ஸ்ரீரங்கம் கோவிலில் மண்ணில் புதைந்து கிடந்த அரிய சிற்பங்கள் கண்டெடுப்பு

ஸ்ரீரங்கம் கோவில் ஆயிரங்கால் மண்டபம் முன் குவிந்திருந்த மண் அகற்றப்பட்டதால், பல ஆண்டுகளாக மண்ணில் புதைந்து கிடந்த நாட்டிய சிற்பங்கள் கண்டெடுக்கப்பட்டன.



திருச்சி ஸ்ரீரங்கம் ரெங்கநாதர் கோவிலில், கிழக்கு வெள்ளை கோபுரம் அருகே, தெற்கு பார்த்த நிலையில் ஆயிரங்கால் மண்டபம் அமைந்துள்ளது. 500 ஆண்டுக்கு முன், விஜயநகர பேரரசு காலத்தில் கட்டப்பட்டது என்று கூறப்படுகிறது. மண்டபத்தில் மொத்தம் 947 தூண்கள் மட்டுமே இருக்கின்றன. எனினும், 800 தூண்களுக்கு மேல், 1,000க்கும் குறைவாக இருந்தாலும் ஆயிரங்கால் மண்டபம் என்று அழைக்கப்படுவது மரபு என்பதால் அவ்வாறே அழைக்கப்படுகிறது. "ஆயிரங்கால் மண்டப வாயிலில், மொத்தம் 10 பெரிய படிக்கட்டு மற்றும் ஒரு சிறிய படிக்கட்டு என மொத்தம் 11 படிக்கட்டுகள் உள்ளன. மண்ணில் புதைந்திருப்பதால், மண்டபத்தை முழுமையாகக் காணும் வகையில், மண்ணைத் தோண்ட வேண்டும்' என்று பல ஆண்டாக கோரிக்கை விடுக்கப்பட்டது.



கோவில் இணை கமிஷனர் ஜெயராமன், அறங்காவலர் குழுத் தலைவர் தியாகராஜன் உத்தரவின்படி, நேற்று மண்டபத்தின் முன்புறம் இருந்த ஐந்தடி மண் அகற்றப்பட்டது. அப்போது, மண்டபத்தின் முகப்புச் சுவரில் செதுக்கப்பட்டிருந்த, நாட்டியக் கலையில் உள்ள நளினங்கள், முத்திரைகளை காட்டும் அழகிய, பழமை வாய்ந்த சிற்பங்கள் வெளியில் தெரிந்தன. சிற்பங்களின் மீது காவி நிற சுண்ணாம்பு அடிக்கப்பட்டிருந்ததால், "கடந்த காலங்களில் இச்சிற்பங்களை மக்கள் பார்த்து ரசித்து, அவற்றை பராமரித்து வந்துள்ளனர்' என்பது தெரிகிறது. வைகுண்ட ஏகாதசி திருவிழா டிசம்பர் மாதம் நடக்கவிருக்கும் நிலையில், உலகம் முழுவதும் இருந்து ஸ்ரீரங்கம் கோவிலில் குவிய இருக்கும் பக்தர்களுக்கு இச்சிற்பங்கள் கண்ணுக்கும், காட்சிக்கும் பெரும் விருந்தாக அமையும்.



புதையும் பழமை: "ஸ்ரீரங்கம் ராஜகோபுரம் மண்ணில் புதைகிறது' என்று கடந்த 18ம் தேதி செய்தி வெளியானது. அதை மெய்ப்பிக்கும் வகையில், கோவில் வளாகம் உட்பட பல்வேறு இடங்கள் மண்ணில் புதைந்துள்ள செய்தி வெளியாகியுள்ளது. "கோவிலுக்குள் புதைத்துள்ள ஆயிரங்கால் மண்டப சிற்பங்கள் தற்போது வெளிவந்துள்ளன. அதேபோல, ஸ்ரீரங்கம் அம்மா மண்டபத்தின் நுழைவாயிலில் இருந்த யானையும், படிக்கட்டுகளும், ஸ்ரீரங்கம் ராஜகோபுரத்தை அடுத்த மண்டபத்துக்குள் புதைந்துள்ள பாதாள கிருஷ்ணர் கோவிலையும் தூர்வார வேண்டும். வருங்கால சமுதாயம் அறியும் வகையில், புதையும் பழமைகளை வெளிக்கொணர வேண்டும் என்று பக்தர்கள் மீண்டும் விடுக்கின்றனர்.