பட்டப்பகலில் பரபரப்பு சம்பவம்

கோவை சாய்பாபா காலனி போலீஸ் நிலையம் அருகே மேட்டுப்பாளைய சாலையில் இன்று காலை 10.15 மணிக்கு அதிக மக்கள் நடமாட்டம் இருந்த நேரத்தில் 28 வயது மதிக்கதக்க வாலிபர் ஒருவர் 20 வயது மதிக்கத்தக்க பெண்ணை துரத்தியபடி சென்றார். முதலில் கையை பிடித்து இழுத்து அந்த பெண்ணை நிறுத்த முயன்றார். முடியவில்லை.

பின்னர் அந்த பெண் அணிந்திருந்த சுடிதாரை பிடித்து இழுத்தார். வேறு வழியில்லாமல் அந்த பெண் நின்று விட்டார். வருவியா... வரமாட்டீயா... எனக்கு கல்யாணத்தில் இஷ்டம் இல்லை. வேறு பெண்ணை பார்த்து நிச்சயம் பண்ணிட்டாங்க. உன்னை மறக்க முடியவில்லை. ஏமாத்தனும்னு நினைக்கலை என்று கூறியபடியே தனது தோல் பையில் இருந்த திருமண அழைப்பிதழ்களை எடுத்து கிழித்து வீசினார்.

இப்போதாவது என்னை நம்பி வா... ஓடிபோய் கல்யாணம் பண்ணிக்கலாம் என்று உணர்ச்சிபொங்க பேசினார். உடனே அப்பெண் உன்னைபோய் நம்பினேன் எனக்கு இது தேவைதான். உன்னுடன் பேச பிடிக்க வில்லை. என்னை விட்டுவிடு உன் பொண்டாட்டி கூட சந்தோஷமா வாழு. நான் செத்து போறேன் என்ற படியே அந்த பெண் நடையை கட்ட முயன்றார்.

எவ்வளவு சொல்லியும் கேட்கமாட்டியா என்றபடியே ஆவேசத்தில் கத்திய அந்த வாலிபர் அந்த பெண்ணை பிடித்து தலையிலும், கன்னத்திலும் “பளார்... பளார்...” என அறைவிட்டார். நீ என்ன சாகிறது நானே உன்னை சாகடிக்கிறேன் என்றபடி அவளது கழுத்தை கைகளால் இறுக்கி பிடித்து கொல்ல முயன்றார். மூச்சுதிணறிய அந்த பெண் கூச்சலிட்டதும் அந்த வழியாக வாகனத்தில் வந்தோரும், எதிர்முனையில் இருந்த வேன் ஸ்டாண்டு டிரைவர்களும் அந்த பெண்ணை காப்பாற்ற ஓடி வந்தனர்.

அக்கம்பக்கத்தினர் திரண்டு வந்ததை பார்த்ததும் அந்த வாலிபர் கழுத்தை இறுக்குவதை விட்டு விட்டு தலைமுடியை பிடித்தார். அதற்குள் சுதாரித்துக் கொண்ட அந்த பெண் அவர் பிடியில் இருந்து நழுவி சென்றார். வாகன ஓட்டிகள் அந்த வாலிபரை பிடிக்க முயன்ற போது அவர் அங்கிருந்து தப்பி ஓடிவிட்டார்.

இதுகுறித்து சாய்பாபா காலனி போலீசாருக்கு பொதுமக்கள் தகவல் தெரிவித்தனர். ஆனால் அவர்கள் அந்த வாலிபரை பிடிக்க முடியவில்லை. அங்கு கிழிந்து கிடந்த பத்திரிக்கைகளை கைப்பற்றி விசாரித்தனர்.

அதில் அவர் பெயர் விவரம் இடம்பெற்றிருந்தது. அதைவைத்து அவர் சிவானந்தா காலனியை சேர்ந்தவர் என்பது கண்டுபிடிக்கப்பட்டது. போலீசார் அந்த வாலிபரை தேடி வருகிறார்கள். பட்டப்பகலில் நடந்த இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.