அமைச்சர் மைத்திரிபாலாவின் கூட்டத்தில் கைத்துப்பாக்கி, குறி வைத்தது யார்?

by Guest Thu Nov 04, 2010 1:04 am

கொழும்பு, ஆனந்தா கல்லூரியின் வகுப்பறை ஒன்றிலிருந்து இலகு ரக கைத்துப்பாக்கி ஒன்று மீட்கப்பட்டதாகத் தகவல்கள் வெளியாகியுள்ளன.

கடந்த சனிக்கிழமையன்று சுகாதார அமைச்சர் மைத்திரிபால சிறிசேன இந்தக் கல்லூரியில் இடம்பெற்ற பரிசளிப்பு விழாவில் பிரதம அதிதியாகக் கலந்து கொண்டார். அவர் குறிப்பிட்ட இந்தப் பாடசாலைக்கு வருவதற்கு முன்னர் அவரது பாதுகாவலர்கள் இந்தப் பாடசாலையின் வகுப்பறைகளைச் சோதனையிட்டனர். அப்போதே பொய்ன்ட் 02ரக கைத்துப்பாக்கி ஒன்று கண்டுபிடிக்கப்பட்டதாகத் தற்போது தகவல்கள் வெளியாகியுள்ளன.

இந்தச் சம்பவம் தொடர்பில் வெளியாருக்கோ அல்லது ஊடகவியலாளர்களுக்கோ தகவல்களை வழங்க வேண்டாம் எனப் பொலிஸ் மா அதிபர் அமைச்சர்களுக்கான பாதுகாப்புப் பிரிவினருக்கு உத்தரவிட்டிருந்ததாகவும் தற்போது தெரிய வருகிறது.

ஜனாதிபதி மஹிந்த ராஜபக்ஷ இம்மாதம் இரண்டாவது தடவையாக ஜனாதிபதியாகப் பதவியேற்ற பின்னர் மாற்றம் செய்யப்படவுள்ள அமைச்சரவையில் புதிய பிரதமர் ஒருவர் தெரிவு செய்யப்படுவாராயின் அந்தப் பட்டியலில் முதலாவதாக இடம்பெற்றிருப்பவர் அமைச்சர் மைத்திரிபால சிறிசேனவே.

பாதுகாப்புச் செயலாளர் கோதாபய ராஜபக்ஷ,பொலிஸ்மா அதிபர் மஹிந்த பாலசூரிய, பிரதிப் பொலிஸ்மா அதிபர் சரத் சந்திர போன்றவர்கள் கொழும்பு, ஆனந்தா கல்லூரியின் பழைய மாணவர்கள் என்பது குறிப்பிடத்தக்கது. அமைச்சர் மைத்திரிபால சிறிசேன கடந்த 2009 ஆண்டு பண்டாரகமவில் இடம்பெற்ற கூட்டமொன்றில் கலந்து கொண்டு பின்னர் கொழும்பு திரும்பிக் கொண்டிருந்தபோது புலிகளின் தற்கொலைத் தாக்குதலுக்கு இலக்கு வைக்கப்பட்டிருந்தும் தெய்வாதீனமாகத் தப்பினார் என்பது குறிப்பிடத்தக்கது.