மலேசியா: எரியூட்டிக் கொண்ட கோவில் பக்தர் கடுமையான நிலையில் உள்ளார்!

ஊராட்சி அதிகாரிகள் தமது கோவிலின் ஒரு பகுதியை தரைமட்டமாக்கலாம் என்ற அச்சம் காரணமாக, இன்று காலை பூசாட் பண்டார் பூச்சோங்கில், கோவில் பக்தர் ஒருவர் தம் மீது பெட்ரோலை ஊற்றி எரியூட்டிக் கொண்டதைத் தொடர்ந்து மருத்துவமனையில் சேர்க்கப்பட்டுள்ளார்.

எம். சக்ரகுணசேகரன், வயது 52, என்ற அந்த ஆடவர் தற்போது செர்டாங் மருத்துவமனையில் மோசமான நிலையில் உள்ளார்.

தமிழ்ப் பள்ளி வளாகமொன்றில் அமைந்துள்ள ஸ்ரீ ஸ்ரீநிவாச பெருமாள் கோவிலில், காலை முன்னேரம் வழிபாட்டில் தாம் ஈடுபட்டிருந்தபோது, வெளியே, “கோவிலை உடைக்காதீர்கள்” என சக்ரகுணசேகரன்
கூச்சலிடுவதை தாம் கேட்டதாக, கோவில் நிருவாகக் குழுச் செயலாளர் கே. தருமலிங்கம், வயது 49, தெரிவித்தார்.

பாலர் பள்ளியொன்றைக் கட்டுவதற்கு, அந்த கோவிலின் தளவாடப் பொருள் அறையை உடைக்க, சுபாங் ஜெயா நகராண்மைக் கழக அமலாக்க அதிகாரிகள், போலீசார், ரேலா உறுப்பினர்கள் ஆகியோர் அங்கு சென்றடைந்தனர்.

சக்ரகுணசேகரன் மருத்துவமனைக்குக் கொண்டு செல்லப்பட்ட பின்னர், அந்த கிடங்கை அதிகாரிகள் உடைத்ததாக தர்மலிங்கம் தெரிவித்தார்.

பாலர் பள்ளியைக் கட்டுவதற்கு, தளவாட அறையை காலியாக்கும்படி கோவில் நிருவாகத்தினரைப் பணிக்கும் அறிக்கையொன்று கடந்த அக்டோபர் 26ஆம் திகதி அனுப்பப்பட்டதாக அவர் கூறினார்.

ஆயினும், அப்பகுதியை காலி செய்வதற்கு அதிகாரிகள் போதிய அவகாசம் வழங்காதது குறித்து அவர் ஏமாற்றம் தெரிவித்தார். அந்த கோவில் கட்டப்பட்டு பத்தாண்டுகள் ஆகி விட்டது. ஒதுக்கப்பட்ட நிலத்தில், அந்த கோவில் அமைந்துள்ளதாக மலேசியாகினியிடம் அவர் தெரிவித்தார்.

பத்தாண்டுகளுக்கு முன்னர் இணைப்புக் கட்டடத்தை கட்டுவதற்கு அந்த பள்ளிக்கூடம் அனுமதித்ததாக மற்றொரு கோவில் உறுப்பினரான டி. புகழேந்தி, வயது 42, கூறினார்.

கட்டட உடைப்பு நடவடிக்கை பொருத்தமற்றது என்றும், முன்கூட்டியே நிருவாகத்தினருக்கு தெரியப்படுத்தியிருக்க வேண்டும் என்றும் அவர் தெரிவித்தார்.

இன்று காலை அரசியல் கட்சிகள், அமலாக்க நிறுவனங்கள், சம்பந்தப்பட்ட அந்த பள்ளிக்கூடம், கோவில் நிருவாகம் ஆகியவற்றின் பேராளர்கள் சம்பந்தப்பட்ட கூட்டமொன்று நடத்தப்பட்டதாக எம்பிஎஸ்ஜே கவுன்சலர் கேஎன் மைக்கல் தமிழரசன் கூறினார்.

அந்த தளவாட அறை உடைக்கப்படுவதை ஒரு வாரத்துக்கு தள்ளி வைக்க ஒப்புக் கொள்ளப்பட்டதாக அவர் கூறினார்.

கிடங்கில் உள்ள தளவாடப்பொருட்களை அகற்றுவதற்கு கோவில் நிருவாகத்தினருக்கு ஏழு நாள் அவகாசம் வழங்கப் பள்ளி நிருவாகம் ஒப்புக் கொண்டது. அப்பிரச்னைக்கு தற்போது தீர்வு காணப்பட்டுள்ளதாக மலேசியாகினியிடம் தமிழரசன் தெரிவித்தார்.

அமலாக்க அதிகாரிகள் அப்பகுதியைச் சுற்றி வேலியிட்டுள்ளனர்.

மலேசியாஇன்று!