டைரக்டர் பேரரசுவிற்கு கோர்ட் உத்தரவு

டைரக்டர் பேரரசுவிற்கு கோர்ட் அதிரடி உத்தரவு பிறப்பித்துள்ளது. சிவகங்கை மாவட்டம், நாட்டரசன்கோட்டையை சேர்ந்தவர் டைரக்டர் பேரரசு. இவருக்கும், ஈரோடு மாவட்டம் பவானியை சேர்ந்த சாந்திக்கும் கடந்த 2000ம் ஆண்டு திருமணம் நடந்தது. இவர்களுக்கு விருத்திகா என்ற பெண் குழந்தை உள்ளது. பேரரசு உதவி இயக்குநராக இருந்தபோது இவர்களது திருமணம் நடந்தது. கல்யாணத்தின்போது சாந்தி வீட்டு சார்பில் வரதட்சணையாக நகை, பணம் கொடுக்கப்பட்டது. இருவரும் தனிக்குடித்தனம் நடத்தி வந்தனர்.

பின்னர் பேரரசு இயக்குநராக மாறியதும், கணவன், மனைவிக்குள் கருத்து வேறுபாடு ஏற்பட்டு இருவரும் பிரிந்தனர். சாந்தி தனது தாய் வீட்டுக்குச்சென்று விட்டார். 2006ம் ஆண்டு கணவருடன் தன்னை சேர்த்து வைக்கக் கோரி பவானி கோர்ட்டில் சாந்தி வழக்கு தொடர்ந்தார். வழக்கு விசாரணையின்போது அவர் சரியாக ஆஜராகாததால், பேரரசுக்கு சாதகமாக விவாகரத்து வழங்கப்பட்டது. அதன் பின்னர் 2007ம் ஆண்டு சாந்தி குடும்ப நல கோர்ட்டில் வழக்கு தொடரப்பட்டது. அதில், தான் பழைய முகவரி கொடுத்ததால், வழக்கு விசாரணை தனக்குதெரியாமல் போய்விட்டது. எனவே விவாகரத்து வழங்கியது செல்லாது என அறிவிக்க வேண்டுமென குறிப்பிட்டிருந்தார்.

அந்த வழக்கு நிலுவையில் உள்ள நிலையில், சாந்தி மேலும் மனு தாக்கல் செய்தார். அதில், கணவரை பிரிந்து வாழ்வதால், தானும் தன் மகளும் மிகுந்த சிரமப்படுவதாகவும், மாதந்தோறும் தனக்கு 10 ஆயிரமும், மகளுக்கு 5,000 ஜீவனாம்சமாக வழங்க வேண்டும், என்று கூறியிருந்தார். மனுவை விசாரித்த பவானி கோர்ட், டைரக்டர் பேரரசுவிற்கு தனது மனைவி மற்றும் குழந்தைக்கு ஜீவனாம்சமாக மாதம் ரூ.15 ஆயிரம் வழங்க வேண்டும் என்று அதிரடி உத்தரவு பிறப்பித்தது. இநத உத்தரவை எதிர்த்து பேரரசு, சென்னை ஐகோர்ட்டில் ஒரு மனு தாக்கல் செய்தார். அந்த மனுவை விசாரித்த ‌கோர்ட், பேரரசுவின் மனுவை தள்ளுபடி செய்ததுடன், குடும்ப நல கோர்ட் அளித்த தீர்ப்பை உறுதி செய்து, ஜீவனாம்சம் வழங்கும்படி உத்தரவிட்டது.