காங்கிரஸ் கட்சியை தங்கபாலு முடக்கி விட்டார்: இளங்கோவன்

""தமிழக காங்கிரஸ் முடங்கிக் கிடக்கிறது,'' என, முன்னாள் மத்திய அமைச்சர் இளங்கோவன் தெரிவித்தார்.



மறைந்த காங்கிரஸ் தலைவர் வாழப்பாடி ராமமூர்த்தியின் 8வது நினைவு தினம் நேற்று அனுஷ்டிக்கப்பட்டது. சத்தியமூர்த்தி பவனில் அலங்கரித்து வைக்கப்பட்டிருந்த அவரது உருவப்படத்திற்கு, தமிழக காங்கிரஸ் தலைவர் தங்கபாலு மலர் தூவி அஞ்சலி செலுத்தினார். இந்நிகழ்ச்சியில் காங்கிரஸ் பிரமுகர்கள் பலர் கலந்து கொண்டனர். சென்னை ராஜா அண்ணாமலைபுரத்தில் உள்ள வாழப்பாடி ராமமூர்த்தியின் சிலைக்கு, முன்னாள் மத்திய அமைச்சர் இளங்கோவன் மாலை அணிவித்து மரியாதை செலுத்தினார். இந்நிகழ்ச்சியில் ரங்கபாஷ்யம், சைதை தேவதாஸ் உட்பட பலர் கலந்து கொண்டனர்.



இளங்கோவன் நிருபர்களிடம் கூறியதாவது: தமிழக காங்கிரஸ் கட்சியை முதன்மை கட்சியாக வளர்ப்பதற்கு ராமமூர்த்தி, மூப்பனார் போன்றவர்கள் பாடுப்பட்டனர். அவர்கள் தலைமை பொறுப்பு வகித்து வந்த போது துடிப்புடன் இருந்த காங்கிரஸ் கட்சியை தற்போதைய தலைவர் தங்கபாலு முடக்கி வைத்துள்ளார். விரைவில் தமிழக காங்கிரஸ் தலைமை மாறும் என்ற நம்பிக்கை எங்களுக்கு இருக்கிறது. காங்கிரஸ் கட்சிக்கு புத்துயிர் அளித்து தமிழகத்தில் அதை ஒரு வலுவான இயக்கமாக வளர்ப்பதற்காக நாங்கள் பாடுபட்டு வருகிறோம். அதற்குரிய சரியான மாநில தலைமை எங்களுக்கு வேண்டும். திருமாவளவன் தூண்டுதலின் பேரில், ஈரோடு இளைஞர் காங்கிரஸ் சுரேஷ் தாக்கப்பட்டுள்ளார். அவரை தாக்கியவர்கள் மீது போலீசார் உரிய நடவடிக்கை எடுக்க வேண்டும். திருமாவளவன் வன்முறையை தூண்டும் செயலை கைவிட வேண்டும். தான் செய்த குற்றத்தை மறைப்பதற்காக சோனியாவுக்கு திருமாளவன் கடிதம் எழுதியுள்ளார். இவ்வாறு இளங்கோவன் கூறினார்