கெந்திங்கில் விபத்துக்குள்ளான பேரூந்தின் ஓட்டுநருக்கு வாகனமோட்டும் லைசென்சு கிடையாது

நேற்றிரவு, கெந்திங் செம்பா சாலையின் 38வது கிலோ மீட்டரில், சாலையில் சறுக்கி, குப்புறக் கவிழ்ந்த ஒரு
பேருந்தை ஓட்டி வந்தவர் வாகனமோட்டும் லைசென்சைக் கொண்டிருக்கவில்லை என கூறப்பட்டுள்ளது. அந்த கோர விபத்தில் எழுவர் உயிரிழந்தனர்; மேலும் 39பேர் காயமுற்றனர்.

அந்த ஓட்டுநர், வாகனமோட்டும் லைசென்சைப் பெற்றிருக்கவில்லை என்பதை சாலைப் போக்குவரத்துத் துறை உறுதிப்படுத்தியுள்ளதாக சிலாங்கூர் பொது ஒழுங்கு, போக்குவரத்துத் தலைவர் சூப்ரிண்டெண்டன் சே ஹூசென் ஒமார் தெரிவித்தார்.

தொடக்கத்தில், தாம் வாகனமோட்டும் லைசென்சை வைத்திருந்ததாக போலீசாரிடம் அந்த நபர் கூறிக் கொண்டார். ஆனால் ஜேபிஜே மேற்கொண்ட சோதனையில் அதனை அவர் கொண்டிருக்கவில்லை என்று தெரியவந்ததாக சே ஹூசென் மேலும் கூறினார்.

அந்த பேரூந்து ஓட்டுநருக்கு வலது காலில் முறிவு ஏற்பட்டுள்ளது. தற்போது அவர் கோலாலம்பூர் மருத்துவமனையில் சிகிச்சை பெற்று வருவதுடன், மேல் விசாரணைக்காக தடுத்தும் வைக்கப்பட்டுள்ளார்.

1987ஆம் ஆண்டு சாலைப் போக்குவரத்துச் சட்டத்தின் பிரிவு 41ன் கீழ், கவனக்குறைவாக வாகனத்தைச் செலுத்தி, மரணங்களை விளைவித்ததற்காக அவர் விசாரணை செய்யப்படுவார்.

அந்த வாகனமோட்டி, இன்று தொடக்கம் நான்கு நாட்களுக்கு தடுப்புக் காவலில் வைக்கப்படுவாரென கோம்பாக் போலீஸ் தலைவர் ஏசிபி அப்துல் ரஹிம் அப்துல்லா கூறினார்.

மேலும் அந்த கறுப்புப் பெட்டியை போலீசார் சோதனை செய்வதுடன், கடந்த காலங்களில் சம்பந்தப்பட்ட பஸ் ஓட்டுநர் போக்குவரத்துக் குற்றம் ஏதும் புரிந்துள்ளாரா என்பதையும் விசாரிப்பர் என்று சே ஹூசேன் தெரிவித்தார்.

கெடா பாலிங்கின், பல்வேறு கிராமங்களைச் சேர்ந்த 14வயதுக்கும் 25 வயதுக்கும் உட்பட்ட 44 இளைஞர்களை ஏற்றிக் கொண்டு, அந்த பஸ், கடந்த வியாழன் இரவு 11 மணியளவில் கெடாவிலிருந்து புறப்பட்டு, மறு நாள் வெள்ளிக்கிழமை காலை எட்டு மணியளவில் கெந்திங் மலை சென்றடைந்தது.

நேற்றிரவு 7 மணியளவில், கெந்திங் மலையிலிருந்து புறப்பட்டு, ஹோம்ஸ்டே திட்டத்தில் பங்கேற்பதற்காக
கம்போங் மெலாயு சுபாங்கை நோக்கி பயணித்துக் கொண்டிருந்தபோது அந்த பேரூந்து விபத்துக்குள்ளானது.
அதில் எழுவர் உயிரிழந்தனர். 17 பேர் கடுமையாக காயமுற்றனர். இரண்டு பஸ் ஓட்டுநர்கள் உட்பட் 22 பேருக்கு சொற்ப காயங்கள் ஏற்பட்டன.

இதனிடையே சாலைப் பாதுகாப்புத் துறையும், மலேசிய சாலைப் பாதுகாப்பு ஆராய்ச்சிக் கழகமும் புலனாய்வுகளை மேற்கொள்ளும் என அத்துறையின் தலைமை இயக்குநர் சூரெட் சிங் அறிவித்துள்ளார்.

புலனாய்வுகளின் முடிவுகள், இன்னும் இரண்டு அல்லது மூன்று வாரங்களில் முற்றுப் பெறும். அதை தொடர்ந்து, நவம்பருக்குள் அந்த அறிக்கை அமைச்சரவையிடம் சமர்ப்பிக்கப்படும்.

இன்று யுஎஸ்ஜேயில், சாலைப்பாதுகாப்பு இயக்கத்தையும் கண்காட்சியையும் தொடக்கி வைத்த பின்னர், நிருபர்களிடம் சூரெட் சிங் பேசினார்.