தன்னைத் தானே திருமணம் செய்யும் பெண்!

ரபீக் · ரபீக் Sun 24 Oct 2010 - 18:01

சென் வேய் என்ற தைவான் நாட்டுப் பெண் தனது திருமண அறிவிப்பை இணையத்தில் வெளியிட்டார். வெள்ளி உடையில் தனது போட்டோவுடன் ஒரு அரங்கில் தனது நண்பர்களுடன் தனது திருமணம் நடக்கவிருப்பதாகத் தெரிவித்திருந்தார். ஆனால் அங்கு மணமகன் பற்றிய தகவல் இல்லை. ஆம் அவர் தன்னைத் தானே திருமணம் செய்து கொள்ளப் போகின்றார்.

அடுத்தமாதம் தனது திருமண வரவேற்பை நடத்தவுள்ள 30 வயதான சென் வேய், தாய்பெயில் ஒரு நிறுவனத்தில் பணிபுரிகின்றார். தனக்கு நல்ல வேலை, போதுமான வருமானம் இருந்தும் இதுவரை வாழ்க்கைத் துணை கிடைக்காததால், தன் மீதுள்ள சமுதாய அழுத்தத்தின் காரணமாக இந்த முடிவை எடுத்துள்ளார். தான் திருமண பந்தத்திற்கு எதிரானவர் இல்லை. ஆனால் திருமணம் மீதுள்ள சமுதாயத்தின் நீண்ட நாள் பார்வையை மாற்றவே இவ்வாறு செய்வதாகவும், தன்னைப் போல் இன்னும் நிறைய பெண்கள் திருமணமாகாமல் உள்ளனர் என்றும் அவர் தெரிவித்தார்.

தன்னைப் போல் பலபேர் தம்மைத் தாமே விரும்பக் கூடியவர்களாக இருப்பதாகத் தெரிவித்த சென், தனது தேன் நிலவுக்காக ஆஸ்திரேலியா செல்லவிருப்பதாகவும் தெரிவித்தார். முதலில் ஒரு ஆணோடுதான் திருமணம் செய்துகொள்ள வேண்டும் என்று வலியுறுத்திய இவரின் தாயார் பின்னர் தனது தனித்த திருமணத்திற்குச் சம்மதம் வழங்கி விட்டதாகவும் சென் கூறினார். மேலும் ஒரு நல்ல மணமகன் கிடைத்தால் அவரை மீண்டும் திருமணம் முடிக்க தான் தயாராகவே இருப்பதாகவும் தெரிவித்தார்.

தைவான் நாட்டின் சட்டப்படி சென் தனது திருமணத்தை அரசாங்க முறைப்படி பதிவு செய்யமுடியாது.

இணையத்தில் வெளியான இவரது திருமண அறிவிப்பை தொடர்ந்து 50,000 டாலர்கள் இவருக்கு அன்பளிப்பாக வந்துள்ளது. மேலும் 1,800 அனுதாப பின்னூட்டங்களும் இடப்பட்டுள்ளன.

தைவான் நாட்டின் மக்கள்தொகை கணிசாமாக குறைந்துள்ளதாகவும் இதனால் நாட்டின் முன்னேற்றம் பாதிக்கப்பட்டுள்ளதாகவும் தைவான் அரசு தெரிவித்துள்ளது. இதற்க்கு தைவான் பெண்கள் தங்களின் பொருளாதார நிலை உயர்ந்த பின்னர் மிகத் தாமதாக திருமணம் முடிப்பதும் ஒரு காரணம். அந்நாட்டின் கல்வி அமைச்சகம் 40 சதவிகித பெண்களிடம் எடுக்கப்பட்ட கருத்துக்கணிப்பில் திருமணமானவர்கள் மிகவும் திருப்திகரமான வாழ்க்கையை வாழவதாக தெரியவந்துள்ளது.

இந்நேரம்