இதுதானே என் 'ஒய்ட்' (white)

by Guest Sat Oct 23, 2010 7:30 pm

"நான்கே வாரங்களில்... மென்மையான - மாசு மருவற்ற - நாசுக்கான - சிகப்பழகு... தரும் கிரீம்"

விளம்பரத்தில், ஏற்கனவே சிகப்பாய் இருக்கிறவங்க அந்த கிரீம் போட்டு, மேலும் சிகப்பழகைப் பெற்று கொள்கிறார்கள். கோதுமை மாவு முகம், கிரீம் போட்டு மைதா மாவு முகமாய் மாறுகிறது.

நியாயமான சந்தேகங்கள் - எண்ணங்கள்...

1. முகத்துக்கு மட்டும் போட்டு கொள்கிற facial cream - முக அழகு கிரீம் - என்று சொல்றாங்களே... முகம் மட்டும் வெள்ளையா இருந்து, கை கால், உடல் எல்லாம் வேற நிறத்துல இருந்தா, பார்க்க எப்படிங்க இருக்கும்? அழகாகவா
இருக்கும்? பாண்டா கரடி மாதிரி இருக்காது?

2. தன்னம்பிக்கை, தெய்வ நம்பிக்கை எல்லாம் முகங்கள் (மட்டும்) வெள்ளையாய் சிகப்பாய் இருக்கிறவங்களுக்கு மட்டும் தான் வருமா? சிகப்பழகுடன் தன் நம்பிக்கை ஊட்டும் கிரீம்... ஓ!

3. சிகப்பு மட்டும் தான் அழகா? இதை official-ஆ எப்பொழுது அறிவித்தார்கள், எங்கு அறிவித்தார்கள், எப்படி அறிவித்தார்கள் என்று விஷயம் தெரிந்தவர்கள் சொல்லுங்கம்மா.

4. சிறிய வயதில் african, mongolian, caucasian என்று பல races - இனங்கள் இருப்பதாக பள்ளியில் சொல்லி கொடுத்தார்கள். இப்படி எல்லோரும் கிரீம் உபயோகிக்க ஆரம்பித்தால், எல்லோருமே caucasian race போல வெள்ளையாய் மாறி விட்டு, மற்ற இனங்கள் அழிந்து விடுமே...

5. நல்ல வேளை - 1947-க்கு முன்னாலே, நிறைய பெண்கள் இந்த சிகப்பழகு கிரீம் வாங்கி உபயோகிக்கவில்லை. அப்புறம், "வெள்ளையனே வெளியேறு!" என்று அடையாளம் தெரியாமல், குழப்பம் ஏற்பட்டு, நம் இந்திய பெண்மணிகளையும் சேர்த்து நாட்டை விட்டு அனுப்பி இருப்பாங்க.

கண்மணிகளே... எல்லோருமே மாடல் அழகிகள் மாதிரி இருந்தால்தான் வெற்றி என்று எந்த சாஸ்திரமும் சொல்லவில்லை. சிகப்பழகு தரும் தன்னம்பிக்கை கப்பலில் பயணம் செய்யும் போது, வெயிலில் போய் விட்டு சிறிது கறுத்தாலும் உடனே, அந்த கப்பல் மூழ்கி கவலையில் கன்னத்தில் கை வைத்து உட்கார்ந்து புலம்ப வேண்டியதுதான்.

சுத்தமாய், நேர்த்தியாய் திருத்தமுடன் இருப்பது அழகு. ஒருவரின் நிறம் மட்டுமே அழகை தந்து விடாது.

கண்ணாடியில் பார்க்கும் போது, முகம் சுளிக்காதீர்கள். நிலாவில் கூட குறை உண்டு. அதை பெரிதுபடுத்தி நாம் ஒதுக்குவது இல்லையே. முழு நிலவின் ஒளியில் குறைகள் மறைந்து போகும். சாதிக்க வேண்டிய சக்தியின் ஒளியில் உங்கள் குறைகளை
ஒதுக்கி வைத்துப் பாருங்கள்.

ஒவ்வொரு துறையிலும் வெற்றி பெற ஒவ்வொரு அம்சம் தேவை. சிகப்பழகு, வெற்றி கட்டடத்துக்கு அஸ்திவாரம் இல்லை. உறுதியான கட்டடத்தின் மேல் அடிக்கப்பட்ட பல வர்ணங்களில் ஒன்று மட்டுமே. நம் திறமைகளிலும், வாய்ப்புகளை சரியாக உருவாக்கி பயன்படுத்தி கொள்வதிலும், இறை அருளிலும் நம்பிக்கையுடன் உற்சாகமாய் இருப்பதிலும், பலமான அஸ்திவாரம் அமைய வேண்டும். தோல்விகளை கண்டு மிரளாமல், சோர்ந்து போகாமல் முன்னேறி வர வேண்டும்.

பொறாமை என்ற மாசு நீக்கி - அறியாமை என்ற சோர்வை விட்டு - பயம், கவலை, தயக்கம், கோபம், எரிச்சல் என்ற மருக்களை அகற்றி - புன்னகை என்ற மென்மை தவழ - உங்களுக்கென்று தனித்துவமாய் இருக்கும் திறமைகளை ஆர்வமாய் புத்துணர்வுடன் வளர்த்து கொண்டு - அழகாய் வெற்றி பெற வாருங்கள்.

"குறை ஒன்றும் இல்லை... கண்ணே..!"

http://youthful.vikatan.com/youth/Nyouth/sakthi2010/chitrastory040310.asp