கத்தார் சிறையில் உள்ள மீனவர்கள்: முதல்வர் கடிதம்

by **சிவா** Sat Oct 30, 2010 8:01 am

சென்னை :கத்தார் நாட்டு சிறையில் உள்ள தமிழக மீனவர்களுக்கு சட்ட உதவிகள் செய்து, அவர்களை உடனடியாக விடுவிக்க நடவடிக்கை எடுக்குமாறு மத்திய வெளியுறவுத் துறை அமைச்சருக்கு முதல்வர் கருணாநிதி கடிதம் எழுதியுள்ளார்.

மத்திய வெளியுறவுத் துறை அமைச்சர் கிருஷ்ணா, வெளிநாடு வாழ் இந்தியர்களுக்கான அமைச்சர் வயலார் ரவி ஆகியோருக்கு முதல்வர் கருணாநிதி எழுதியுள்ள கடிதம்: தமிழகத்தில் கன்னியாகுமரி, ராமநாதபுரம் மாவட்டங்களைச் சேர்ந்த மீனவர்கள் 43 பேர், சவுதி அரேபியா மற்றும் பக்ரைனில் மீனவர்களாக வேலை பார்க்கச் சென்றுள்ளனர். இவர்கள் கத்தார் நாட்டு கடல் எல்லைக்குள் மீன் பிடிக்கச் சென்றதால், அந்நாட்டு அரசு இவர்களை கைது செய்து சிறையில் அடைத்துள்ளது.

இப்பிரச்னை குறித்து, மத்திய வெளியுறவு அமைச்சகத்தின் மூலம் தோகாவில் உள்ள இந்திய தூதரகத்துக்கு தமிழக அரசு ஏற்கனவே தெரியப்படுத்தியுள்ளது. சிறையில் உள்ள மீனவர்களுக்கு உரிய சட்ட உதவிகளை செய்து, கத்தார் நாட்டு அரசுடன் பேசி உடனடியாக அந்த அப்பாவி மீனவர்களை மனிதாபிமான அடிப்படையில் விடுதலை செய்வதற்கு தாங்கள் நடவடிக்கை எடுக்க வேண்டும்.இவ்வாறு முதல்வர் கருணாநிதி தெரிவித்துள்ளார்.

தினமலர்