கிரிக்கெட்

ஜோகனஸ்பர்க்: "" இரண்டாவது ஐ.பி.எல்., தொடரின் பைனல் போட்டியின் போது, பயத்தின் காரணமாக பேட்டிங் செய்ய தடுமாறினர் ராகுல் டிராவிட்,"" என, தென் ஆப்ரிக்க வீரர் கிப்ஸ் தனது சுயசரிதையில் எழுதி உள்ளார்.

தென் ஆப்ரிக்க கிரிக்கெட் அணியின் முன்னணி வீரர் ஹெர்ஷல் கிப்ஸ். சிறந்த அதிரடி வீரரான இவர், இதுவரை 90 டெஸ்ட் (6167 ரன்) மற்றும் 248 ஒரு நாள் (8094 ரன்) போட்டிகளில் விளையாடி உள்ளார். 36 வயதான இவர் சமீபகாலமாக பார்ம் இன்றி தவித்து வருகிறார். இதனால் கடந்த 6 மாதங்களாக தென் ஆப்ரிக்க அணியில் இவருக்கு வாய்ப்பு மறுக்கப்பட்டு வருகிறது. இந்நிலையில், இவர் "டூ தி பாய்ன்ட்' என்ற பெயரில் சுயசரிதை எழுதி வெளியிட்டு உள்ளார். இப்புத்தகத்தில் தென் ஆப்ரிக்க கிரிக்கெட் வீரர்களை பற்றி அதிரடியான புகார்களை தெரிவித்துள்ளார். தவிர, இந்தியாவின் ராகுல் டிராவிட் பற்றி ஒரு கருத்தை வெளியிட்டுள்ளார். அதில்,"" இந்தியன் பிரிமியர் லீக் (ஐ.பி.எல்.,) சார்பில் 2 வது தொடர், தென் ஆப்ரிக்காவில் நடந்தது. இத்தொடரின் பைனல் போட்டியில், நான் பங்கேற்ற டெக்கான் சார்ஜர்ஸ் அணி, பெங்களூரு ராயல் சாலஞ்சர்ஸ் அணியை எதிர்கொண்டது. இப்போட்டியின் போது, பேட்டிங் செய்ய வந்த ராகுல் டிராவிட், ரன் குவிக்க வேண்டும் என்ற நெருக்கடியின் காரணமாக, தடுமாறினார். ஹார்மிட் சிங், வீசிய பந்தை தடுக்க நினைத்து போல்டானார். சாதாரண போட்டியாக இருந்தால், அம்மாதிரியான "ஷாட்டை' டிராவிட் அடித்திருக்க மாட்டார். பைனல் என்பதால் பயத்தின் காரணமாக தவறான "ஷாட்டை' கையாண்டு விட்டார். அன்றைய பைனல் போட்டி சிறப்பானதாக அமைந்தது. இதில் டெக்கான் சார்ஜர்ஸ் அணி கோப்பை வென்றதை என்னால் இப்பவும் நம்ப முடியவில்லை,'' என வெளியிடப்பட்டுள்ளது.

கடைசி கட்டம்: சுயசரிதை எழுதி சர்ச்சை கிளப்பியுள்ள கிப்சின் கிரிக்கெட் வாழ்க்கை முடிவுக்கு வந்து விட்டது என முன்னாள் தென் ஆப்ரிக்க வீரர் வெசல்ஸ் தெரிவித்துள்ளார். இது குறித்து அவர் கூறுகையில்,"" சுயசரிதை என்ற பெயரில் கிரிக்கெட் வீரர்களை பற்றி விமர்சிப்பது நாகரீகமான செயல் அல்ல. இதனால் எந்த நல்ல காரியமும் நடக்கப் போவது இல்லை. இதன் மூலம் தனது கிரிக்கெட் வாழ்க்கைக்கு தாமாகவே முற்றுப் புள்ளி வைத்துள்ளார் கிப்ஸ்,'' என்றார்.