நிஜ வாழ்வுக்கும், கற்பனை உலகிற்கும் உள்ள வேறுபாடுகள் தெரியாத மனம் - சைக்கோசிஸ்

விசித்திரமான மன நோய்களில் ஒன்று `சைக்கோசிஸ்'. நிஜ வாழ்வுக்கும், கற்பனை உலகிற்கும் உள்ள வேறுபாடுகள் தெரியாமல் மனம் அலைபாய்வதே இவ்வியாதியாகும். மருத்துவர்கள் இதை ஒரு மனோ வியாதியாக கருதுவதில்லை. பல மனநோய்களின் அறிகுறியாக கருதுகிறார்கள். சிகிச்சையால் இதை பூரணமாக குணப்படுத்த முடியும். அவர்களை ஒதுக்காமல், ஒத்துழைத்தால் எளிதில் நலமடைவார்கள்.

***

சைக்கோசிஸ் நோயால் பாதிக்கப்பட்டவரிடம் 1. மாய புலன் உணர்வுகள் 2. பிறழ் நம்பிக்கை 3. குழப்பமான எண்ணங்களில் சிக்கியிருத்தல் போன்ற அறிகுறிகள் காணப்படும்.

இத்தகைய மாற்றங்கள் பிறருக்குத்தான் தென்படும். ஆனால் பாதிக்கப்பட்ட அவருக்கு தனக்குள் இந்த மாற்றங்கள் ஏற்பட்டிருக்கிறது என்ற விழிப்புணர்வே இல்லாமல் இருப்பார். தான் சரியாக இருப்பதாக எண்ணிக் கொண்டு, நோய் பாதிப்பை நினைத்தே பார்க்க மாட்டார்.

***

ஐம்புலன்கள் கொண்டுதான் நாம் எந்த ஒரு உணர்வையும் அறிய முடியும். ஆனால் சைக்கோசிஸ் பாதிப்பு உள்ளவர்கள் தானாகவே சப்தம் கேட்பதாகவும், உருவத்தை பார்த்ததாகவும் கூறுவார்கள். அவற்றின் பேச்சுக்கு பதிலளிக்கவும், அவை இடும் கட்டளைகளை ஏற்று செயல்படவும் செய்வார்கள். மூக்கு துர்வாசனையை நுகரும். நாக்கிற்கு கெட்ட சுவை தெரியும். உடலில் பூச்சிகள் ஊறுவதுபோல உணர்வார்கள். இந்த உணர்வுகள் அவ்வப்போது தோன்றி மறையலாம்.

***

பிறழ் நம்பிக்கை என்பது ஒன்றைப் பற்றித் தவறாக, மிகவும் உறுதியாக நம்பிக் கொண்டிருப்பதாகும். உதாரணமாக மற்றவர்கள் அவர்களைக் கொல்லப் போவது போலவும், அவர்களுக்கு எதிராகச் செயல்படுவதாகவும் நினைப்பார்கள். இதனால் சாப்பிடுவது, தண்ணீர் பருகுவது போன்றவற்றைக்கூட தவிர்ப்பார்கள். சிலருக்கு அவர்கள் கடவுள் என்பதாக எண்ணங்கள் தோன்றும். அந்த நம்பிக்கையில் தகாத செயல்களில் ஈடுபட்டு சிக்கலில் மாட்டிக் கொள்வர்.

***

பாதிக்கப்பட்ட சிலருக்கு, எண்ணங்கள் கோர்வையாக இல்லாமல் இருக்கும். இதனால் இவர்களின் பேச்சு ஒன்றுக்கொன்று சம்பந்தமில்லாமல் இருக்கும். எளிதில் உணர்ச்சிவசப்பட்டு கோபம், அழுகை, சந்தோஷத்தை வெளிப்படுத்துவர். தங்களுடைய எண்ணங்கள் மற்றும் உணர்வுகள் தவறானவை, கற்பனையானவை என்று இவர்கள் அறியமாட்டார்கள். அதை விளக்கிச் சொன்னாலும் புரிந்து கொள்ள மாட்டார்கள். எனவே சிகிச்சைக்கு ஒத்துழைக்க மறுப்பார்கள்.

***

டோபமின் (Dopamine) எனும் புரதம் மூளையில் அதிகமானால் சைக்கோசிஸ் பாதிப்பு தோன்றுவதாக ஆராய்ச்சியாளர்கள் கண்டுபிடித்துள்ளனர். பல்வேறு காரணங்களால் டோபமின் அதிகரிக்கும். மலேரியா, எய்ட்ஸ், அல்சீமர் போன்ற வியாதிகள் தாக்குவதால் மற்றும் போதைப்பழக்கம் இருப்பதால் டோபமின் அதிகரித்து சைக்கோசிஸ் பாதிப்பு வரலாம். குடும்பத்தில் ஒருவருக்கு பாதிப்பு இருந்தால் மரபு வழிக்காரணங்களால் மற்றவருக்கும் இந்நோய் கடத்தப்படலாம்.

***

மிகுந்த மன அழுத்தம் அல்லது பதட்டம், அதிக மனச்சோர்வு, அதிக தூக்கமின்மை போன்றவையும் இந்நோய் ஏற்படும் வாய்ப்பை அதிகரிக்கும். தொடர் சிகிச்சையின் மூலம் நோயை எளிதில் கட்டுப்படுத்த முடியும். இயல்பு வாழ்க்கைக்கு திரும்ப வைக்க முடியும். ஊசி- மாத்திரைகள் மூலமாக டோபமின் அளவை சீர் செய்வதன் மூலம் குணமாக்கி விடலாம். சிகிச்சையை டாக்டர்கள் ஆலோசனையின்றி நிறுத்தக்கூடாது. இல்லாவிட்டால் மீண்டும் அறிகுறிகள் தென்பட்டு அதிகமான பாதிப்புகள் உருவாகும்.

***

சைக்கோசிஸ் வியாதி ஒருவரை அபாயகரமானவராக மாற்றிவிடும் என்றும் சிலர் நம்புகிறார்கள். பாதிக்கப்பட்டவரின் தவறான நம்பிக்கைகளால் ஒருசில தீய செய்கைகளில் அவர் ஈடுபடக்கூடும். ஆனால் அவரிடம் எல்லா நேரங்களிலும் அந்த எண்ணம் இருக்காது. திருமணம் செய்து வைத்தால் நோய் சரியாகிவிடும் என்று சிலர் நினைத்துக் கொள்கிறார்கள். இது மிகவும் தவறானது. அது நோயை அதிகப்படுத்தி விடக்கூடும்.

***

கோவிலுக்குச் செல்வது, பரிகாரம் செய்வது போன்றவற்றால் பாதிக்கப்பட்டவரின் நம்பிக்கை சார்ந்த விஷயங்களில் சில முன்னேற்றம் ஏற்படலாம். ஆனாலும் சிகிச்சை மூலமே நோயைக் குணப்படுத்த முடியும்.

குறிப்பிட்ட யோகா பயிற்சிகள் முதிர்மன நோயின் வீரியத்தை குறைக்கும். பயிற்சிகளை சரியான முறையில் செய்யாவிட்டால் நோய் மோசமடைய வாய்ப்புள்ளது. எனவே நல்ல குருவுடன் பயிற்சி செய்ய வேண்டும். பயிற்சியை இடையில் நிறுத்தவும் கூடாது.

தினதந்தி!

அறியவேண்டிய அரிய தகவல்.. அறியத்தந்தமைக்கு நன்றி சிவா..!
- நார்மலான்