'இந்திய மாநிலமல்ல இலங்கை' : சிங்கள கட்சி கொதிப்பு: இலங்கை ராணுவம் முன்னேற்றம்

"இலங்கை, இந்தியாவின் மாநிலமல்ல; எங்களை அடக்கி ஆள முயலக்கூடாது. இந்தியாவின் அச்சுறுத்தலுக்கு அடிபணிய மாட்டோம்' என, சிங்கள கட்சிகளில் ஒன்றான தேசிய விடுதலை முன்னணி தலைவர் விமல் வீரவன்ச, கொழும்பில் நிருபர்களுக்கு பேட்டி அளித்தார்.அவர் மேலும் கூறியதாவது:விடுதலைப் புலிகளை முழுமையாக அழிக்கும் வெற்றிகரமான யுத்தத்தின் இறுதிக்கட்டத்தில் எங்களது படையினர் உள்ளனர். இதைத் தடுக்க, மேற்கு உலகம் பல்வேறு சதிகளை மேற்கொள்கிறது. ஐரோப்பிய ஒன்றியம் ஜி.எஸ்.பி., பிளஸ் வரியை ரத்து செய்வோம் என அச்சுறுத்தி வருகிறது. டில்லியும், வாஷிங்டனும் இணைந்து பிரபாகரனை பாதுகாக்கிற நாடகத்தை அரங்கேற்றுகின்றன.

தமிழக முதல்வர் கருணாநிதி, சர்வ கட்சியைக் கூட்டி, "இரண்டு வாரங்களில் இலங்கையில் போரை நிறுத்த மத்திய அரசு நடவடிக்கை எடுக்காவிட்டால், பார்லிமென்ட் உறுப்பினர்கள் 40 பேர் பதவி விலகுவர்' என, அச்சுறுத்தல் விடுத்துள்ளார்.தமிழக அரசியல்வாதிகளின் நீண்ட கால கனவு கலைந்து போவதை தாங்கிக் கொள்ள முடியாமல் போராட்டங்களை நடத்துகின்றனர்.இன்று தான் எமது படையினர் பிரபாகரனை சுற்றி வளைத்துள்ளனர். எனவே தான் போராட்டங்களை நடத்துகின்றனர்.

இலங்கை சுதந்திர நாடென பிரதமர் மன்மோகன் சிங், தமிழக தலைவர்களுக்கு தெளிவுபடுத்தி, இந்திய எல்லையை காண்பிக்க வேண்டும்.எங்கள் மக்கள் மன்மோகன் சிங்குக்கு ஓட்டளிக்கவில்லை. மகிந்தா ராஜபக்சேக்கு ஓட்டளித்து அதிபர் ஆக்கினர்.இவ்வாறு விமல் வீரவன்ச கூறினார்.இலங்கை அரசு சமாதான செயலர் ராஜிவ் விஜேசிங்கே கூறுகையில், "தமிழக கட்சிகளின் போராட்டம் உள்ளூர் அரசியலை நோக்காகக் கொண்டது' என்றார்.


புலிகள் முக்கிய தளம் வீழ்ச்சி: இலங்கை ராணுவம் முன்னேற்றம்: விடுதலைப் புலிகளின் கடைசி முக்கிய தளத்தைக் இலங்கை ராணுவம் கைப்பற்றியுள்ளது.இலங்கையில் விடுதலைப் புலிகளின் கட்டுப்பாட்டில் உள்ள பகுதிகளைக் கைப்பற்ற, ராணுவம் தீவிர தாக்குதல் நடத்தி வருகிறது. கிளிநொச்சி, முல்லைத் தீவு பகுதிகளில் தாக்குதல் உச்ச கட்டத்தை எட்டியுள்ளது. இலங்கையின் தற்போதைய போர் நிலவரம் குறித்து, அந்நாட்டு ராணுவ அமைச்சகம் தெரிவித்துள்ளதாவது:கிளிநொச்சியில் ராணுவம் நேற்று முன்தினம் தீவிர தாக்குதல் நடத்தியது. புலிகள் கடுமையான எதிர் தாக்குதல் நடத்தினர்.

கடுமையான பாதிப்பு : ராணுவ வீரர்கள் மீது, ரசாயன நச்சு வாயு தாக்குதலை நடத்தியதால், மெதுவாகவே முன்னேற முடிந்தது. இருந்தாலும், கடும் தாக்குதலை முறியடித்து, புலிகளின் கடைசி முக்கிய தளமாகக் கருதப்பட்ட அக்கரயாங்குளம் என்ற பகுதியை ராணுவம் கைப்பற்றியது. இந்த பகுதியில் புலிகளின் கட்டுப் பாட்டில் இருந்த மூன்று கி.மீ., சுற்றளவை, ராணுவம் தனது கட்டுப் பாட்டுக்குள் கொண்டு வந்துள்ளது. இந்த சண்டையில், ராணுவத்துக்கு கடுமையான பாதிப்பு ஏற்பட்டது. நாட்டுக்காக பல ராணுவ வீரர்கள் தங்கள் உயிர்களை தியாகம் செய்துள்ளனர்.புலிகளுக்கும் பலத்த சேதம் ஏற்பட்டது. புலிகளின் 19 பதுங்கு குழிகள் தகர்க்கப்பட்டன.


அங்கிருந்த ஏராளமான ஆயுதங்கள் மற்றும் வெடி பொருட்களையும் ராணுவத்தினர் கைப்பற்றினர். அடுத்த கட்டமாக, புலிகளின் கடற்படைத் தளமாகக் கருதப்படும் நச்சிக்குடாவை நோக்கி ராணுவம் முன்னேறி வருகிறது. முல்லைத் தீவு பகுதியிலும் ராணுவம் தீவிர தாக்குதல் நடத்தியது. இதில், ஏராளமான புலிகள் உயிரிழந்தனர்.இவ்வாறு ராணுவ அமைச்சகம் தெரிவித்துள்ளது