வைரமுத்துவின் நவீன தாலாட்டு.

வைரமுத்துவின் நவீன தாலாட்டு. (ரசித்த கவிதை)

சோலைக்கு பிறந்தவளே!
சுத்தமுள்ள தாமரையே!
வேலைக்கு போகின்றேன் - வெண்ணிலவே கண்ணுறங்கு!

அலுவலகம் விட்டு -
அம்மா வரும் வரைக்கும் -
கேசட்டில் தாலாட்டு - கேட்டபடி கண்ணுறங்கு!

ஒரு மணிக்கு ஒரு பாடல்
ஒளிபரப்பும் வானொலியில்
விளம்பரங்கள் மத்தியில் - விழி சாத்தி நீயுறங்கு!

9 மணி ஆனால் உன் அப்பா சொந்தமில்லை -
9:30 மணி ஆனால் உன் அம்மா சொந்தமில்லை -
ஆயாவும் தொலைக்காட்சியும் அசதியில் தூங்கிவிட்டால் -
தூக்கத்தைத் தவிர துணைக்கு வர யாருமில்லை!

20-ம் நூற்றாண்டில் என் கருவில் வந்தவளே!
இது தான் கதியென்று - இன்னமுதே கண்ணுறங்கு!

தூரத்தில் இருந்தாலும் தூயவளே -
உன் தொட்டில் ஓரத்தில் -
என் நினைவு - ஓடிவரும் கண்ணுறங்கு!

பேருந்தில் நசுங்கி, பிதுங்கி போகிற வேளையிலும்
எடை கொஞ்சம் இழந்து இறங்குகின்ற வேளையிலும்
பூப்பூவாய் உனது முகம் புறப்பட்டு வரும் கண்ணே!

தந்தை வந்து கொஞ்சுவதாய் -
தங்க மடியில் தூங்குவதாய் -
கண்ணனே கண்மணியே - கனவு கண்டு - நீயுறங்கு!

புட்டிப்பால் குறையவில்லை -
பொம்மைக்கும் பஞ்சமில்லை -
தாய்ப்பாலும் தாயும் இன்றி -
தங்க மகனுக்கு என்ன குறை?

மாலையிலே ஓடி வந்து
மல்லிகையே உன்னை அணைத்தால்
சுரக்காத மார்பும் சுரக்குமடி- கண்ணுறங்கு!

தாலாட்டுப் பாட்டில் தளிரே - நீ
தூங்கிவிட்டால கோலாட்டம் ஆட
கொண்டவனுக்கும் ஆசை வரும்!

உறவுக்கு தடையாக
'ஒ' என்று அலறாமல் -
இரவுக்கும் மிச்சம் வைத்து
இப்போது - நீ உறங்கு!

தாயென்று காட்டுவதற்கும்
தாவி எடுப்பதற்கும்
ஞாயிற்றுகிழமை வரும் - நல்லவளே கண்ணுறங்கு!

- வைரமுத்து.

by balakarthik Tue Oct 26, 2010 12:49 pm

by kalaimoon70 Tue Oct 26, 2010 2:44 pm

எனது ஆசான் வைரமுத்துவின் வரிகள் தந்து என்னை மகிழ்வித்த தோழருக்கு நன்றி .

by **Aathira** Sun Nov 07, 2010 5:20 pm

20 ஆம் நூற்றாண்டு தாயின் ஏக்கத் தாலாட்டு. எத்தனை முறை படித்தாலும் மீண்டும் மீண்டும் படிக்க ஆர்வமாய்... பதிவுக்கு ந்னறி கலயாண்.

by ரபீக் Sun Nov 07, 2010 5:24 pm

by உதயசுதா Sun Nov 07, 2010 6:12 pm

இதுதானுங்க இன்னிக்கு வேலைக்கு போற பொண்ணுகளோட நிலைமை. பெரும்பான்மையான வேலைக்கு போற பொண்ணுகளுக்கு பொருளாதார நிலை விரட்டி விரட்டி அடிக்குரதாலதான் இப்படி குழந்தைய விட்டுட்டு போற நிலை.