விமானங்களை வீழ்த்த தீவிரவாதிகள் புது வியூகம்

நிசாந்தன் · நிசாந்தன் Thu Oct 21, 2010 1:34 pm

தொழில்நுட்ப வசதிகள் வளர வளர, சாதாரண மக்கள் பயன் அடைகிறார்களோ இல்லையோ, தீவிரவாதிகளும் சமுதாய விரோதிகளும் மிக நல்ல பயனை அடைந்து வருகிறார்கள். அந்த வகையில், இப்போது ஒரு ஆபத்து கணினி வரவால் ஏற்பட்டுள்ளது.

விமானங்களை கடத்தாமலேயே வீட்டில் இருந்து ஒரு கணினி உதவியுடன் விமானத்தை தரையில் மோதவைத்து சின்னாபின்னமாக்க புதிய வழியை கண்டுபிடித்துள்ளனர் தீவிரவாதிகள். இந்த அதிர்ச்சித் தகவல் உலக நாடுகள் அனைத்தையும் கலக்கம் அடையவைத்திருக்கிறது.

இதை கண்டுபிடித்தவர்கள் ஏதோ, காமா, சோமா நாட்டு விஞ்ஞானிகள் அல்ல. விஞ்ஞான வளர்ச்சியின் ஊற்றுக்கண்ணாக திகழும் பிரிட்டன் நாட்டின் பிரதமரின் பாதுகாப்பு ஆலோசனைக்குழுவின் விஞ்ஞானிகள்தான் சொல்லி உள்ளனர்.

அதாவது விமானங்கள் கணினி உதவியுடன் இயங்குகின்றன. இந்த கணினிகள்தான் தீவிரவாதிகளுக்கு குறி. அதாவது, விமானங்களில் பயன்படுத்தப்படும் கணினிகளில் அதன் செயல்பாட்டை கட்டுப்படுத்தும் மாஸ்டர் செர்வர்கள் தரைக்கட்டுப்பாட்டு நிலையங்களில் தான் இருக்கும். இந்த செர்வர்களில், தீவிரவாதிகள் தங்கள் சொல்படி கேட்க்கக்கூடிய வைரசுகளை புகுத்துவார்களாம். பிறகு, அந்த வைரள் தங்கள் கட்டுப்பாட்டில் இயங்கும்படி புரோகிராமிங் வடிவமைப்பார்களாம். அதன்பிறகு, விமானத்தை தரையிலோ, மலையிலோ, கடலிலோ விழவைக்கவோ, மோதச்செய்யவோ உத்தரவு பிறப்பிப்பார்களாம். அடுத்த நிமிடம் விமானம் சின்னாபின்னமாகிவிடும். அப்புறம் என்ன அதில் இருப்பவர்கள் அத்தனைபேரும் காலி.

இந்த சைபர் கிரைம் குற்ற நிகழ்வுகள் இன்னும் சில மாதங்களில் கூட நடப்பதற்கு சாத்தியம் இருப்பதாக விஞ்ஞானிகள் எச்சரிக்கிறார்கள். விமானங்கள் மட்டுமல்ல, அணு உலைகள், மின்சார் உற்பத்தி நிலையங்கள், என எதை வேண்டுமானாலும் தீவிரவாதிகளால் தகர்க்க முடியுமாம். 2007ம் ஆண்டு ஈஸ்டோனியாவில் இப்படி ஒரு தாக்குதல் முயற்சி மேற்கொள்ளப்பட்டு, அங்கு இணையதள சேவைகள் அத்தனையும் முடங்கின. எனவே இப்போது வெளியாகி உள்ள எச்சரிக்கைத் தகவலை அடுத்து பிரிட்டனில், தீவிரவாத சவாலை முறியடிக்க என்ன செய்யலாம் என்ற தீவிர ஆலோசனையில் விஞ்ஞானிகள் ஈடுபட்டுள்ளனர். பொதுவாக, கணினி சார்ந்த போலி வைரஸ்கள் உற்பத்தி கேந்திரமாக சீன விளங்குவதால், அதன் மீது கண்காணிப்பை பலப்படுத்த வேண்டிய கட்டாயம் பல நாடுகளுக்கு ஏற்பட்டுள்ளது.