மோடி மேஜிக் எல்லா இடத்திற்கும் வேலைக்கு ஆகாது: சுஷ்மா!

மோடி மேஜிக் எல்லா இடத்திலும் வேலை செய்யாமல் போகலாம் என்று பாரதீய ஜனதா கட்சியின் மூத்த தலைவர் சுஷ்மா ஸ்வராஜ் கூறியுள்ளதை அடுத்து, பீகார் தேர்தலில் பாஜக - ஐக்கிய ஜனதா தளம் கூட்டணியை ஆதரித்து நரேந்திர மோடி பிரச்சாரம் செய்ய மாட்டார் என்பது உறுதியாகியுள்ளது.

பீகாரில் நரேந்திர மோடி பிரச்சாரம் செய்யக் கூடாது என்று பீகார் முதல்வர் நிதீஷ் குமார் நிபந்தனை எதுவும் விதிக்கவில்லை என்று கூறிய சுஷ்மா ஸ்வராஜ், 2005 மற்றும் 2009 ஆம் ஆண்டுகளில் நடைபெற்ற தேர்தல்களின் போதும் மோடி பிரச்சாரம் செய்யவில்லை என்று கூறினார்.

மோடி மேஜிக்கும் அவரது புகழும் குஜராத்தில் நல்ல பலனைத் தந்துள்ளது. ஆனால் ஒவ்வொருவரின் மேஜிக் அனைத்துப் பகுதிகளிலும் பலனைத் தர வேண்டிய அவசியம் இல்லை என்று சுஷ்மா ஸ்வராஜ் கூறினார்.

பீகாரில், நிதீஷ் குமார் மற்றும் சுஷில் குமார் மோடி ஆகியோரின் மேஜிக் பலனைத் தந்து கொண்டுள்ளது. எனவே நாங்கள் வெற்றி பெறுவோம் என்று நம்புகிறேன் என்றும் அவர் கூறினார்.

நரேந்திர மோடி பீகாரில் பிரச்சாரத்தில் ஈடுபட வேண்டும் என்றோ வேண்டாம் என்றோ நிதீஷ் குமார் எவ்வித நிபந்தனையையும் விதிக்கவில்லை. பீகாரில் தேர்தல் பிரச்சாரத்தில் யார் ஈடுபட வேண்டும் யார் பிரச்சாரம் செய்யக் கூடாது என்று முடிவெடுப்பது பாஜகவின் தனிப்பட்ட விஷயம் என்றும் அவர் கூறினார்.

ஐக்கிய ஜனதா தளத்தின் கொள்கையும் பாஜகவின் கொள்கையும் வெவ்வேறானவை என்று முதல்வர் நிதீஷ் குமார் கூறியது குறித்து செய்தியாளர்கள் கேட்டபோது, இரு கட்சிகளின் கொள்கையும் ஒன்றாக இருந்திருந்தால், இரு கட்சிகளும் ஒன்றாக இணைந்திருக்குமே என்று சுஷ்மா பதில் அளித்தார்.

thatstamil