில்லாத நிலையில் உள்ள தங்களது குடும்பத்தை காக்க, ஏஜன்ட்களிடம் கொடுத்த பணத்தை பெற்று தர, அரசு நடவடிக்கை எடுக்க வேண்டும்,' என, கூறினர்.

மதுரை மேலூர், கீழையூரில் டிராவல்ஸ் நடத்தி வருபவர் சக்திவேல். இவர், ராமநாதபுரம் மாவட்டம் மட்டியனேந்தலில் சப் ஏஜன்டாக செயல்படும் மலைராஜ், சொக்கலிங்கம் மூலம் இளைஞர்கள் பலரை, வேலைக்காக லிபியா நாட்டிற்கு அனுப்பினார். இவர்களில் ராமநாதபுரம் பிரபு (கொடிக்குளம்), சத்தியமூர்த்தி (உத்தரகோசமங்கை), முனியசாமி(காவல்கொட்டகம்), முருகன் (தோளூர் தெற்குப்பட்டி), தர்மலிங்கம்(பெருமாள்கோவில்), சந்திரசேகர் (நெடுங்குளம்), ராஜகருங்கு(மல்லல்), இளங்கோ (அரசநகரி), கோபிகண்ணன் (ஆழிமதுரை) அடங்குவர். இவர்கள் உட்பட தமிழகத்தை சேர்ந்த 22பேர், கடந்த 2009 டிச., 18 ல், ஒரு லட்சத்து 50ஆயிரம் ரூபாய் கட்டி, கார்பெண்டர், கொத்தனார், கம்பி கட்டும் பணிக்காக 20ஆயிரம் மாத சம்பளம், ஓவர்டைம் ஊதியம் 25 ஆயிரம், தங்குமிடம், சாப்பாடு இலவசம் எனக் கூறி, அனுப்பி வைக்கப்பட்டனர். ஆனால் அங்கோ, எல்ராடு கம்பெனியில் மண் சுமக்கும் பணி உள்ளிட்ட கடினமான வேலை கொடுத்து கொடுமைப்படுத்தி உள்ளனர்.

பாதிக்கப்பட்டவர்கள் கூறியதாவது: தினமும் உணவாக காலை ஒரு பன், மதியம் பச்சரிசி சாதம் ஒரு கரண்டி, இரவு ஒரு பன் கொடுத்து, ஒரு நாளில் 12மணி நேரம் பணி செய்ய வைத்தனர். வேலை நேரத்தில் இயற்கை உபாதைகளுக்கு கழிப்பறைக்கு சென்றால் , ஐந்து நாட்கள் வரை சம்பளத்தில் பிடித்தம் செய்தனர்.சாப்பாடு, சம்பளம் பற்றி கேட்டால், காற்று புகாத கன்டெய்னரில் அரை மணி நேரத்திற்கும் மேல் அடைத்து வைத்து கம்பியால் அடித்தனர். வேலை பார்க்கும்போது காயம் பட்டது எனக் கூறினால், அந்த இடத்திலேயே சிகரெட் சூடு வைத்தனர். அவசரத்திற்கு மருத்துவமனை செல்ல வேண்டுமால் 1000 கி.மீ., பாலைவனத்தை கடந்து தான் செல்ல வேண்டும். இந்த கொடுமை தாங்காமல், தமிழ்நாட்டை சேர்ந்த 22 பேர், மற்ற நாடுகளை சேர்ந்த நூற்றுக்கணக்கானோர் அங்குள்ள போலீஸ் ஸ்டேஷனில் முறையிட்டோம்.

இதை தொடர்ந்து அனைவரும் அவரவர் நாட்டு தூதரகத்திற்கு அனுப்பப்பட்டனர். இந்திய தூதரக தலைமை அலுவலர் மணிமேகலை, இந்தியர்களை அங்கேயே இரண்டு மாதங்கள் தங்க வைத்து, காயங்களை குணப்படுத்தி, கம்பெனியில் இருந்து பாஸ்போர்ட் உள்ளிட்டவைகளை பெற்று, இந்தியா அனுப்ப உதவினார். "வாழ வழியற்ற நிலையில் உள்ள எங்கள் குடும்பத்தை காக்க, ஏஜன்ட்களிடம் கொடுத்த பணத்தை பெற்று தர, அரசு நடவடிக்கை எடுக்க வேண்டும், என்றனர்.

தினமலர்!

போவதற்கு முன் யோசிச்சுருக்கணும் , .....