தேனி மாவட்டம் பொட்டிபுரம் அருகே நியூட்ரினோ ஆய்வுக்கூடம் அமைக்க மத்தியச் சுற்றுச்சூழல் மற்றும் வனத்துறை அமைச்சகம் அனுமதி வழங்கி உள்ளது

நிசாந்தன் · நிசாந்தன் Thu Oct 21, 2010 12:57 am

தேனி மாவட்டம் பொட்டிபுரம் அருகே நியூட்ரினோ ஆய்வுக்கூடம் அமைக்க மத்தியச் சுற்றுச்சூழல் மற்றும் வனத்துறை அமைச்சகம் அனுமதி வழங்கி உள்ளது.

நியூட்ரினோ ஆய்வுக்கூடம்

இந்திய அனுசக்தித் துறையின் சார்பில், ‘இந்திய நியூட்ரினோ ஆய்வுக்கூடம்’ அமைக்க முடிவு செய்யப்பட்டது. நீலகிரி மாவட்டம் சிங்காரா என்ற இடத்தில் இந்த ஆய்வுக்கூடத்தை அமைப்பது பற்றி முதலில் பரிசீலிக்கப்பட்டு வந்தது. அந்த பகுதியில் யானைகள் மற்றும் புலிகள் அதிகம் உள்ளதாலும், சுற்றுச்சூழல் பாதுகாப்பை கருத்தில் கொண்டும் அங்கு ஆய்வுக்கூடம் அமைக்கும் யோசனையை மத்திய சுற்றுச்சூழல் மற்றும் வனத்துறை அமைச்சகம் நிராகரித்துவிட்டது.

அதன்பிறகு, தேனி மாவட்டம் சுருளியாறு பகுதியில் ஆய்வுக்கூடம் அமைப்பது பற்றி அணுசக்தி துறை பரிசீலித்து வந்தது. அந்த பகுதி மேகமலை வனவிலங்கு சரணாலயமாக அறிவிக்கப்பட்டதால் அங்கு ஆய்வுக்கூடம் அமைக்கும் திட்டமும் கைவிடப்பட்டது.

பொட்டிபுரம் அருகே உள்ள மலை

இதைத் தொடர்ந்து, இறுதியாக தேனி மாவட்டம் பொட்டிபுரம் அருகே உள்ள போடிமேற்கு மலைப்பகுதியில், நியூட்ரினோ ஆய்வுக்கூடத்தை அமைக்க தீர்மானிக்கப்பட்டது. கடினமான பாறையை கொண்டதாக இருந்ததால் அந்த மலை ஆய்வுக்கூடத்தை அமைக்க தேர்ந்தெடுக்கப்பட்டது.

ஆனால் இதற்கு அந்த பகுதியில் உள்ள மக்கள் முதலில் எதிர்ப்பு தெரிவித்தனர். சம்பந்தப்பட்ட அதிகாரிகள் மக்களை சந்தித்து, ஆய்வுக்கூடத்தை அமைப்பதால் ஆபத்து எதுவும் ஏற்படாது என விளக்கி கூறியதை தொடர்ந்து அவர்கள் தங்கள் எதிர்ப்பை கைவிட்டனர்.

அனுமதி

இந்த நிலையில், பொட்டிபுரம் அருகே உள்ள மலையில் நியூட்ரினோ ஆய்வுக்கூடம் அமைக்க மத்திய சுற்றுச்சூழல் மற்றும் வனத்துறை அமைச்சகம் நேற்று அனுமதி வழங்கியது. குகைப்பாதை அமைப்பதிலும், வெட்டி எடுக்கும் பாறைகளை அப்புறப்படுத்துவதிலும் பாதிப்புகள் குறைவாக இருக்கும் வகையில் தேவையான நடவடிக்கைகளை எடுக்க வேண்டும் என்றும், சுற்றுச்சூழல் மேலாண்மை தொடர்பான திட்டத்தை முழு அளவில் அமல்படுத்துமாறும் சுற்றுச்சூழல் மற்றும் வனத்துறை அமைச்சகம் கேட்டுக்கொண்டுள்ளது.

நியூட்ரினோ ஆய்வுக்காக இங்குள்ள மலையில் 2.1 கிலோமீட்டர் நீளத்திற்கு பாறையை குடைந்து குகைப்பாதை அமைக்கப்படும். இந்தக் குகைப்பாதையை சுற்றிலும் ஏறக்குறைய 1 கிலோமீட்டர் தடிமனுக்கு கடினமான பாறை சூழ்ந்து இருக்கும் என்பதால் ஆய்வுக்கு மிகவும் பாதுகாப்பானதாக இருக்கும் என்று கருதப்படுகிறது. ரூ.1,200 கோடி செலவில் இந்த திட்டத்தை நிறைவேற்ற தீர்மானிக்கப்பட்டு உள்ளது.