கிடைத்த ஒரு தங்கப்பதக்கமும் பறிபோகும் நிலை!

by நிசாந்தன் Mon Oct 25, 2010 3:13 pm

புதுடில்லியில் நடந்த காமன்வெல்த் போட்டிகளில் குத்துச்சண்டை விளையாட்டில் மட்டும் இலங்கைக்கு ஒரேயொரு தங்கப்பதக்கம் கிடைத்தது. 72 ஆண்டுகளின் பின்னர் இலங்கைக்குக் கிடைத்த பதக்கம் இதுவென்பது குறிப்பிடத்தக்கது. ஆனால் அந்தத் தங்கப்பதக்கமும் பறிபோகும் நிலை ஏற்பட்டுள்ளது. இப்பதக்கத்தை வென்ற மஞ்சு வன்னியாராச்சியைச் சோதனை செய்தபோது அவர் ஊக்கமருந்து உள்ளெடுத்திருந்தமை தெரியவந்துள்ளது. ஆனால் இதுகுறித்து தமக்கு இன்னமும் உத்தியோகபூர்வ அறிவித்தல் எதுவும் கிடைக்கவில்லை என்றும் நாளை திங்கட்கிழமையே தமக்கு விவரம் தெரியவரும் என்று இலங்கை கூறியுள்ளது.

காமன்வெல்த் போட்டியின்போது எடுக்கப்பட்ட மஞ்சுவின் சிறுநீரைச் சோதனை செய்தபோதே தடைசெய்யப்பட்ட ஊக்கமருந்தான நண்ட்ரலோன் இருப்பது கண்டுபிடிக்கப்பட்டுள்ளது. எனினும் அவரிடமிருந்து எடுக்கப்பட்ட இன்னொரு சிறுநீரும் பரிசோதிக்கப்படவுள்ளது. அதிலும் இம்மருந்து இருப்பது உறுதிப்படுத்தப்பட்டால் அவருக்குக் கொடுக்கப்பட்ட தங்கப்பதக்கம் மீளப்பறிக்கப்படும் நிலை உருவாகும். இந்த பரிசோதனை முடிவுகள் குறித்த விளக்கத்தை அளிக்க மஞ்சுவுக்கு 14 நாட்கள் அவகாசம் வழங்கப்பட்டுள்ளது.

இதற்கிடையில், குருநாகலையைச் சேர்ந்த மருத்துவம் ஒருவர் கொடுத்த விற்றமின் மாத்திரையிலேயே இந்த ஊக்கமருந்து இருந்ததாகக் கூறப்படுகிறது. அவ்விற்றமின் மாத்திரையில் தடைசெய்யப்பட்ட ஊக்கமருந்து இருந்தமை மஞ்சுவுக்குத் தெரியாது என்றும் கூறி மழுப்பப்படுகிறது. இதேபோலத்தான் தடகள வீராங்கனை சுசந்திகா ஜயசிங்கவின் மீதும் குற்றம் சாட்டப்பட்டு, பின்னர் அது நிராகரிக்கப்பட்டதாம்.