"நாசா' விண்வெளி மையத்தை சுற்றிப்பார்த்த ஈரோடு மாணவி

""நாசா விண்வெளியை மையத்தை சுற்றிப்பார்த்ததன் மூலம், விண்வெளி ஆராய்ச்சியாளராகும் ஆசை பிறந்துள்ளது,'' என, ஈரோடு மாணவி ஷோபிகா தெரிவித்தார்.வீரப்பன்சத்திரம் நகராட்சி கவுன்சிலர் மகேந்திரன் மகள் ஷோபிகா; திருச்செங்கோடு வித்யா விகாஸ் மேல்நிலைப்பள்ளியில் ஒன்பதாம் வகுப்பு படிக்கிறார். அமெரிக்காவில் உள்ள, "நாசா' விண்வெளி ஆய்வு மையத்துக்கு, ஷோபிகா உள்பட இப்பள்ளி மாணவியர் 55 பேர் அழைத்து செல்லப்பட்டனர். "நாசா' சுற்றுப்பயணத்தை முடித்துக்கொண்டு இவர்கள் நேற்று ஈரோடு திரும்பினர்.மாணவி ஷோபிகா கூறியதாவது:பள்ளியில் இருந்து 8ம் தேதி புறப்பட்டு, 10ம் தேதி, "நாசா' விண்வெளி மையத்தை அடைந்தோம். "நாசா'வில் பல்வேறு மையங்கள் உள்ளன. இதில், "ஜான்கென்னடி' மையத்தை சுற்றிப்பார்த்தோம்."நாசா'வில் இருந்து விண்வெளிக்கு அனுப்பப்பட்ட ராக்கெட்கள் பற்றிய முழு விவரங்கள் தெரிந்து கொண்டோம். பேப்பரில் நாங்கள் ராக்கெட் தயார் செய்து காண்பித்தோம். விண்வெளிக்கு சென்று, பூமியை பார்ப்பது போல், மாடல் ராக்கெட்டில் சென்று பார்த்தோம். விண்வெளி வீரர் ஜேம்ஸ் ரியலேவை சந்தித்து பேசினோம்.ராக்கெட்டை விண்வெளிக்கு அனுப்பிய பின், அதை கண்காணிக்கும் அறை, விண் கல், சந்திரனில் எவ்வாறு வாசனை இருக்கிறது என்பது குறித்து தெரிந்து கொண்டோம். நவம்பர் மாதம் "நாசா'வில் இருந்த ஏவ உள்ள ராக்கெட்டை, அரை கிலோ மீட்டர் தூரத்தில் இருந்து பார்த்தோம். வழக்கமாக ஆறு கிலோ மீட்டர் தூரத்துக்கு அப்பால் நின்று பார்க்க வேண்டும். மாணவியர் என்பதால் எங்களை அரை கிலோ மீட்டர் தூரத்துக்கு அனுமதித்தனர்."நாசா'வில் காலை 9 மணி முதல் மாலை 4.30 மணி வரை சுற்றிப்பார்த்தோம். அதன் பின், மூன்று நாட்கள் நியுயார்க், எம்பயர் பில்டிங் உள்ளிட்ட இடங்களை சுற்றிப்பார்த்தோம். "நாசா'வை சுற்றிப்பார்த்ததால், வரும் காலத்தில் விண்வெளி ஆராய்ச்சியாளராகும் எண்ணம் தோன்றியுள்ளது.இவ்வாறு அவர் கூறினார்.